الموضوع: تـم انجـآز المهمه والانتهاء من صيانه كامله لنيسان صني .. تقرير شامل بالصور والاسعار

والحمدلله خلصت وكان عندي الزجاج الامامي مشروخ وانا مكنتش ناوي اغيره صراحه بس السمكري قالي يعني جت على ده هههههه خلي وش العربيه ينور واتفقت مع عم احمد بتاع الزجاج الي جنب السمكري على طول وجابلي تاني يوم زجاج من مصنع جريش وركبهولي
بس طبعاً تركيبه مش تمام وندمت اني مركبتش في المصنع .. بس بسيطه الحمدلله
وآدي عم احمد بيركب (:






----------------------------------------------------------

وبعد كدا الحمدلله خدت عربيتي ورحت اكمل عفشه وماتور ..
اول حاجه رحت لعم ربيع ركبلي الطنابير والتيل الجديد و ركبلي قواعد الماتور كمان
وعلى ما هوا يركب دول رحت انا اشتريت المساعدين الجداد (اماميين ياباني) وجتلو
وبعد ما فك المساعدين القدام قالي المساعدين ممتازين تغيرهم ليه ؟ هاتلهم جلب بس ورجع الجداد
وعمل زي ما قالي فعلا ربنا يكرمه .. وطلع معايا ظبطنا زوايا واتظبطط بالشعره احمدك يارب واختفت الحدفه الشمال نهاآآآآآآآآئياً .. ودي صورة عم ربيع وهوا شغال





بعد ما عم ربيع خلص اداني الطنابير والتيل القدااام .. بس اتفاجئت ان التيل الكوري الي كنت مركبه وعملت بيه اكتر من 12000 كان شكله كدا ( محتفظ بشكله ) مع اني وانا بشتريه صاحب قطع الغيار قالي ده صلاححيته 10000 بس وغيره




المهم طلعت انا وعم ربيع خدني لميكانيكي كمان جنبو غيرنا السيور كانت تالفه تماماً مع اني مشتريها من التوكيل وعمرها سنه ونص فقط .. وركبت السيور الجديده
وجه دور البوجيهات قلت للميكانيكي (البوجيهات عندي راكبه من 2005 وعامله 150000) بصلي بصه كدا والله يا جماعه مش عارف اوصفها بس هيا بصه قبيحه الله يسامحه وكأنه شتمني هههههه وقالي يا ظالم ومستني ايه ؟ كمل بيهم الـ 200 الف احسن :D هههههه
وبعدين علق على البوجيه قالي البوجيه ده طويل مش بتاع صني اصلن قتله ده الي جاي معاها وهيا زيرو هتعرف اكتر منهم (في سري) قالي خد البوجيه وروح هات زيه وحصل
ودي صورة البوجيه القديم .. (على فكره شغالين مش هرميهم )




----------------------------------------------------------

وبكدا خلصت العربيه كان ناقص بقى شوية حاجات بسيطه كدا بقى كماليات :D
طلعت على اقرب واحد بتاع فرش خليته يشيل الكسوة القديمه لان كان شكلها قبيح جدا وبعد شهر ونص العربيه مع صنايعيه بقى شكل الفرش اقبح .. الفرش الاصلي طبعا بقى شيك جدا
وبقيت مبسوط بشكله .. واشتريت طقم دواسات جلد للأرضيه عشان تكمل




----------------------------------------------------------
وطبعا منستكمش حبآيبي .. قلت اخد العربيه بقى اغسلها اروقها عشان اصورها لعيون صقور نيسان











وخدتها على المغسله غسلتها .. وبعدين طلعت على باركنج مول رايق كدا عشان اصورهالكو
الطريف في الموضوع اني بعد ما خلصت تصوير اكتشفت ان مفاتيحي في العربيه والعربيه مقفولة
وتلفوني ومحفظتي وكل اوراقي في العربيه ... وشوية اتلمو السكيوريتي بتوع المول ومشرف الامن ولمه ظريفه حوليه ..
هيا عربيتك ؟ ااه عربيتي .. طيب بطاقتك ؟ ممعيش .. طيب رخصه العربيه ؟ ممعيش .. طيب والحل ؟ قلتلهم عربيتي وهجيب واحد يفتحها واوراقي جوا .. وفعلا كلمت عامل في جراش الجامعه عندي كان فتحالي مره وجه وخلال 3 دقائق فتحها .. ومشرف الامن استدعاني لتوقيع تعهد بأني انا صاحب السياره وانا الي طلبت فتحها بطريقه غير شرعيه والخ ... الاطرف بقى اني طلعت لقيت
الواد بتاع الجراش اختفى .. تاني يوم قابلته في الجامعه قلتلو انت رحت فين مخدتش حسابك قالي انا خفت لقيت امن ومأمنش فخلعت هههههه .. رغيب كتير .. نيجي للصور .. اتفضلو وسمو الله






























في النهايه .. انا سعيد جداً بالنتيجه الي وصلت ليها لاني كنت فاقد الامل وكاره العربيه
بس مع منظرها الحالي بقيت مرتحلها نفسيها وحبيتها اكتر والله لما ظبط العفشه وقواعد الماتور
حسيت العربيه اهدى كتير ويا سلام لما تسيب الطاره وتلاقي العربيه ماشيه في حارتها
كل دي حاجات كنت محروح منهاااااا ..

بخصوص قطع الغياره اقيمها 8 من 10
السمكري 10 من 10
شغل البويه والرش 9 من 10
الكهربائي 6.5 من 10
العفشجي 9 من 10

*اسعار وتكلفة قطع الغيار :
- طقم مقصات اماميه اصليه بسعر 1200 جنيه بالتركيب (الشيء الوحيد الي تم تغيره في التوكيل)
- 2 اكصدام تايواني امامي وخلفي بسعر 245 لكل واحد
- رفرف شمال تايواني بـ 145 جنيه
- كبوت تايواني بـ 465
- 3 كرتيرات تايواني بسعر 30 للواحده
- طقم باكيتات سوبر صالون (ياباني) للابواب تم التوصيه عليه واستلامه بعد اسبوعين بسعر 225 الطقم كله
- عمه ماتور (صيني) بسعر 165 جنيه
- 2 فانوس امامي ماركه DEPO تايواني بسعر 225 للواحد
- 1 فانوس خلفي ماركه DEPO تايواني بسعر 170 جنيه
- طقم مساحات بسعر 20 جنيه
- مرايه يمين ياباني بسعر 40 جنيه
- طقم طنابير اماميه (ياباني) بـ 420 جنيه
- طقم تيل فرامل امامي ماركه GOLD كوري بـ 70 جنيه
- طقم بوجيهات ياباني بـ 110 جنيه
- طقم سيور ياباني ( عدد 2 سير ) الكبير بـ 55 جنيه والرفيع بـ 30 جنيه
- قاعده ماتور تايواني اماميه بـ 85 جنيه وقاعده خلفيه بـ 65
- كلاكس صيني بـ 100 جنيه (رآآآآآآئع)
- ليدات صالون صيني بـ 15 جنيه
- طقم نواكل للباب صيني بـ 65
- طقم علامات نيسان وكلمه نيسان بـ 30 جنيه ما عدا كلمه EXsalon
-طقم دواسات جلد 50 جنيه
-طقم طاسات (مصري) بـ 65 جنيه

اجمالي تكلفه الصيانه وقطع الغيار شامله التركيب والمصنعيه 7150
غير شامله بقى مواصلاتي رايح جاي من اكتوبر لحد الجيزه يوم و يوم تقريباً :D
بالأضافه لـ 2450 جنيه سعر ( 4 فرد كاوتش بيرجستون )


NOTE : كان بإمكاني اشيل الرقم بس مش مقتنع بأي سبب من الاسباب بالحركه دي
يا جمآعه الموضوع خد مني وقت ومجهود فكري اكتر من اني صورت وعملت ..

فياريت يجي بفايده واشوف تفاعل منكم وجزاكم الله خير وموعدنا 6 - 4 - 2012 بأذن الله

ايوه كده رجعت شباب تانى و ربنا يباركلك فيها. على فكره الموضوع ده ييوضح كمان الفرق بين العربيات اليابانى و الكورى على الصينى . الصينى و الكورى مهما اتجدد ما يرجعش زيرو تانى و ان فاتك اليابانى مش هيرجع تانى.

ما شاء الله تقرير روعه بجد وربنا يباركلك فيها زي ما انت تعبت فيها اوي كده