الموضوع: قانون بنى ادم ............ و قانون بنى كيميا ....

عنوان غريب ... صح .... انا كنت فاكر كده زيكم بالظبط لما تقروا الباقى هتفهموا ........
امبارح و انا مروح ....سايق الاتمومبيل فى امان الله .... و ماشى لا بيا و لا عليا .... الاقى الموبايل بيرن و الاقى عبارة البيت على شاشه المحمول ..
عادى جدا ... بتحصل لكل الناس ... ثم التقت الهاتف من البوكيت اللى متعلق فى التابلو و ترددت كثيرا قبل ان ارد ... ثم اتخذت القرار ورديت ....
و اثناء ذلك لم انتبة لوجود مطب غلس شبه العربيه البيتلز .. فى الطريق ... و لم استطع الوقوف .... المهم اكلت المطب ...ثم شعرت بزلزال فى السيارة و راسى ضربت فى السقف .... و شعرت بأن هناك عصافير تلف حول راسى ... و فى محاوله يائسة منى لاستعاده التوازن ....جائنى سؤال عبر المحمول .. افقدنى الوعى تماما .... و هو .. انت قبضت ولا لسه ؟؟؟
المهم ... لما دماغى ضربت فى السقف ... شعرت بأن هناك افكارا و مواضيع و مفاهيم انسكبت من راسى و اختلطت ببعض مكونه مزيجا متجانسا من المتناقضات .... دعونى احاول ان اتناولها معكم خلال هذا المقال ...........
كل منا درس مادة الكيميا و ماده الفيزيا و قوانين الطبيعه و العناصر الكيميائية .و ايضا المعادلات الحسابية ... فكل مركب كيمائى له خواص ثابته اذا ما تم اضافته الى مركب اخر سيعطى نتيجه ثابته و حتمية الحدوث .. مثلها مثل الاقام و المعادلات الحسابية ... فمثلا( 1 +9=10 ) ( 2*3 =6 )
و هكذا ... فهذا القانون مريح ... و ثابت و نتائجه متوقعه و معروفه مسبقا .... يعنى مثلا فى المعادله الاولى السابقه 1+9=10 يعنى لازم يساوى 10
مجتش التسعه مثلا قالت لا انا تمانيه.. و اضريت اكدب عليكم و اقول انا تسعه علشان اكبر نفسى شويه ... ولا الواحد قال اصل انا كنت صفر و اتمطيت غصب عنى بقيت واحد ..... ولا عنصر الاكسجين اتخانق مع ثانى اكسيد الكربون و سابله المكان و طفش و سابنا احنا نتخنق و نموت ...
معايا ... نيجى بقى للعلاقات الانسانيه و الاجتماعية ..... فحدث ولا حرج ....
فكل انسان منا نشأ و بداخله موروثات ثقافيه و اجتماعية و نفسية تجعله منظمومه قائمه بذاتها ... يحتاج الى كتالوج ... علشان تعرف تتعامل معاه
افكار غريبه و مريبه و شنيعه و فظيعه ... يعنى ممكن تقول لواحد صباح الخير : يرد و يقولك : صباح النور على عيونك يا جميل .. و كمان يقولها و هو بيرقصلك حواجبه ... و ممكن تقول نفس العبارة لواحدة نازله معاك فى الاسانسير : تلاقيها بتبصلك من فوق لتحت كانك شتمتها بأمها اللى لسه ميته امبارح ... يا سبحان الله ... مع ان هى هى نفس الكلمه ...لكن رد الفعل مختلف ... واحد محترم و متعلم و من بيت اصول يروح يتقدم لواحدة برضه متعلمه و محترمه و من عيله مأصله و ترفضه !!!!!! طب ليه يا ستى كده ؟؟ ده عريس لقطه ... تقولك لا اصل كميتنا مش متظبته مع بعض !!! يا ستى انهى كيميا ... ده الكيميا بريئه منكم .... حتى احنا العادييين لما تقعد تتفرج على فيلم و يبقى البطل حرامى و نصاب و قتال قتله و ابن ستين فى سبعين و لما ييجى البوليس يمسكه ... تلاقى نفسك عاوزة يهرب ... ليه يا عم كده .. هو مش قدامك موت البطله ... و ضرب ابوة .. و راح تاجر فى المخدرات
وشويه شويه هيروح يقتل المخرج ... تبقى عاوزة يهرب ... مع انك اصلا مواطن ملتزم بالقانون ... يعنى شيىء غريب
حتى على المستوى الشخصى ... ممكن تقبل كلمه فى ظروف معينه من شخص معين .... و تقفش مع نفس الشخص بسبب نفس الكلمه فى ظرف اخر ..
حتى فى جسم الانسان ....عارفين ... و اللى هياكدوا كلامى ده الاخوة الصيادله فى المنتدى .... الادويه اللى احنا بنتعطاها عمال على بطال ....
تعتمد اساسا فكرة الادويه على المستقبلات ... يعنى فيه مستقبلات فى جسم الانسان لما تزيد او يتواجد مده معينه داخل الجسم تقوم تلك المستقبلات بعمل وظيفه معينه داخل الجسم ...... يعنى اللى عنده صداع مثلا ... بياخد دواء للصداع .. تقوم المعدة بأمتصاص هذا الدواء ليصل الى تركيز معين فى الدم ثم يوثر على المستقبلات لهذة الماده فتقوم بتخفيف الالم او ازالته تماما ......
و على هذا الاساس ... لابد ان نؤكد على فكرة المستقبلات ده فى العلاقات الاجتماعيه ..........و الله بتكلم بجد ... مش تهريج ....
يعنى لابد ان يكون لدينا مستقبلات اجتماعيه سليمه و غير مشوشه لكل العلاقات بيننا و بين الناس حتى نتعايش بشكل افضل .....
مثلا .... لما واحد يقف لبنت مثلا لما تعدى الشارع ... لا تنظر اليه شزرا ولا تبصله من فوق لتحت ... يعنى لو كان فرمها تحت الكاوتش و دعك وشها فى الاسفلت مكانتش هتبصله كده ...... لازم المستقبلات تقولها الراجل ده عمل كده علشان انتى انسانه ضعيفة و مش حمل جرى و مخاطرة فى تعديه الشارع بحكم تكوينك الجسمانى و النفسى ايضا ... فأذن هو يستحق الشكر ........
لما يجيلك واحد و يقولك شوفلى معاك مييايه سلف .... متجيش تقوله بوس ايديه الاول ... يقولك ابوس ايدك علشان مييايه سلف .. هترد عليه و تقوله ما انا هبوس رجلك علشان اخدها تانى ...... لازم تقدر انه مزنوق و قطعها انت معرض للموقف ده و لو معاك اديهمله و هو كمان لازم يشكرك على كده ....
مثلا ...تقرا موضوع مخالف تماما لوجه نظرك و فكرك و عقليتك ... و تلاقى نفسك عاوز تقوم تهبش فيه و ترزعه شبشبين على ودانه .... ليه يعنى كده ... اكيد عندك المستقبلات فيها مشكله ... المستقبلات السليمه تقول : اه وجهه نظر ... لابد ان تحترم .. و اناقشه فيها على اعتبار اننا نمتلك مستقبلات اجتماعيه سليمه و غير مشوشه .....
لما يحصل لزميلك مشكله ما خارج العمل ... و تتصل بيه تتطمن علية ... يرد و يقولك ... اه اصله من النبر بتاعكم ... كله من القر ... الناس عندك عينيها مدورة .... ؟؟ يعنى ايه عينها مدورة ... !!! يعنى انت عاوز الناس تبقى عنيها سمبكسه مثلا ... ده واحد برضه عنده مشكله فى المستقبلات
المفروض يقول : فعلا متشكرين اوى انك بتتصل بيه .... و مش عارف اقولك ايه .... فعلا الصديق و قت الضيق ...

لما تشوف اعلان فى التليفزيون بتاع معجون حلاقة و تلاقى واحده صاروخ عابر للقارت و اقفه جنب الراجل اللى بيحلق دقنه ... وتروح تشترى الكريم ده ... اعرف انك محتاج الى مراجعه المستقبلات ...



لما تتشنج و تنفعل على واحد صاحبك و زميلك علشان انت عارف انه بيحبك و ممكن يستحملك ... و تعامل واحد سمج و مستفز لمجرد انه مديرك فى الشغل او زبون عندك ... يبقى انت محتاج لمراجعه المستقبلات .....


نحن نحتاج يا ساده الى مستقبلات اجتماعيه سليمه ... مبدأها توسم الخير فى الناس و ترك سوء النيه فى التعامل و الالتزام بقاعدة ان كل الناس كويسين الا ان يثبت العكس حتى نحيا حياة اجتماعية سليمه او على الاقل نكون مثل العناصر الكيميائيه .......