تقرير مختصر عن صيانة 20000 للوجان __ فرع العامرية اسكندرية

**georgedada82** · 06-03-2012 10:51 PM

النهارده توجهت لتوكيل العامرية باسكندرية ... علشان اعمل صيانة الـ 20000 لان العربية عدت اكتر من سنة وكان لازم تغيير زيت وكده ( العربية عاملة 16071 كيلو يعني مش بمشي بيها كتير رغم انها موديل 2010 وانا جايبها في سبتمبر 2009 ) المهم ... كان عندي ملاحظة ان الولاعة فاصلة ودواسة الفرامل بتطلع صوت تزييق وصوت من ورا من المطبات ... المهم تمت الصيانة وكل شئ تمام في حدود حوالي ساعتين
التكلفة كلها كانت 810 ( سعر الزيت 240 ... سعر فلتر الزيت 45 ... سعر فلتر الهوا 70 ... سعر البوجيهات 120 وحاجة مش قادر افهمها في كل صيانة بيكتبوها ب 3 جنيه والباقي مصنعيات )
وغسلت الموتور بالفوم ب 30 يعني التوتال 840 ...
اداء السيارة
احسن من الاول في نعومة العفشة ... الولاعة طلع فيوز واتغير وهو خاص بالكاسيت والولاعة تقريبا
صوت الموتور انعم من الاول نسبيا سحب العربية تمام
المهم ان اداء الفرع بقي اقل شوية يعني هما تقريبا خدوا اللي كانوا موجودين كلهم نقلوهم سموحة ... والموجودين في الاستقبال وكده كلهم جداد حتي لما جيت استلم بسال علي ملاحظاتي سالت المهندس اللي بيسلمني علي التكييف ايه الاخبار قال انه نضفنا الفلتر وبقي تمام قولت له نعم الفلتر ... قالي اه ... قولت له هي لوجان 2010 فيها فلتر تكييف اصلا ؟ ... قالي ايوة ايوة انا قصدي السربنتينة ... بس عامة النتيجة كويسة ... بس هي حاجة واحدة اخدت بالي منها بس بالليل وانا مروح قولت اغير اتجاه الهوا من اول مؤشر من ناحية السواق ببص لقيت المؤشر نوره مطفي خبطت تحته كده في كونسول لقيته اشتغل احرك المؤشر بالراحة يفضل النور موجود احركه بسرعة ما يفصل اخبط الكونسول من تحت يشتغل ... بس دي حاجة ضايقتني بس هبقي اروح لهم بيها تاني ... وانا في اثناء الصيانة روحت المعرض اتفرج علي العربيات المعروضة اتفرجت علي لوجان اوتوماتيك من جوه مختلف عن 2010 في الاتي شكل الفرش مختلف بس الجزء المالتي فانكشن خلف التارة ... نوع الكاسيت ... الكروم الفضي اللي جوه اللي عندنا في الكونسول والببان في 2010 من نفس الخامة بتاعة اوكر الباب الداخلية اما في الاوتوماتيك الاوكر الخاصة بالببان اللي هي كروم نفس شكل 2010 انما الكروم اللي في الباب وفي الكونسول معمول من خامة تانية انعم وفعلا متثبتة كويس مش بتزيق لما تدوس عليها ... يعيب بس اللوجان الاوتوماتيك انهم استخسروا يعدلوا الكونسول اللي هيركب فيه الفتيس فتحس ان الفتيس راكب فوق الكونسول ( انا شايفها شكلها وحش بس مش عيب جوهري ووجهات نظر ) اتفرجت علي الريو الجديدة في فرق كبير في شكل التابلوه والحداثة تحس في فرق سنين بينها وبين اللوجان في التصميم الداخلي ... يعيبها ان سعرها مش هيبقي منافس لان اول فئة اوتوماتيك تبدا من 105 ومش واسعة من جوه زي اللوجان ... وشكرا لمتابعتكم

**akramtiti** · 07-03-2012 12:38 AM

بالنسبه لمشكله صوت تزييق الفرامل اتحلت ولا لا اصلها عندي ؟

**georgedada82** · 07-03-2012 04:52 AM

لا الحمد لله اتحلت وكان مكتوب في امر السغل انه تم تشحيم الدواسة وتشحيم ماستر الفرامل والحمد لله تمام

**shaddadfalcon1** · 07-03-2012 05:48 AM

يعني نص الفلوس مصنعية؟ والمفروض انها كلها حاجات مش قصه يعني

**georgedada82** · 07-03-2012 06:45 AM

بصراحة انا ضمان العربية ينتهي في شهر 9 فانا قولت لا بعد الشر حاجة تحصل وانا في الضمان اهوه كده انا جيت علي نفسي وتحملت فعلا المصنعية الغالية ... بعد الضمان باذن الله ناوي اشتري الحاجة من التوكيل او مركز بيع قطع غيار معتمد من الوكيل واركب عند اي ميكانيكي رينو ... لان مثلا حاجات زي اللي ركبتها دي 50 جنيه لو اديتها لميكانيكي هيقف ويزقطط ... وبعدين عند حضرتك مثلا صيانة ال 10000 عبارة عن زيت وتغييرفلتر زيت وبياخدوا مصنعية تقريبا 130 او 140 جنيه حضرتك لو روحت بنزينة توتال وجبت زيت وفلتر وركبتهم تديله 10 جنيه هيرقص من الفرحة وبما ان الضمان هيكون انتهي بعد الشر وربنا ما يحوجنا يعني مش هروح التوكيل الا لو حاجة ميكانيكية معقدة يعني حصلت ... ربنا يكفينا الشر كلنا

**ophthahmed** · 09-03-2012 08:44 PM

انا معاك ان الاداء فى فرع العامرية بقى اقل من الاول.و الاهتمام بالعميل و ملاحظاته بقى دون المستوى و لا يوجد مهندس يسلمك العربية بعد مراجعة الملاحظات تلاقيها مركونة على جنب و فيها المفتاح تدفع الفلوس و المفروض تمشى من غير ما تناقش و لما طلبت مهندس يسلمنى العربية اظهروا استغراب و تأفف غريب(عن تجربة شخصية مع مهندسة اسمها هبة فى الاستقبال)

**georgedada82** · 10-03-2012 01:50 AM

انا حصل معايا كده نفس كلامك وانا معاك تماما الاداء قل عن الاول لانهم نقلوا كل خبراتهم بالكامل لسموحة فمع ضيق المكان في سموحة الاداء برضو مش اد كده ... والعامرية مفيهاش ناس خبرة بالذات في الاستقبال ... مع ان توكيل رينو بالذات كان مشهور بخدمة العملاء الممتازة