تجربة الاوسرام نايت بريكر في 128 في اسكندرية !~

**gaaz** · 30-03-2012 12:01 AM

واخيرا والحمدلله من بعد طول انتظار ولف ودوران واتصالات تلفونات ومحاولات سفرات للقاهرات

تم العثور على الاوسرام نايت بريكر وتم تركيبه في محروسة

واثناء هذه القصة اكتشفت عده اكتشافات

1) اولا اكتشفت اني اتضحك عليه بعلمي لأني عارف ان اللمض سعرها ما يعديش مية او مية وعشرين بالكتير ولما الراجل قالي 140 دفعتله على طول لأني كان نفسي فيها الصراحة ولو كان قالي ميتين مكنتش حقول لأ

2) انا ركبتها الصبح او العصر يعني وفضلت الف الف عشان ييجي الليل واشوف نورها عامل ازاي

بس للأسف الجوع جع قبل ما الليل ييجي
روحت كارفور اكلت سندوتش وطلعت لقيت الدنيا ضلمة
وانا في البارك اذ بيه بفتح السمكة !! لفيت بوستر لأبو اسماعيل !!
قصدي بفتح الكونتاك وبجرب النور واذا بخيبة الامل
بعد ربع ساعه اكتشفت ان خيبة الامل كان مصدرها اني كنت متوقع اني لما افتح النور العالي وانا في البارك العربيات اللي قدامي كلها حتولع او حتدوب من قوة الاوسرام
يبدو اني كنت مبالغ في قوتها
بس هي احسن بكتير من اللمض اللي كانو عندي مش كتير اوي بس اهي احسن وخلاص
يوووه بقى احسن قولنا بقى حرام عليكم خلوني احلل المية واربعين جندي هههههه
اكتشفت اكتشاف كمان ان الفانوس عندي مكسور وجواه رملة ومية وحاجات زي العسل وكمان الكليبس بتاعه مكسور فبيلق وبيتحرك وحاجة زي الفل برضووو
لو حد يعرف فوانيس الدبابة تركب عندي ولا لأ يا ريت يقولي
وياريت يقولي طريقة تركيبهم واجيبهم منين اصلا وهل حيفرقو في الاضاءة ولا لأ ؟

**amoor89** · 30-03-2012 12:11 AM

اعتقد لازم كتاوت عشان يدوك اضائة مرضية + واضح ان الفوانيس متبهدله عند حضرتك فلو غيرتهم هتفرق جدا معاك حتى لو كنت مركب لمبات عادية
تحياتى

**gaaz** · 30-03-2012 12:29 AM

اعتقد لازم كتاوت عشان يدوك اضائة مرضية + واضح ان الفوانيس متبهدله عند حضرتك فلو غيرتهم هتفرق جدا معاك حتى لو كنت مركب لمبات عادية

والله يا باشا المفروض ان الميزة الوحيدة في الاورسرام انها بتركب من غير كتاوت وعشان كده هي غليت ووصلت للسعر ده
من ناحية موضوع الفوانيس هو فانوس واحد بس اللي مكسور التاني شغال مفيهوش مشكلة
بس انا بسأل الكريستال حيفرق كم في المية ؟

**misoalex** · 31-03-2012 04:18 AM

بص كان فيه واحد عاوز يدينى جوز فوانيس كريستال لل 128 مش بتوع دبابه بتوع 128 كان عاوز يبيعهملى ب 75 جنيه

بتوع الدبابه موجودين فى الساعه وفى عزبه سعد ب 60 جنيه تقريبا

**gaaz** · 31-03-2012 05:00 PM

مش موجودين في عزبة سعد يا ميسوو
انا لسه سائل اول امبارح
ولو لسه موجودين الكرستاله اللي معروضين عليك ياريت تقولي

**Ghamrawy** · 31-03-2012 05:42 PM

يا باشا ظبط الكشاف الاول
بس قولى انت لقيتهم فين فى اسكندرية ؟

**misoalex** · 31-03-2012 10:33 PM

لا بتوع ال 128 دول اكيد اتباعو لانهم من فتره

هات بتوع الدبابه فيه كذا واحد ركبهم وبيشكر فيهم

**gaaz** · 01-04-2012 12:19 AM

لفيت عليهم عزبة سعد مش لاقيهم

**mody_mt2007** · 01-04-2012 11:57 AM

غير الفوانيس و هتلاقى الأضائة افضل بمراحل و ياريت تجيب الفوانيس الكريستال افضل

**gaaz** · 01-04-2012 12:03 PM

بس قولى انت لقيتهم فين فى اسكندرية ؟

في مكان اسمه مركز صيانه السيارات عند الموقف
وانت نازل من الكبري ورايح الموقف تاخد اول يوترن جمب اول بنزينه تقابلك
حتلافي البنزينه زحمة اوي عشان فيها سولار تقريبا
ملكش دعوة بالبنزينة اسأل على باش مهندس حسام هناك شاب ابن حلال وجدع جدا وناس محترمه الصراحة وبتتااخذ فاتورة مطبوعه بالخاجات اللي تشتريها