الموضوع: بطاقتك ياباشا

المشاركة الأصلية كتبت بواسطة Axel

اولا من حقه يشوف بطاقتك و يعرف وجهتك كمان و في نفس الوقت من حقك تشوف الكارنيه بتاعه و ديه برده هتنفعك عشان اي تعسف بتبقي عارف اسمه و رتبته و بياناته فده حق متبادل
بالنسبة التفتيش ميقدرش يفتشك غير في حالات معينة بس قبل ما نعرف الحالات لازم نفرق بين انواع التفتيش

فيه تفتيش ذاتي : و ده يفتش جيوبك و الحاجة اللي معاك
تفتيش وقائي : و ده انه يحسس ع هدومك بس من برة عشان لو فيه سلاح متأذيهوش او تأذي نفسك و تلبسهاله
و تفتيش اداري : و ده التفتيش اللي في المطارات و قبل دخول السجن و تفتيش بتاع الكهربا ع العداد
سيبك من الاخير
التفتيش الوقائي لو مثلا قبض عليك في حالة تلبس بيعمل تفتيش وقائي عشان زي مقولت لو فيه سلاح او حاجة لا تأذيه و لا تأذي نفسك و تلبسهاله
تفتيش ذاتي ده في حالة اذن بالقبض و التفتيش او في حالة انك تسمحله بده برضاك انت
اما لو مثلا ساعة الاستيقاف ( الاستيقاف انه يوقفك يسألك عن بطاقتك و وجهتك ) لو استيقاف و فتشك تعسفيا و لم تنطبق شروط الاستيقاف و مسك معاك اي حاجة سواء سلاح او اي حاجة مخالفة فيتم الطعم ببطلان اجراءات القبض و التفتيش و الحاجة بتتحرز و سيادتك بتطلع منها زي الشعرة من العجينة
انما لو الاستيقاف ترتب عليه حالة تلبس يبقي هتتفتش و بشروط برده

بالنسبة تفتيش الانثي مفيش ظابط يقدر يفتش واحدة ابدا لازم بيتم انتداب واحدة تفتشها بالنيابة عنه الاماكن اللي مسموح الظابط يفتشها في الانثي الايدين الوجه القدم يعني مثلا حالة تلبس و واحدة معاها حتة حشيش في ايديها يقدر ياخدها عادي من ايديها ميقدرش المحامي بتاع الهانم يجي يقول لأ أصل تفتيش الانثي و ..ألخ..الخ

تفتيش المنزل بيحتاج اذن من الجهة المختصة برده او النيابة يعني و التي تقع في نفس الدايرة لكن في احيانا بيكون التتفيش باطل بسبب تعسف اللي بيفتش ع سبيل المثال
دلوقتي طلع اذن بتفتيش بيت المتهم لكشف الاداة المستخدمة في جريمة القتل و هي طبنجة عيار كذا و نوعها كذا
راح الظابط فتش و لقي الطبنجة في الحالة ديه خلاص هو كده مهمته خلصت لكن لو تعسف في التفتيش و كمل تفتيش و لقي مخدرات او سلاح ابيض يبقي هنا حالة التبلس و التفتيش باطل لأنه تعسف فيها
و التلبس ليه شروط و حالات مش اي حاجة و السكة
و هكذا يعني الموضوع كبيير شوية و يدوخ في الاجراءات الجنائية بس ده شرح بسيط ليها

بس اللي لازم تعرفه ان مش اي حاجة بتم بالبركة و خلاص هوب مسك واحد تعالي ادخل السجن خلصت لأ فيه تحقيق و نيابة و دفاع مش اي حاجة و خلاص

اهم حاجة زي ما بتتعامل باحترام هيتعامل معاك باحترام و طالما فاهم في القانون و عارف حقوقك و واجباتك يبقي متقلقش
انا قبل كده برده اتوقفت بليل كنت لسه في تانية حقوق 2 مباحث بس الواحد اتعامل برده بالقانون
و ال الناس تقولك الحقوق وحشة محدش يدخل حقوق هأها ع الأقل الحقوق بتفهمك الدنيا ماشية ازاي في كل حاجة حتة في المجالات الاخري انما هندسة و لا طب في مجال شغلهم و بس و متعرفش حاجة خارج كده

و اي استفسار اتفضل

بالتوفيق ان شاء الله

شكرا يا باشا للتوضيح الواحد برضه لازم يبقى عارف خلفية عن القانون على كلام حضرتك تفتيشه ليا كان باطل للأسف وانا بصراحة متغاظ قوى خصوصا إنه حد مش فاهم قانون ولا فاهم نيلة دا حتة مخبر يادى النيلة المنيلة بنيلة يعنى الواحد يعمل ايه عشان يعيش بكرامة تركب القطر المكيف متلاقيش أمثال الناس دى نهائى هما بيبقوا موجودين فى القطر المميز انا كطالب مش بركب غيره لأنه ببلاش وبيقف المحطة اللى تعجبنى البلطجية فى القطر دا يتمثلوا فى الباعة الجائلين مش فى الناس الغلابة اللى قاعدة و أغلبهم يعم عليه السلبية فى التفكير وحاجة ما يعلم بيها إلا ربنا حسبى الله ونعم الوكيل حسبى الله ونعم الوكيل انا كرهت الناس وكرهت الجهل وكرهت نفسى :(


MohammedAladel عضو موقوف :)