الموضوع: الياريس اتخبطت ! الحمد لله

السلام عليكم ورحمة الله وبركاته

النهارده كان يوم جميل بصراحة من اول اليوم الواحد كان بيستعد لمقابلة احلى واغلى الناس اعضاء تويوتا وبقية اعضاء الاقسام التانية اللى كانو هينورنا

المقابلة كانت جميلة بصراحة واتجمعنا كلنا ونورها طبعا وجود ضيوفنا من اقسام "هيونداي - هوندا - نيسان "

لكن للاسف الحلو مابيكملش !

بعد ماخلصنا المقابلة وانا راجع بعد ميدان الساعة في اتجاهي لكوبري اكتوبر

كنت واخد الشمال ودايس وفجاءة بدون اي سابق انذار واحد راكب ماروتي تطلب معاه يغير حارته من الحارة الوسطى للحارة الشمال بدون اشارة وبدون مايبص في المرايا

انا جاي مجمع طبعا الفرامل ماجبتنيش خاصا انه كان ماشي براحة جدا يكاد يكون واقف !

لبست فيه مع الاسف

ركنت على جمب بعدها لقيته جاي

كان معاه زوجته واولاده وقف جمبي اول حاجة عملتها رحت مشاورله على المرايا الشمال وقلتله هي دي اخترعوها ليه ؟ ؟

قالي انت جاي قارص وانت يعني مش عارف ان فيه مطب ؟؟

قلتله حضرتك انا ماشي في حارتي وانت اللى رميت عليا فجاءة وحتى مادتنيش اشارة ومابصتش في المرايا

قالي انت راكب عربية فراملها توقفك بس انت اللى قارص وعارف ان فيه مطب !

قلتله بس انا ماشي في حارتي وانت اللى كاسر عليا

فجاءة وبدون اسباب لقيته نزل من العربية بتاعته واتعصب وقعد يزعق حسيت انه هيتخانق

وبيقول لو واحد من عيالي دول كان هصلحه حاجة الدنيا ومافيها ماكنتش هتعوضني عنهم واتنرفز جامد وبيزعق وصوته علي !

قلتله ربنا يخليهملك بس انت اللى رامي عليا حتى مادتنيش اشارة ولا حتى بصيت في المرايا

انت لو بصيت في المرايا كنت شفتني !

فضل مستمر في الزعيق ! انت جاي قارص وانت مش عارف ان فيه مطب ! يظهر انه لما لاقى المطب حب يتفادى المطب راح محول على الحارة بتاعتي ! وانا طبعا حارتي مكنش فيها مطب ولا حاجة هو مجرد الحارة اللى هو كان ماشي فيها كان الطريق مكسر !

بعد كدة لما لاقى انه بيزعق وانا مش برد عليه وبتكلم براحة اكني صعبت عليه راح قالي المهم انت كويس ؟ وراح مسلم عليا وقالي ابقى خد بالك بعد كدة وركب عربيته ومشي !

مش فاهم مين اللى المفروض ياخد باله ؟

الحمد لله على كل شئ

الخسائر عندي : الاكصدام اطبق وبعض الاجزاء اتقطعت ! ربنا يسهل وينفع تترد على البارد ولو ان القطع مش عارف هعمل فيه ايه !

الخسائر عنده : مركزتش مع عربيته بصراحة بس تقريبا الفانوس اتكسر ! او جايز كان مكسور من الاول الله واعلم !

الحمد لله على كل شئ وقدر الله ماشاء فعل