عايز أركب شاشات عرض في المخادع بتاعة الكراسي

**tommys** · 06-06-2008 03:16 PM

أنا أشتريت 3 شاشات عرض ماركة Sony وعايز أحط شاشة على الطبلون والأتنين التانيين في المخادع بتاعة الكراسي .. بس ماأعرفش مين متخصص في تركيب الشاشات دي في المخادع وتثبيتها كويس هل هو شغل سروجي ولاشغل مين ؟
ولو حد يعرف واحد بيعمل الشغل ده يدلني على واحد يكون نضيف في شغله لأن ألي هايشتغل هايقطع ويخرم في المخادع من ورا على أد الشاشة عشان يثبتها جوه المخدع ....... وشكرا جزيلا

**Hossam.Hamdy** · 06-06-2008 04:14 PM

اللى اعرفه ان المخادع بتتباع راكب فيها شاشه....جاهزه يعنى

**Ahmed Samy** · 06-06-2008 04:38 PM

العربية ايه الأول
علشان لو عربية جديدة ولا عالية

أحسنلك زي ما حسام قال انك تجيب المخدع اللي بشاشة و تحطه بدل مخدعك

و لو اشتريت الشاشات فعلا ........ اشتري مخدعين استيراد و قطع فيهم زي مانت عايز

و خلي بالك لو السروجي نص نص هايبوظلك المخدع

**tommys** · 06-06-2008 08:43 PM

ماأنا عارف إن في مخادع بتتباع بالشاشة ... بس هاتيجي تبص لماركة الشاشة هاتلاقيها ماركة تعبانة ومجهولة وأي كلام وصناعة صيني .. وأنا مابحبش أشتري أي حاجة كده وخلاص .. بهتم أوي للماركات المعروفة العالية كمان عشان كده أشتريت السوني هي غالية بس حاجات تعيش وتعمر وتنساها بخلاف الصيني ألي مالي السوق والغش التجاري \الي مالي السوق اليومين دول .... والغالي تمنه فيه وأنا عربيتي تويوتا كورولا وزي ماقال أحمد سامي هاشتري مخدعين أستيراد أصلي وركب فيهم الشاشات وفكرة جميلة قوي بدل ماأبوظ المخادع ألي عندي .... بس ناقص بقه \اعرف واحد خبير في موضع التركيبات و الشغل في المخادع .. ولو حد عنده فكره ياريت يقولي أروح لمين يركبهم بس في المخادع والباقي سهل عند أي محل تركيبات كاسيتات وسمعات وشاشات وأنا عارفهم كلهم ..... وشكرا وأسف للاطالة

**NaderNabil** · 06-06-2008 10:31 PM

انا شايف ان انت تعمل الشغل بنفسك احسن بكتير و انضف.....

لاقيتلك في منتدي أجنبي واحد عامل الحكاية دي في عربيته بشاشات سوني

المخدع بعد ما اتشال من العربية:

هاتجيب القاعدة اللي بتركب عليها الشاشة و تحطها علي المخدع و تحدد بقلم جاف علي الجلد عشان تعرف تقطع عليه

بس خد بالك انك هتحدد علي اساس القاعدة من تحت مش من فوق...عشان من تحت بتبقي أصغر

بعد كده هاتجيب كاتر أو سكينة حامية و تشيل الجزء الجلد أو القماش الأول و بعدين تبدأ تشيل الحشو اللي جوة...بس طبعا ما تتمماداش في ازالة الحشو عشان متلاقيش نفسك وصلت الناحية التانية:)

بعد كده تجيب حتة أبلاكاش أو MDFعلي نفس مقاس المربع بس أكبر سنة صغيرة عشان تسقطها جوه و تبقي مزنوقة جدا... و ممكن تحط غراء عليها عشان تمسك في الفوم....
هو هنا جايب قطعة بلاستيك بس مش هنلاقي زيها

بعد كده هاتجيب السلك و تحاول تدككه لحد ما ينزل من جنب الحديدة اللي شايلة المخدع

بعد كده هاتجيب القاعدة بتاعت الشاشة و تسقطها جوه الحفرة...و برده خلي أبعاد الحفرة تكون الي حد ما ضيقة عشان القاعدة تتزنق فيها كويس و تبان بروفيشونال

هاتجيب 4 مسامير برمه قصيرين علي قد ماتقدر وو تربطهم في حتة الخشب اللي ورا عشان يمسكو زي الحديد....بس خد بالك من طول المسمار عشان مايطلعش من الناحية التانية

ده بعد تركيب الشاشة

و ديه الصور بعد التركيب:

__________________________________

منقول بتصرف