الموضوع: شفاط الكربراتير

الشفاط هو عبارة عن ميكانيزم جوة الكربراتير بتكون بالكهربا او يدوى

وظيفتها :

بتخنق مسار الهوا وبترفع بكرة الاكسراتير سنة صغيرة زيادة

كل ده عشان الموتور يدور بسهولة وهو بارد
بحيث يبقى نسبة البنزين للهوا اعلى شوية

لان الموتور وهو بارد بيبقى محتاج بنزين اكتر وهواء اقل ( البنزين بيكون في حالة سائلة وبيتكثف على جدران البستم وبيكون صعب الاشتغال )

السيناريو بيكون كالتالى ، والعربية باردة الصبح ، بيكون في ازدواج حرارى في وضع منكمش ، الوضع المنكمش بيخليه يقفل الخانق (الشفاط) ويعلى السلانسيه والعربية تدور بسهولة


اول ما العربية تسخن الازدواج الحرارى متوصل بسخان كهربا و بيتمدد وده بيخلى الخانق يفتح تدريجيا والسلانسيه يرجع طبيعى


طبعا لو فضل الشفاط مقفول هتكون النتيجة ان العربية مكتومة وهى سخنة ( لان هى دى وظيفته اصلا ) بالاضافة للاستهلاك الزيادة للبنزين لانك بتضطر تدوس بنزين اكتر لتعويض نقص الهوا


طبعا اكيد في اشكال تانية للشفاط الاوتوماتيك في العربيات المختلفة ( مش شرط تكون فكرته ازدواج حرارى في كل العربيات )


بالنسبة للى بيكون يدوى بيبقى عبارة عن مفتاح شدة زي زرار فتح الشنطة مثلا ، متصل بسلك زي سلك الاكسراتير بيقفل ويفتح الشفاط يدويا وبتقفله الصبح قبل ما تدور العربية واول ما العربية تسخن وقبل ما تتحرك تفتحه ..


اتمنى تكون الامور واضحة واسف للاطالة

الف الف شكر يا باشا..بس اللي انا فهمته منك ان طول ما العربية ماشية محتاجة الشفاط مفتوح عشان متكتمش....صح ؟؟؟؟
وبردو عايز اعرف لو هو مفتوح علي طول ومش بيقفل خالص زي ما الميكانيكي عمله,,ده غلط في حاجة؟؟
ويا تري ليه تاثير علي استهلاك البنزبن ولا لا ؟؟

المشاركة الأصلية كتبت بواسطة eldaw

الف الف شكر يا باشا..بس اللي انا فهمته منك ان طول ما العربية ماشية محتاجة الشفاط مفتوح عشان متكتمش....صح ؟؟؟؟
وبردو عايز اعرف لو هو مفتوح علي طول ومش بيقفل خالص زي ما الميكانيكي عمله,,ده غلط في حاجة؟؟
ويا تري ليه تاثير علي استهلاك البنزبن ولا لا ؟؟

العفو يا باشا
تحت امرك

لو مفتوح على طول ممكن تدور بصعوبة الصبح في الجو البارد

المشاركة الأصلية كتبت بواسطة adel1212

الله ينور عليك
و عايز اسالك السؤال الجدالي فى الفتره الاخيرة
التسخين في العربيات الحديثه ايه الافضل
تحياتي

الافضل طبعا اتباع ارشادات صانع العربية لانهم بيبقوا عارفين بيقولوا ايه وليه ..

وبالنسبة للعربيات الحديثة
لو الدنيا تلج اوى ، بالكتير دقيقة واحدة تسخين كافية جدا

وفي العادى 30 ثانية او اقل كفاية وبعدها يكون التحرك بهدوء وعدم تحميل مفاجئ على الموتور لحد ما الموتور يوصل لدرجة الحرارة الطبيعية وده افضل للعربية من التسخين فترة طويلة


تسخين العربية على السلانسيه فترة طويلة هيعمل مشاكل ولو على المدى البعيد:
* العربية هتسخن ببطء
* العربية وهى باردة بتكون نسبة البنزين اعلى زي ما احنا عارفين لان الكمبيوتر بيقول للرشاشات تدى بنزين زيادة ( مرادف لعمل الشفاط في الكربراتير )
* نسبة بنزين اعلى و كفاءة احتراق اقل مع تسخين لفترة طويلة وسرعة موتور منخفضة ، على المدى البعيد بيأثر على علب الشكمان اللى هتتملى كربون ، يأثر على نظافة الموتور والزيت من جوة ، يأثر على البوجيهات ، من الاخر يأثر على اداء العربية ككل واستهلاكها للبنزين و صداقتها للبيئة ..


طيب ليه الكلام ده مش بينطبق على القديم برضه ؟

المواتير الجديدة مش حديد زهر زي القديمة يعنى انتقال الحرارة بين اجزاء الموتور بيكون بطريقة متجانسة اكتر ومتعادلة اكتر على عكس المواتير القديمة فبالتالى مش محتاجة وقت كبير عشان تسخن
كمان انواع الزيوت الجديدة بتقاوم التغير في اللزوجة بدرجة اكبر من زمان
وطبعا نظام الحقن الالكترونى بيدى العربية البنزين اللى هى عايزاه بالظبط وبيحس بكل ظروف تشغيل العربية .
وحتى مع العربيات القديمة انا افضل التسخين ما يزيدش عن دقيقتين في الظروف العادية وبعدها يبدأ التحرك بهدوء على الغيار الاول لحد ما العربية تسخن .


في نقطة مهمة اللى هى مش معنى انى بسخن 30 ثانية بس انى اقرص على الموتور بعدها على طول ،

التحميل على الموتور يكون تدريجى والتحرك يكون بعد وصول سوائل التبريد ( المية والزيت لكل اجزاء الموتور )
فمش معنى انى بقولك سخن 30 ثانية انك بعدها تطلع امريكانى وتحرق ، لا طبعا


كنت قريت مرة في موقع اجنبى بيقولوا ما تسخنش العربية الجديدة اكتر من دقيقة واحدة الا لو درجة الحرارة الخارجية اقل من 0 فهرانهيت ( يعنى -32 درجة مئوية !)

شكرا يا جميل,,
وبجد والله افدتني وافدت الجميع ..
بس ليا سؤال اخير
لو شفاط الكربراتير فضل مفتوح علي طول ..ده يزود استهلاك البنزين ؟؟؟