الموضوع: معنديش مانع ادفع 6.10 جنيه ضريبه خطوط التليفون المحمول بشرط

السلام عليكم ورحمة الله وبركاته

طبعاً كلنا جالنا رسائل وعرفنا حكايه الضريبه اللي هتتخصم من رصيدك كل سنه

وقيمتها 6.10 جنيه مقسمه على 12 شهر .. كل شهر 51 قرش .. عدا شهرين يخصم 50 قرش

الضريبه دي فرضتها وزاره الماليه على شركات المحمول .. وشركات المحمول قررت تحملهم للمستخدم ونسقوها بينهم واتفقوا وكله ميه ميه

على الرغم من ان شركات المحمول دي بتكسب جااااامد جااامد جااااااااااااامد .. اااااااااااااااه بحسد وبحقد

بس انا موافق ادفعهم بشرط ..

انا هدفع 6.10 جنيه كل سنه .. والشركة كذلك تدفع زيهم 6.10 جنيه

وبما ان اخر احصائيه بتقول ان عدد مستخدمين المحمول وصل 81 مليون مستخدم

يبقى 6.10 *2*81.000000= 988.200000 جنيه

988 ملون جنيه وشويه فكه اللي هما 200 الف .. ( حوالي مليار جنيه كل 12 شهر هتدخل وزارة الماليه )

تكمله الشرط ...

ان المبلغ دة اللي هو وصل مليار جنيه في السنه .. يروح لمشروع قومي وبالتحديد مشروع إنتاجي

مش خدمي ( يعني مش مترو انفاق ولا مساكن شباب ولا اتوبيسات بالغاز الطبيعي ولا كوبري يربط امبابه بشبرا )

يعني مصنع عملاق .. استصلاح اراضي للزراعه بوسائل حديثه توفر انتاج اكبر وافضل .. حجات من دي يعني

مايتسفلتش بيه شارع الكورنيش .. ولا يدهن بيه عواميد نور .. ولا يتجاب بيه قمح مسرطن ولا الحوارات دي

يروح لمشروع قومي .. ويكون متفق عليه وكل الفلوس دي تروح للمشروع دة .. او عدة مشروعات متوازيه تاخدلها سنتين تلاته مش مشكله تاخد زي ماتاخد المهم الفلوس متوفرلها

ويتعملها سايت عالنت الناس كلها تبقى مراقباه .. نعرف منه خط سير المشروع ايه .. وصل لحد فين ايه اللي تم .. الخ

لكم ان تتخيلوا فائدة الفكره للبلد بشكل عام .. وكام واحد هيتوفرلهم فرص عمل مناسبه

مع السلامو عليكم