عايز اخرج مراتي ........................... موضوع مفتوح للنزهات العائلية

**Ahmed A Rahman** · 19-03-2012 04:25 AM

مراتي بعد ما مر على الولادة اكتر من 3 شهور مبقتش قادرة تستحمل

فعلا انا عازرها, البنت تصحى الولد ينام والولد يصحى البنت تنام

قالت انها عايزه تخرج شوية عشان فعلا انا من اول جوازنا من 3 سنين مخرجناش غير 3 مرات مثلا

حنودي الاولاد عند حماتي في المعادي وننطلق

خلاصة الكلام :::

عاوز مكان قريب من كورنيش المعادي او النيل عموما

فيه اكل !!!! ده عشاني انا الطلب ده

الاكل يكون حلو
على رأي احمد خالد توفيق مش عايز مكان فيه ضفادع مشوية ولا انوف بالصلصة ولا عيون مقلوعة

شاعري

تقولوا على رينج اسعاره : ياللا مش مهم خليها تنبسط

لا يوجد به خمور

لا يوجد به هشك بشك يعني مش عايز مركب فيها استعراضات

عايز مكان مراتي تبص فيه على النيل وانا قاعد باكل من الآخر

وتكونوا مجربينه

**askoda** · 19-03-2012 08:08 AM

50% خصم على عرض حكاوي وسيرينو ، القاهرة في القاهرة | دير'ان'ديل

Check This Link and i Hope you'll like it
I Didn't try it before but i believe it will be a good one

**أبو صلاح** · 19-03-2012 08:26 AM

في فندق جراند حياة

المطعم الدوار

هيكلفك في حدود 600 ج ده اسعار قبل الثورة
دلوقتي اعتقد اقل

بس للاسف فيه تقديم خمور بس مش كتير على فكرة يعني الجو هادي
وممكن تخليهم يحجزولك مكان هادي

جد المطعم الدوَّار الرائع بالدور الحادي والأربعين (41)، وهو أعلى مطعم بالشرق الأوسط، حيث يطل على بانوراما نهر النيل الساحر. ويبلغ قطر المطعم الدوار 30 متراً، ويدور دورة كاملة (360°) كل 75 دقيقة، مما يوفر رؤية مباشرة تشمل الأهرامات والنيل ومدينة القاهرة . ويقدم هذا المطعم الفريد من نوعه ، مجموعة متنوعة من الأطباق الفرنسية يقوم العاملون في المطعم بإعدادها في المطبخ المفتوح ،

السعة: 160 مقعداً.
الحجز مسبقاً.
لا يسمح بدخول أطفال أقل من 12 عاماً (مع توافر خدمة جلساء أطفال).
المواعيد: من الساعة 7:00 مساءاً إلى1:00 صباحاً.

**charming** · 19-03-2012 08:29 AM

جزيرة المعادى اللى قصاد مستشفى القوات المسلحة فعلا مكان هيعجبك رسم الدخول 10 جنية للفرد اى مطعم جوة فية منيامم 25 جنية فية مطاعم كثير ومكان مريح جداا للاعصاب يعنى عشاء و مشاريب مش هيعدى 250 جنية

**yalahwy2010** · 19-03-2012 10:56 AM

المشاركة الأصلية كتبت بواسطة charming

جزيرة المعادى اللى قصاد مستشفى القوات المسلحة فعلا مكان هيعجبك رسم الدخول 10 جنية للفرد اى مطعم جوة فية منيامم 25 جنية فية مطاعم كثير ومكان مريح جداا للاعصاب يعنى عشاء و مشاريب مش هيعدى 250 جنية

أروح لجزيرة المعادى ازاى؟؟؟؟
يعنى وانا ماشى على الكورنيش.........وعلى شمالى المحكمة اللى شكلها حلو دى..........أكمل علطول......ولا أمشى ازاى؟؟؟
أنا نفسى فى مكان زى اللى كانوا بيقعدوا فيه الممثلين بتوع زمان.......عبد الحليم وفاتن حمامة ........
بيبقى على يمينهم النيل....وقاعدين على ترابيزات.....المهم الواحد يشوف النيل.....ويكون الجو هادى..........ومافيش شباب روش .....ولا أصوات عالية
هل ممكن ألاقى الحاجات دى فى جزيرة المعادى؟؟؟؟؟

**mesaharaty** · 19-03-2012 11:08 AM

عاوزين معلومات تفصيلية عن المكان بتاع جزيرة المعادى

**Donzi** · 19-03-2012 11:14 AM

النهر الخالد اللي قبل دار الاشغال العسكرية على كورنيش المعادي مكان نضيف جدااااااااااا و تابع للقوات المسلحة و محترم اوي ويوم الخميس و الجمعة بيبقى فيه زي تخت شرقي كدا بيغنوا اغاني قديمة بالعود و القانون و الناي و جو لطيف و المكان واسع و شيك جدا

الدخول تذكرة ب 10 جنيه و جوة بقى حسب الطلبات و الاكل كمان كويس