الموضوع: أخيرا لمبة check engine في هيونداي elantra 2009 لازم كلة يعملها

السلام عليكم

من شهر كدة في المنتدى لقيت موضوع ان واحد زميلنا عمل موضوع لمبة ال check وانا من ساعت ما جبت العربية فعلا متضايق ان اللمبة مش موجودة ابص في الكتالوج الاقيها موجودة قولت لأ الموضوع فية انا

المهم الموضوع دة كان بيزن في دماغي جامد بس اللي كان مخوفني ان العربية جديدة قولت لحسن افك حاجة ابوظ الدنيا فنفضت للموضوع اسبوع تاني

مرة كنت اعد مستني واحد ووصلت بدري ساعتين فضلت اعد زهقان فجأة الموضوع ضرب في دماغي قولت خلاص اخليها على الله و ادوس

روحت جايب المفك الاسود رحت فاكك المسامير زي ما كان موجود في الموضوع اللي قريتة هنا في المنتدى

كل المسامير اتفكت تمام بس اللي كان رخم اوي الكليبسات اللي ما بين الدريكسيون و العدادات كنت بفكها حاجات بتقطق انا قولت انها تكسرت بس الحمد لله عدت

روحت شايلها وبدأت افك لوحة العداد و شيلت طبعا قبلها فيشة ال trip

المهم طبعا كنت شايل المفاتيح من الكونتاكت عشان انا عارف ان لوحة العدادات اليكترونية

روحت فاككها و جت الرخامة تاني ان الفيشتين واحدة سودة و التانية بيضا اللي ورا لوحة العدادات ماسكين جامد و مش بيتفكوا مع اني بدوس على الكليبسة بس خايف تتكسر في ايدي عشان انا عصبي

المهم اعدت كدة ريحت

و رجعت قولت بسم الله براحة يمين شمال يمنين شمال فكتهم بحرص شديد

الحمد لله كدة العدادات في ايدي

كان في بلاستيكة بيضا كبيرة من ورا فكيها براحة بقى كل حاجة قدامي

لقيت لمبتين روحت واخد بتاعة الاير باج و حطيتها مكان ال check

و جربتها قبل ما اقفل الشغل لقيتها منورة قولت الحمد لله

المهم قفلت كلة حاجة كان سهل جداا و انا كنت فرحان بصراحة ان الموضوع بسيط

و ربنا يكرم اللي الاخ اللي في المنتدى اللي قالي علية انا مش فاكر الموضوع الصراحة

دلوقتي كدة لمبة التشيك تنور اول ما ادور العربية تفضل شغالة ثانية كدة و تطفى


الغريب بقى انا نفسي اعرف غبور باشا دة محطهاش لية مع انها لمبة عبيطة هل عشان الاعطال تتراكم و تدفع فلوس اكتر و لا دة الشركة ما نزلتش فيا لمبة اكيد هي صدفة مش اكتر




و دة صورة للعدادات بعد التعديل و لو في حد عايز يسأل على حاجة انا في الخدمة

و تفضلوووووا




Uploaded with ImageShack.us

المشاركة الأصلية كتبت بواسطة ah_bodo511

هي اللمبه دي مش موجوده في النترا 2007 ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

موجود المكان بتاعها و الكمبيوتر كمان موجود لكن اللمبة نفسها بربع جنية مش موجودة

اللي معدندوش ايرباج في العربية ممكن ياخد اللمبة بتاعت الايرباج و يحطها في مكان لمبة ال check اللي احنا عايزينها لكن لو عندنا اير باج ممكن نشتري لمبة زي بتاعتها بالظبط

بالتوفيق