الموضوع: النهاردة روحت لورشة ايمن فى شارع السودان عشان سخونة العربية

العربية امبارح سخنت منى مرتين بطريقة غريبة
امبارح الصبح كالعادة قبل ماتحرك ببص على الزيت و المية و طلعت من الجراج و مشيت بيها عادى لقيت مؤشر الحرارة عمال يعلى و عدى الشرطة اللى فى النص
روحت راكن على جمبو نزلت بصيت على المية لقيتها مش ناقصة روحت مدور و ماشى
جات فى التحرير المؤشر على جدا و لقيت دخان طالع من حوالين الكبوت و صوت فششششششش
قالت شكرا العربية جابت وش سلندر
طبعا جريت وقفت على جمب و فتحت الكبوت و سبتها لحد ماتهدى و فتحت القربة لقيتها فاضية تماما طبعا مش تسريب لكن المية اتبخرت
زودت مية و مشيت و روحت العبور و روحت المطار و روحت اكتوبر كل دة من 10 صباحا بعد السخونة لحد الساعة 7 و نص فى التجمع الخامس ماسخنتش خالص
و انا مروح و على كوبرى اكتوبر لقيت المؤشر شوية فوق و وشوية تحت قلت يا رب تكمل لحد البيت بس و نزلت من كوبرى اكتوبر و مشيت فى الزمالك قلت عشان لو عطلت بيا متعلطش فوق كوبرى تعطل بيا على الطريق احسن
فضل المؤشر على الحال دة لحد قبل الجرار بحوالى مترين و بعدين المؤشر رفع تانى و سامع صوت المية بتغلى كان براد شاى بيغلى و برضو الدخان طلع من حوالين الكبوت و اصوات وششششششششششش جريت على الجراج و ركنت بسرعة و سيبتها و طلعت
قلت كدة تقريبا العربية فيها مشكلة كبيرة
نزلت الصبح الساعة 10 و نص و حطيت مية فى القربة كانت فاضية برضو
علما انى كنت غاسل دورة التبريد فى البنزينة من شهر
روحت على ورشة الاسطى كرم اللى راح له العضو الفاضل mouraddesk
روحتله و ناس محترمين الحقيقة خصوصا الاستاذ ايمن
فتح الكبوت و قعد يزود بنزين عشان العربية تسخن و فعلا سخنت قدامة و المية غليت و بقت تطلع من تحت غطا الردياتير و طلع العيب فى ترموستات المروحة هما المفروض اتنين منهم فهو جرب لحد معرف انهى فيهم اللى بايظ و المروحة ماكنتش بتلف فكة و بعت واحد من عنده يروح يجيبه و راح جابه اصلى ماركة Mobis
و ركبه و جربت تمام و ضغطنا على العربية عشان تسخن بتكييف و من غير تكييف و المروحة اشتغلت الحمد لله و مافيش سخونة و حطها على الكمبيوتر و انا كنت قاعد جمبه و اداله error
coolante temp - High
و مسح العطل و دخل على الفتيس مالاقاش اى اخطاء الحمد لله و شيك على على الحساسات و كله تمام و لفيت بالعربية طول النهار و زى الفل الحمد لله
بشكر العضو الفاضل اللى عرفنا على المكان دة و الناس فعلا فاهمين فى العربية تمام هما اساسا تخصص فتيسات اتوماتيك لكن شغالين فى الميكانيكا و العفشة و كل حاجة و بصراحة الورشة ممتازة و جاهزة من كل المعدات و الاجهزة و الصنايعية و مكانها قريب جدا بالنسبة ليا
اى استفسار تحت امركم