تقييم النترا 2012 من خلال تجربتك وقيادتك لها بعد وجودها أكتر من ست شهور في الأسواق

**esam_ayad** · 05-03-2012 09:24 PM

السلام عليكم يا أحلي ناس في أحلي منتدي مصري:

ياريت كل واحد اشتري النترا 2012 _(بعد مرور اكثر من ست شهور علي نزولها الأسواق في مصر والعالم كله)_ يكتبلنا انطباعه عنها بعد ماجربها واتعود عليها من ناحية القوة والأداء والراحه والعفشه واستهلاك البنزين وتقفيل العربيه من الداخل وجودة الخامات المستخدمه والتسارع وكل النواحي التانيه .
يعني تقرير مبسط عنها من كل النواحي.
وهل لو رجع الزمن بيك لـ ورا : هل هاتشتريها مره تانيه ولا هاتقول لأ مش هاشتريها أنا كنت هاخد مقلب؟ وليه؟
وجزاكم الله خيرا عن كل من سيدخل ويقرأ هذا الموضوع ويستفيد به, فأرجو الا تكونو بخلاء في الرد.
وشكرا لكم مقدما.

**esam_ayad** · 05-03-2012 09:32 PM

حبيت أني أكون اول واحد يرد علي نفسي واكتب تقييمي البسيط عن السياره الرائعه فعلا النترا2012 من خلال قيادتي لسيارة زميلي منذ يومين لمسافه أكثر من 60 كيلو رايح جاي__ بس انا في الكويت مش في مصر يعني العربيه خليجي __ وبسم الله ماشاء الله ولا أروع من كده وتستاهل فعلا فلوسها وماسمعتش أي تزييق ولا طقطقه في الديكورات خالص وأخدت فيها أكترمن حفره بسيطه وصغيره كده علي الماشي والسياره ماشيه ولا كأن في حاجه ومشيت علي سرعة 100 كيلو علي عين القط__ وكان تقريبا خمس أو ست صفوف جنب بعضها يعني قويه__ وماحستش بيه أوي زي اللي بحس بيه في عربيتي __ نيسان ماكسيما _وفي جنب شقتي مطب رخم عربيتي بتحك فيه لما أكون واخد مطب علي سرعة عشرين العربيه أخدته بكل راحه يعني يا جماعه العفشه بتاعتها حلوه وكويسه ومش زي مابعض الأعضاء قالو ان عفشتها ناشفه ومش طريه.
لكن حسيت ان الكراسي بتاعتها مش مريحه قوي والمشكله الأكبر اني لما جيت اركنها في وش الحيطه أخدتها بالإحساس وده كان مضايقني جدا لأن كان ممكن احساسي يخوني وألمسها في الحيطه
لكن برضو بإذن الله هي سيارتي القادمه في خلال تلات اربع شهور ان شاء الله.

**Samir Elshahawy** · 05-03-2012 09:59 PM

سيدي الفاضل ..

العربية معايا فعلا منذ حوالي 5 شهور و عامل بيها الي الان 14000 كم معظمهم سفر
أولا.. العربية أوتوماتيك أول فئة

ثانيا.. تقييمي المبدئي للعربية كالاتي :
1- من حيث القوة : موتور جاما 4 - 1600 سي سي بقوة 128 حصان
بصراحة رغم التسارع الجيد جدا للعربية ألا أني شايف أن الموتور قليل عليها كانت محتاجة قدرة أعلي من كده علشان كده أعتقد أن المواتير الجديدة gdi و الغير متوفرة اصلا بالشرق الاوسط هي المناسبة لهذه السيارة أكثر لأنه بيعطي قدرة أكبر 138 حصان لكن بشكل عام العربية من حيث القوة جيدة

2- الأداء و أستهلاك البنزين : طبعا الكوريين عوضوا موضوع القدرة و ضخامة العربية بنظام متطور لنقل الحركة بيتيح لها 6 سرعات الامر اللي بيوفر في البنزين بشكل مذهل تقريبا بتعمل من 6.5 - 7.2 لتر لكل 100 كم بسرعات متفاوتة تبدأ من 35 كم/ساعة و حتي 138 كم/ساعة و ده هو نطاق السرعات الاقتصادية طبعا أداء الموتور ممتاز في السرعات الثابتة و في التسارع جيد زي ماقولت

3- الراحة : العربية من الداخل واسعة و مريحة جدا و عفشتها ناعمة تقدر تقارنها فعليا بالتويوتا كورولا اللي جربتها فعلا لفترة طويلة قبل الالنترا و طبعا عزل الصوت جيد جدا صحيح مش زي تويوتا لكن نظرا لأنها أول فئة فتعتبر نقلة نوعية للسيارات الكورية في تلك الفئة

4- التقفيل و جودة الخامات : ممتازة

5- الثبات : نقدر نقول انها من العربيات الجيدة جدا في السرعات العالية (جربتها لحد سرعة 200 كم/ساعة) و جربت الملفات بيها علي سرعة 140 كم/ساعة كانت ثابتة في نفس الحارة و لم تنزلق للحارة الاخري

عيوبها كالتالي :
1- بالرغم من الشكل الممتاز و الانسيابي ألا ان كبر حجم الفوانيس الامامية و الخلفية عامل لي مشكلة خاصة أننا في مصر بنسوق وسط عربيات المسافات البينية بينها بتكون سنتيمترات معدودة و قد يتخللها موتوسيكلات و دراجات فاي لمسة غلط هاتكلف فانوس تمنه الشئ الفلاني

2- العربية من الداخل منخفضة نسبيا خاصة الكنبة الخلفية ماتنفعش طوال القامة نظرا لميل السقف الي الخلف بشكل كبير

3- نظام التعليق الخلفي (torsion bar) و اللي بتشعر معه أن العربية بتنحرف من الخلف مع بعض أنواع المطبات خاصة في الملفات و لو ان ده مالوش تاثير كبير في ثبات العربية لكني شايفه عيب

لكن بشكل عام لو رجع بيا الزمن تاني : هأجيب الالنترا 2012 و لكن فئة أعلي علي الاقل اللي فيها abs و أيرباج

و عموما أحب أطمئن حضرتك و جميع السادة أعضاء قسم هيونداي أننا حاليا بنجهز فعليا لعمل أختبارات قيادة لكل من : الألنترا 2012 و الاكسنت rb و موديلات أخري من هيونداي تمهيدا لعمل تقييم شامل لتلك السيارات و بشكل حرفي لأول مرة بمصر و لكن المسألة مسألة وقت فقط

**Hesham94** · 05-03-2012 10:45 PM

انا ركبت الالنترا وهى جامدة الصراحة2012

وركبت هوندا سيفيك 2012 الشكل الجديد التابلوه بتاعها وهمممممممم

والتسارع السيفيك افضل من الالنترا وافضل فى عزل الصوت وفى مجال الرؤية

لو فى امكانياتك تجيب سيفيك فهى تستاهل سعرها جدا الصراحة

اما لو حضرتك عايز الالنترا فهى ممتازة بردو لكنى افضل السيفيك خصوصا كنت بحس انى عارف ابعادها على عكس الالنترا الزجاج الخلفى مقرف جدا فى الالنترا الجديدة

والقرار الاخير لك

**Samir Elshahawy** · 05-03-2012 11:06 PM

المشاركة الأصلية كتبت بواسطة hesham94

انا ركبت الالنترا وهى جامدة الصراحة2012

وركبت هوندا سيفيك 2012 الشكل الجديد التابلوه بتاعها وهمممممممم

والتسارع السيفيك افضل من الالنترا وافضل فى عزل الصوت وفى مجال الرؤية

لو فى امكانياتك تجيب سيفيك فهى تستاهل سعرها جدا الصراحة

اما لو حضرتك عايز الالنترا فهى ممتازة بردو لكنى افضل السيفيك خصوصا كنت بحس انى عارف ابعادها على عكس الالنترا الزجاج الخلفى مقرف جدا فى الالنترا الجديدة

والقرار الاخير لك

فعلا نسيت أذكر العيب ده في الألنترا 2012
الزجاج الخلفي مشكلة لأن درجة ميله بتقلل مجال الرؤية الخلفية و بتحتاج وضعية خاصة لظبط المراية و الكرسي لكن المرايات الجانبية مساحتها كبيرة بشكل يعوض ذلك و الموضوع بيصبح أعتياد بعد ذلك زي ماقولت لما تعرف أزاي تظبط المرايات مع بعض

أما بالنسبة للسيفيك فطبعا هيا أختيار رائع ماحدش يقدر يقول حاجة و لكن يعيبها أنخفاضها و قربها للارض مقارنة بالالنترا مع أرتفاع سعرها بشكل كبير جدا

**mody3on** · 05-03-2012 11:32 PM

السيفيك ب 200 الف جنيه يا عم متسواش اكتر من 150 اصلا !!
بس العربية نازلة مصر من اكتر من سنة دلوقتي

**Samir Elshahawy** · 05-03-2012 11:40 PM

المشاركة الأصلية كتبت بواسطة mody3on

السيفيك ب 200 الف جنيه يا عم متسواش اكتر من 150 اصلا !!
بس العربية نازلة مصر من اكتر من سنة دلوقتي

بص أنا هأقولك اللي قولته لموظفي المبيعات بهوندا التجمع الخامس لما العربية كانت لسه نازلة و كنت أنا يومها بأجرب السيتي معاهم

قولت لهم أن العربية دي هاتفشل في تسويقها زي ما تويوتا أيجبت فشلت في تسويق الياريس ال 1500 و الكورولا الجديدة و ده بسبب السعر العالي جدا في حين أن هيونداي و كيا بينزلوا بعربيات علي قدر عالي من الكفائة و الكماليات و بأسعار اقل بكتييييير من أسعار تويوتا و هوندا

كمان قولت لهم ان السيتي اتظلمت لما نزلت في نفس توقيت نزول السيراتو بالسعر ده مع أنها في أعتقادي افضل من السيراتو من نواحي كتير أهمها الموتور و الثبات و عوامل الامان لكن مش معني كده انها تنزل بأكتر من 130000 جنيه

و للأسف .... اهو أنت بتشوف كام عربية سيتي الشكل الجديد أو سيفيك أو كورولا في مقابل كام سيراتو و ألنترا

**mody3on** · 05-03-2012 11:53 PM

مش الهوندا وبس كل توكيلات العربيات الياباني بيغالوا في السعر جدا لمجرد ان العربية ياباني , عشان كده الياباني مبقاش الاول عالسوق زي زمان وبقى اللي مسيطر الكوري والاوروبي

**SAMEH_FOUAD** · 06-03-2012 09:14 AM

ياجماعة كل اللى يعيب السيفيك بس هو سعرها وشكلها فى الموديل الحالى

يعنى شكلها تحسة انة مافيش تطوير او مش عربية نازلة عام 2012 وهتقعد كمان 5 سنين زى مالسيفيك عودتنا اشكالها ممكن تفضل 15 سنة وتقول عليها انها جديدة وبحالتها لسة

بالنسبة للسعر انة غلى مع عدم توافر محرك جديد او فتيس جديد ومش هقول 6 سرعات لان فعلا اداء فتيس الهوندا احسن بكتير من اداء ناقلات حركة كتير وطالما انة مغطى العزم والسرعة وبدون الاحساس بالنقلات يبقى تمام بس مشكلتة ان ممكن تلاقى صوتة عالى شوية على السرعات العالية فوق ال180

لكن كثبات + نعومة + شكل داخلى + تقفيل + رؤية + اعتمادية كل دة لا يمكن الشركات الكورية تضاهيها فيها ابدا مع احترامى لكل الكورى بس فعلا الكورى مع تجربتى لية لاكثر من سيارة واكثر من موديل هو اتقدم فى حاجات و رجع فى حاجات واولها

1- التقدم فى الشكل سواء خارجيا او داخليا

2- التأخر فى نظام التعليق من نظام تعليق مستقل الى نظام تعليق torision beam ودة سبب مشكلة كبيرة ومش صغيرة لانى وانا ماشى بالعربية ال rb اى فاصل العربية بتعدى علية وكان على سرعة 80 كم العربية بحسها بتتزحلق من الخلف ناحية اليمين ودة طبعا شىء مخيف لان الموضوع دة زاد لما وصلنا لسرعة 130 والعربية ثباتها بيقل جدا سواء هية او الالنترا ودة اللى مش عارفين يعملوة الكوريين

- صوت التاكيهات العالى جدا وانت بتسخن العربية الصبح بتحسسك ان فية مشكلة فى المحرك ودية مش عارفين يعالجوها من الاجيال اللى فاتت

- مجال الرؤية اللى ماينفعش خالص فى مصر بسبب الزحمة والشوارع الضيقة بيعرض العربية كتير لخبطات وتجريحات دة غير طريقة التصميم بتاعها اللى اى خبطة فيها ممكن تكلفك تغير القطعة كاملة

- تصميم العربية ممتاز بس يفتقر للجاذبية يعنى مش العربية اللى تلفت انتباهك ومش عارف الصراحة دة بسبب اية هل الانتشار ولا هية اصلا كدة وبردة بعكس السيراتو تحس ان فيها جاذبية وخصوصا الكوبية تحب تبص عليها بالرغم من انتشارها

طبعا دة مجال للمناقشة ياريت محدش يزعل دية كلها مناقشات