هتجنن هو انا صح ولا هو اللى صح

**smsm_cato** · 02-04-2012 02:19 PM

انا راكن عربيتى من 10 ايام بسبب ان الفرامل بايظة وقولت استنى القبض علشان اظبط الفرامل فى الاربع عجلات واغير التيل كله المهم بروح الشغل مواصلات امبارح ركبت مع واحد بعربية نص نقل اللى هى الدبابة كان فى حادثة على الطريق عندنا عربيتين تريلا لابسين فى وش بعض ومتبهدلين ففتحنا سيرة السرعة والحوادث فى وسط الكلام اتكلمنا على جرى العربيات النقل الكبيرة وعدم اهتمامهم بالبشر اللى حوليهم فبقولة انت هتقولى انا ببقى راكب العربية بتاعتى وخصوصا لو الوقت متأخر بالليل بشوفهم طايرين ممكن ابقى ماشى على 120-130 وهو يعدينى قالى لأ هو بيبقى ماشى على 90-100 بالكتير قولتلة ازاى يعنى يعدينى وانا ماشى على 130 وهو يبقى على 90 طيب تيجى ازاى قالى علشان هو كاوتشة كبير قولتلة طيب ودى ايه علاقتها قالى يعنى انت مقاس كاوتشك 13 وهو ممكن يعدى 47 فرق قطر العجلة بيفرق قولتلة انا على حد معلوماتى الامبير بتاع عداد السرعة بيتظبط على مقاس الكاوتش الاستاندر يعنى امبير الملاكى ابو كاوتش صغير غير امبير النقل ابو كاوتش كبير ومن ناحية ثانية السرعة بتتقاس بين نقطتين زى اجهزة الجى بى اس بيحسب انت تجاوزت من النقطة الاولى للنقطة الثانية فى قد ايه وبالتالى بيحسب سرعتك يبقى عايزنى اقتنع ازاى انى ابقى ماشى على 130 وهو على 90 قالى صدقنى اللى بقولهولك هو الصح انا كنت ماشى بعربيتى ومعايا ابن خالتى بعربيتة نقل ولما نزلنا من العربيات بقولة انت كنت ماشى 120 قالى لا انا ماشى 90 قولتلة انت بوظتلى معلوماتى خالص فيا ترى هو اللى صح ولا انا اللى صح انا هتجنن من امبارح عمال اجيبها يمين وشمال مش عايزة تظبط فى دماغى خالص

**Elawany13** · 02-04-2012 02:22 PM

هههههههههههههههههههههه
مع احترامى لسواق النصف نقل
اعتقد انه كلام عبيط وجهل لا مؤاخذه

**corsair** · 02-04-2012 02:59 PM

انا سوقت عربية فانتوم نقل بمقطورة ومفيش الكلام ده خالص الامبير بتاع العربية متظبط علي مقاس الكاوتش والا كنت بعت الفيرنا واشتريت نقل وافتح بقا علي الخامس

**SaimOnatoR** · 02-04-2012 03:02 PM

عجلة إيه و نصف قطر دايرة إيه ، الله يرحمك يا عم نيوتن لو كنت تعرف إن الكلام دة هيتقال كنت سيبت قوانين الحركة و السرعة و إشتغلت عجلاتي.
على كدة بقى الرادار بيقفشني على 120 ظلم عشان أنا جنوط عربيتي 14 طيب ما اجنط 16 و ابقى ماشي 100 و في السليم، رحمتك يااااااااااارب.
نصيحتي لأخويا صاحب الموضوع، بطل تركب مع الراجل دة تاني إنت أكيد ليك ناس بتحبك و عايزاك فبلاش تضيع عمرك هدر.

**tutankhamoun** · 02-04-2012 03:11 PM

يا سلام على الفتي المصري الأصيل
ده بقى المصري اللي لا يمكن يقولك ما عرفش ........ قاعد يفتي و يقولك قُطر و مش قُطر
يبقى بقى على كدا بتوع مرسيدس و سكانيا حميـــــــــــــر وش و هو اللي صح .
أنت طبعا صح يا فندم ........ و الأشكال دي أصلا ما ينفعش معاها الحوار في لحاجات اللي زي دي
بس أنت مش شايف أن 120 و 110 على الطرق الزراعية كتير !!

أرحمنا يارب من فتي الشعب المصري