بيكانتو 2012

**trinity** · 06-04-2012 01:09 AM

الحمد لله قمت بشراء بيكانتو 2012 مانيوال و هي اول سياره لي
سياره جميييييييله جدا و انا من عشاقها
و لكن عندي مشكله في الفتيس تظهر عند اختيار السرعه الخلفيه فبيعمل صوت او ممكن ماييتعشقش في مكانه الا لما اقعد اشيل رجلي و احطها ع الدبرياج لحد ما يعشق
و ساعات اما بانقل من سرعه لسرعه و انا ماشيه بيحصل نفس الموضوع فهو ما بينقلش بسهوله
قمت بسؤال المختصين في التوكيل عند عمل صيانة ال1000 فقالوا مافيهاش حاجه و قاسوا زيت الفتيس لقوه تمام انا محتاره و مش عارفه ايه ده سامحوا قلة خبرتي و سعيده للمشاركه في هذا المنتدي العملاق

**maruti** · 06-04-2012 01:17 AM

اولا الف مليون مبروك
متقلقيش حضرتك هوا في الاول كدا علشان العربية جديدة لكن مع كتر الاستعمال هتلاقي الفتيس بقا ناعم معاكي
كان بيحصل معايا كدا اول مجبت العربية وبعد فترا بقا كويس

**trinity** · 06-04-2012 01:33 AM

شكرا علي اهتمامك
ده فيه ناس قالوا لي اني مابدوسش ع الدبرياج جامد و دخلوني في قلق اني كده هابوظ الاسطوانه و ان ده هو السبب بس انا متاكده اني باجيبه لاخر

**maruti** · 06-04-2012 01:52 AM

المشاركة الأصلية كتبت بواسطة trinity

شكرا علي اهتمامك
ده فيه ناس قالوا لي اني مابدوسش ع الدبرياج جامد و دخلوني في قلق اني كده هابوظ الاسطوانه و ان ده هو السبب بس انا متاكده اني باجيبه لاخر

العفو لا شكر على واجب

لو حضرتك متاكدة انك بتدوسي دبرياج على الاخر يبقى زي ما بقولك علشان لسا جديد فا بتحسي انو تقيل ومع الوقت هيتحسن ان شاء الله
وتحت امرك في اي سوئال

**S O P H O S** · 06-04-2012 04:10 AM

الف مبروك
ربنا يباركلك فيها

**dodo77** · 12-04-2012 11:40 PM

مبروك عليكى العربية وربنا يحفظ طريقك ادعيلى بقى لانى ناوية ان شاء الله اجبها بس جبتيها لون ايه اصلى محتارة فى لونها

**trinity** · 14-04-2012 12:48 AM

المشاركة الأصلية كتبت بواسطة dodo77

مبروك عليكى العربية وربنا يحفظ طريقك ادعيلى بقى لانى ناوية ان شاء الله اجبها بس جبتيها لون ايه اصلى محتارة فى لونها

انا جبت السماوي بتاعها و علي فكره هو مش فاتح زي السماوي اللي احناا عارفينه هو درجه اغمق بس مميزه جدا جدا و تخطف الانظار من جمالها ابعدي عن الاسمر لانه مصغرها قوي و النبيتي بتاعها انا كنت هاموت و اجيبه بس ايامها ماكانش نازل النبيتي فول اوبشن بس هو نزل دلوقتي اما عن السيلفر و النحاسي ( الذهبي ) فانا اعتبرهم الوان حياديه لا تصلح للعربيات الصغيره و خصوصا ان البيكانتو الجديده روشه قوي فنصيحتي فاضلي بين الاحمر و السماوي و كمان احب اضيف ان السماوي مبين جمال الكشافات بدرجه رهيييييييييييييييييبه سواء الاماميه او الخلفيه

**Donzi** · 16-04-2012 03:12 AM

الف مبروك عليكي و ربنا يباركلك فيها و يكفيكي شرها ان شاء الله

و ماتقلقيش من حكاية الفتيس دي لانك لسة مش متعودة عالعربية و العربية مكنتها لسة جديدة و بعد شوية هاتاخدو على بعض وتبقوا سمنة على عسل ان شاء الله

عاوزينك تشاركي معانا في القسم بقى و تعملي تقارير عن العربية و تنورينا بمشاركاتك

**الغزالى** · 16-04-2012 03:31 AM

لا .. مش عادى يا جماعه ... الصوت الى بيظهر مع حضرتك ده .. لما تيجى تنقلى الغيار بتسمعى صوت الترس وهوا بيتعشق ولا صوت حاجه محشوره والفتيس مبيرداش يتحرك .. وبعد كده نتكلم فى عادى او مش عادى