الموضوع: عايز اعمل جنينه

باشا الموضوع ان شاء الله سهل جدا
انا مهندس شبكات ري ولاندسكيب

بالنسبة للنجيلة بسيطة خالص
بس هل في تصور ليك للباقي ولا انت عاوزها نجيلة بس
ولا عاوز نباتات زينة

وهل هتحتاج شبكة ري ولا هتستخدم الخرطوم

وبالنسبة للرعاية بتاعتها

هي قطعة الارض دي في انهي منطقة بالظبط

المشاركة الأصلية كتبت بواسطة ahmadyusuf

بالنسبه للنجيله يا ريت حضرتك تفيدنا بخصوص النجيله و ايه ارخص اماكن لشرائها و هل بتتبا ع بالمتر ولا ايه

و ايه الفرق بين الصناعى و الطبيعى و مين يستحمل بهدله اكتر

و جزاك الله خيرا

بالنسبة للنجيلة هي كذا نوع بس احسن نوع يستخدم للحدائق سواء عامة او خاصة او فيلات نوع اسمه
باسبيلم 10
دا احسن نوع يستحمل المشي والظل

وهي فعلا بتتباع بالمتر
واحسن مكان تجيبها منه من مشتل كبير واغلبهم في القناطر
لكن بلاش من مشتل في مدينة نصر

لان في عيوب في النجيلة انها تيجي فيها بذور حشائش وغريبة
وجودة النوع نفسه
وتلاقيها في الاخر مثلا هتفرق علي 2-3 جنيه في المتر
فا بصراحة مش مستاهلة

نيجي للفرق بقي بين النجيلة الصناعي والطبيعي
بص يا سيدي النجيلة الطبيعي هي عبارة عن نبات حي والصناعي عبارة عن بلاستيك
سعر النجيلة الطبيعي من 8 - 14 جنيه للمتر علي حسب النوع والمكان الي هتتزرع فيه والموسم الي بتتزرع فيه والمساحة كل دا بيتحكم في سعر المتر

اما سعر النجيلة الصناعي من 100 - 300 جنيه للمتر برضه علي حسب النوع واستخدامه ( حدائق - ملاعب - .... ) والمكان والجودة بتاعت النجيلة نفسها

اكيد فرق سعر رهيب بس في مميزات وعيوب لكل واحد

نيجي كده سريعا للنجيلة الطبيعي
اولا بتحتاج ري بصفة يومية سواء شبكة ري او خرطوم ( يعني عندك تكلفة انشاء شبكة او لو خرطوم تكلفة فاتورة المياه فقط + تكلفة العامل الي بيقوم بري النجيلة في المساحات الكبيرة )

ثانيا بتحتاج صيانة مستمرة وهي عبارة عن قص النجيلة بماكينات القص والتسميد والمبيدات والتحديد

بالنسبة بقي للنجيلة الصناعي
- مش بتحتاج شبكة ري او اي تكلفة في فاتورة المياه ومش بتحتاج صيانة وفيها ميزة برضه انها بدرجة خضار ( اي بتحافظ علي اللون الاخضر بتاعها ) طوال الـ 12 شهر في السنة طبعا بغير الطبيعي اكيد بيتغير لونها في الشتاء ولو بدرجة خفيفة دا غير ان لو عدي 3 ايام من غير ماء برضه لونها يصفر بنسبة ما علي حسب العطش

يعني دي الفروق بينهم باختصار كل شخص بيختار الي تناسبه طبعا
في ناس مثلا عاوزين يعملو نجيلة علي الروف ومافيش اي صرف فا مش هينفع يبقي في ماء فا بيضطر يستخدم نجيلة صناعي
وكمان لو مكان ظل مستديم هيستخدم نجيلة صناعي

ولو عاوز رائي الشخصي
طبعا مافيش بعد الطبيعي كفاية الهواء الي بتتنفسه ولو انه محتاج بعض الرعاية بس اكيد مافيش احسن منه بس يبقي جودته كويسة ومزروع كويس

واي استفسار انا موجود :)

الموضوع ان شاء الله بسيط ومش معقد
الحديقة تتكون من
1- اشجار - اشجار زينة بتدي زهرة او بيكون شكلها جميل او بتدي ريحة جميلة وكمان داخل معاها نخيل الزينة الي شكلة كويس
2- شجيرات بتكون اقل من الاشجار في الطول وبيكلون ليها ازهار او شكلها مميز او بتدي رائحة جميلة
3- معمرات عشبية مزهرة او ذات الوان شكلها جميل -نباتات كده ممكن تشفها مزهرة ازهار جميلة او ليها الوان مبرقشة او محمرة مصفرة او داخلة في بعضيها او الورقة ليها شكل جمالي معين
4- مسطح اخضر او جروند كافر وده اسهل منة مفيش سعرة رخيص وبياخد جزء كبير من الحديقة وسعر المتر حسب الكمية وحسب النقل من ارضة ممكن يوصل ل 4 او 5 ج للمتر وهو حمول جدا بس مينفعش في مكان فيه ظل
5- بعض الديكورات البسيطة الي ممكن تتحط مع الزرع-ممكن كور مدورة فيها اسبوطات وممكن اشكال مضيئة اثنائ اليل
6- الاضائة - ممكن تحط اسبوطات في اماكن معينة في الزرع عشان بالليل تديك شكل جميل ومريح
7- متسلفات عشان لو عندك سور ممكن تحط علية نبات متسلق يحجب رؤية الناس الي برة عن السور الحديد الي انت حاطة وكمان هيديك ازهار جميلة او زيحه حلوة فية بيدي ريحة بالليل وفية بيدي ريحة بالنهار
8- شبكة الري وانت وامكانياتك ممكن يكون خرطوم يدوي وممكن رشاشات وممكن تخليها محابس يدوية او اوتماتيكية
9- كمان لو حبيت تعمل مشايات او شكل ديكوري معين من الرخام الي متعشق مع الظلط او اشكلال خري ممكن زي برجولات بطريقة معينة ممكن لو المساحة كبيرة
-------------------------------
انت وامكانياتك في الحديقة
يعين ممكن تكلفها حجات بسيطة وممكن تكلفها الي مالا تتخيلة
اما بالنسبة للرعاية
فيه بسيطة ومش عاويصة ممكن انت تعملها بنفسك
هتحتاج ماكينة قص نجيل لو المساحة كبيرة هتستخدم ماكينة بالبنزين او الكهرباء لو المساحة محدوده ممكن ماكينة قص يدوية
النجيل ممكن يتروي في الصيف يوم بعد يوم او كل ثلاث ايام علي حسب الجو
التسميد برحتك هو حمول ممكن تسمده مرتين او ثلاثة في السنة باسمده معدنية موجوده في كل حتة
الاشجار والشجيرات والمعمرات ملهاش احتياجات كتيرة تسميد خفيف ممكن مرتين في السنة او زي متحب لو عايز تزود مفيش مشكلة لانة هيديها قوة اكبر وحجم اكبر وعملةي القص والتقليم ودي بتكون كل سنة مرة او كل سنتين مرة مشك كتيرة
انا بشرح بالبلدي عشان محدش يقول الكلام عويص
انت ممكن تقوم بعمل كل هذه الاشياء بعتبار انها جننتك وانك مهتم بيها وكمان هي كائن حي بترعاه وتحافظ علية
او ممكن تتقاول مع جنيني يجيلك بالزيارة ويضبطلك الدنيا او انت ممكن تشتري الادوات وتقوم بعمل كل شيء علي سبيل الهواية
الموضوع اسهل منة مفيش بس عايز حب ورعاية مش اهمال زيها زي اي حاجة في البيت اعتبرها زي العربية بتاعتك
------------------------------------------------