الموضوع: تجربتي مع مركز أس كار التابع لتأمين قناة السويس

انا من شهر تقريبا قولت اروق فيفي لنظرا لانها كانت متشحوره خرابيش في الاكصدامين وخبطه في الرفرف اليمين قولت ادخلها في التأمين اهو استفيد بيه لاني بقالي 3 سنين مطالبتهمش بحاجه وبيني وبينكم كنت مقلق علشان مكنتش أعرف اي معلومات عن مركز أس كار اللي تبع تأمين قناة السويس ده وكنت خايف الصراحه اعملها عندهم وكنت ناوي اعملها في التوكيل بس طبعا ما باليد حيله لاني مكنش معايا فلوس احاسب بيها التوكيل وبعدين أصرف مبلغ الشيك من التأمين وموال انا مش حمله

المهم سلمت امري لربنا واتكالت علي الله وروحت المركز وطبعا المركز منفي ورا القرية الزكيه المهم روحتلهم وهناك ناس محترمه جدا وبالاخص الاستاذ حماده مدير المركز هو اللي استقبل عربيتي واستلمها مني بالكامل وفحصها وشاف كل اللي هيتعمل فيها ووافق علي رش العربية حزام بدون السقف والكابوت والشنطه وتغيير الاكصدامين والرفرف اليمين والزجاج الامامي كان في شروخ وقالي انه هيغيره

واداني ميعاد بعد 15 يوم اجي استلم في العربية

المهم اتصلت بيه علشان استعجله شوية في العربية والحمد لله استلمتها بعد 12 يوم بس اجراءات التسليم هيه اللي روقتني لاني كان لازم اجيب جواب من شركة قناة السويس واطلع بيه علي كونتكت علشان اعتمده وبعدين علي المركز علشان استلم العربية المهم كانت تكلفة العربية 5350 جنيه انا سمعت الرقم ده من هنا وقلبي كان هيقف من هنا لاني كنت مأمن بنسبة تحمل 4 في الالف

المهم بعد طبعا عزاب علشان اوصل للمكان ده اللي ورا القرية الزكيه قابلت البشمهندس حماده مدير المركز واستلم مني الاوراق وانا قلبي كان هيقف من كتر الدق لاني كنت خايف اني الاقي العربية فيها مشاكل وقولت ربنا يستر المهم قالي استنا شوية العربية ببتغسل قولتله تمام المهم مفيش نص ساعة ولقيت فيفي في ثوبها الجديد ما شاء الله عليها ومصدقتش نفسي بصراحه لما شوفتها كأنت احلي 100 مره من يوم ما استلمتها زيرو والحمد لله حسيت ان كان عليا هم وانزاح المهم قولت هفليها حته حته لقيت الشنطة مبتفتحش غير بالفتاح قولت لاستاذ حماده بعت جاب واحد مفيش 5 دقائق ولقيت فني جه فتح الشنطه وشال الفيبر وخلي الشنطه ترجع تفتح تاني من السنتر الداخلي

انطباعي عن العربية الحمد لله راضي رضاء تام ولو ان اتعكنن عليا من اسبوع وواحد ابن حلال طلعلي من شارع جانبي ولبست في بوش العربية بس الحمد لله الخساير مش كبيرة

الحمد لله تكلفة العربية اللي دفعتها كانت 130 جنيه

ممكن يا باشا تشرحلى اكتر عن الموضوع بتاع التأمين ده
يعنى مثلا العربية اتخبطت كزا مرة و روحت عملتها و بدل متدفع اكتر من خمسة تلاف جنيه دفعت 130 جنيه بس؟؟؟! طب ازاى
اللى اعرفه ان التأمين بيغطى الحوادث بس و لازم يبقى فى محضر و معاينة وكلام من ده