الموضوع: تقسيط اللوجان اتوماتيك مع بنك ناصر

المشاركة الأصلية كتبت بواسطة treeka84

انا عايز اقسط لوجان اتوماتيك من التوكيل فعندى استفسار
بنك ناصر قالى هات عرض اسعار وادفع المقدم عندنا وختاخد شيك للمعرض وتستلم منه طيب هنا تظهر المشكله الاهم اساسا حجز العربيه فى التوكيل بيقعد اربع شهور وضعى هيبقى ايه يعنى هادى الشيك للتوكيل واستنى اما ابقى استلم ولا الموضوع هيمشى ازاى

بص ياباشا

انا لسه جايب اللوجان امبارح الحمد لله ومقسط مع بنك ناصر بردو وانا هقولك تعمل ايه بالضبط:

اولا : مش لازم تشترى من الوكيل - انت ممكن تسأل عند السبع اوتوموتيف وعند محمد زكى دول موزعين معتمدين لدى رينو بس محمد زكى مرضيش يدينى العربية تقسيط بيبعها كاش بس بـ 79000 يعنى زى الوكيل بالضبط بس المشكلة انه كاش بس, فعليك وعلى السبع هتلاقى ان شاء الله العربية بـ 81000 او 80000 حسب العدد اللى موجود ولو خلصت ان شاء الله بيجيلهم دفعات تانية كل شوية وانا سمعت ان على شهر 7 اللى جاى سعر العربية هيستقر وهتكون متوفرة عشان المغرب لسه بتركب الموتور والفتيس الاوتوماتيك فدا تقريبا بياخد وقت بس لو انت مستعجل يبقى تعمل اللى قلتلك عليه.

خطوات التقسيط مع بنك ناصر كالأتى:
1- تروح معرض وتحجز عنده العربية بمبلغ بسيط حسب المعرض (من 500جنيه - 3000جنيه) وتتفق معاه انه يحجزهالك لحد ماتخلص اجراءات البنك ولو عندك عربية قديمة هتبيعاها او كده.
2- تاخد من المعرض عرض سعر بالعربية بأسمك موجه لبنك ناصر (الفرع اللى انت هتقسط معاه) الفروع عندهم بتفرق (انا مش عارف ليه).
3- تاخد عرض السعر وتروح على البنك وتتفق معاه على المقدم وعدد الاقساط وقيمة القسط وطبعا لو فى ضامن او بمفردات مرتبك او الاتنين مع بعض حسب طبيعة عملك وماتنساش تجيب (الرقم التأمينى) وده بتجيبوا من اقرب مكتب تأمينات ومافيهوش مشكلة بتروح المكتب وتأخد معاك بطاقتك الشخصية وتقف فى الصف لو فى صف وتديلة البطاقة وتقوله عايز رقمى التأمينى وده مجانا طبعا وبيكتبلك الرقم على ورقة او يطبعه على الكمبيوتر حسب المكتب (ملحوظة: الرقم ده ممكن موظف البنك ينسى يقولك عليه بس انت هاته بردوه لانه هيحتاجه).
4- وبعد ماتدفع المقدم هيديلك موظف البنك ورقة تديها للمعرض مطلوب فيها رقم الشاسيه والموتور واللون للعربية اللى انت حجزتها عنده. هتجيبها وتوديها المعرض وماتنساش وانت فى المعرض تسأله اذا كان فى اى اوراق او جوابات عايز البنك يبعتهالو لان طبعا البنك عايز يضمن ان هياخد الشيك من البنك فى اقرب فرصة واللى عرفته ان ساعات بنك ناصر بيأخر الشيك عليهم.
5- ولو انت جاهز بكل ماسبق بيقوم البنك فاتح لك حساب جارى وتمنه 65 جنيه وتفضل تكتب فى بياناتك وتملاء فى اوراق لحد ماايديك توقف (انا اخدت حوالى 30: 45 دقيقة) بس مش مهم كل ده فى سبيل اقل فائدة 6.5% احسن من اى بنك تانى مفترى (وعلى رأى المثل: تعب ساعة ولا كل ساعة) .
6- هيقولك الاجراءات واللجنة هياخدوا من يوم الى يومين حسب الفرع.
7- وبعد يومين هتروح البنك هتلاقى ان شاء الله اوراقك اتصدق عليها وخدت الموافقة هتاخد الاوراق كلها (ملحوطة : البنك مش بيديلك شيك ولا حاجة كله اوراق فى اوراق) وتروح على الفرع الرئيسى لبنك ناصر اللى موجود فى شارع قصر النيل (وماتقلقش هتعرف توصله لو سألت اى واحد هناك ألف مين يدلك عليه) وهتختم الاوراق بختم النسر وتطلع حمامة على المعرض تديله الأوراق وهو هياخد اللى عاوزه منها ويديلك الباقى. وبكده انت علاقتك مع البنك شبه انتهت.
8- المعرض ممكن ياخد يوم او يومين (انت وشطارتك معاهم) عشان يعمل اجراءت الافراج الجمركى للعربية عشان هى مستوردة من الخارج ويسجلها تقريبا (انا مش عارف بالضبط هو كان بيعمل ايه) بس المهم انه اخد منى مبلغ 75 جنيه عشان الحاجات دى.
9- بتحاول بقى كل يوم تكلم المعرض عشان تعرف ايه الاخبار وتحدد ميعاد الاستلام.
10- يوم الاستلام بتروح تتم على العربية وتستلمها وهما بيكونوا مجهزينها وعاملين كود الكاسيت وغسلينها زفيها حوالى 5 ليتر بنزين.
11- بتاخد العربية وتفولها 92 طبعا انا فولتها بـ 92 جنيه تقريبا وطبعا كنت مصدوم لانى كنت بفول عربيتى اللادا بـ 35 جنيه بس 80 . المهم بتلاقى مندوب من المعرض مستنيك فى المرور اللى انت قولتلوا عليه من قبل وهيخلصلك كل حاجة.

بالتوفيق ان شاء الله وارجوا انى اكون جاوبت على كل استفساراتك بخصوص التقسيط مع بنك ناصر

وتحت امرك فى اى استفسار اخر.

جزاك الله خيرا على الشرح الجميل
المشكله انى هقسط مع بنك ناصر فرع الفيوم هل مندوب المعرض هيجيلى مرور الفيوم

المشاركة الأصلية كتبت بواسطة treeka84

جزاك الله خيرا على الشرح الجميل
المشكله انى هقسط مع بنك ناصر فرع الفيوم هل مندوب المعرض هيجيلى مرور الفيوم

انا هديلك تليفون الاستاذ عبد الرحمن من مبيعات السبع اوتوموتيف وهو راجل محترم جداا وهيقولك تعمل ايه, وانت ممكن تسأله.

أ/عبد الرحمن 01006556711 - مبيعات السبع فرع مصر الجديدة (رينو)

المشاركة الأصلية كتبت بواسطة ragy

طيب في البنك مقالكش على وثيقه تامين او مصاريف اداريه ؟؟

استاذ راجى معلش انى مقولتلكش على موضوع التأمين والمصارف الادارية

على اساس انى قلت ان دى حاجة اساسية هتدفع هتدفع ومش هتدفعهم كاش دووول هينزلوا على القسط

المهم اسف مرة تانية

يوجد 1% مصاريف ادارية
ويوجد تأمين على الحياة وده بيتحسب حسب سن المؤمن عليه (انت يعنى) والموظف بيطلب منك تاريخ ميلادك من البطاقة وبيبوص فى شييت اكسيل ويقولك قيمة التأمين على الحياة كام.

وكده كده هيتضافوا على القسط إلا اذا كلبت انك تدفعهم كاش

ياباشا ربنا يتمم لك بخير انا كمان مشترى العربية تبع بنك ناصر فرع 6 أكتوبر
والبنك اجراتة سهلة جداً وممكن تخلص وتستلم العربية لو جاهزة وأنت ورقك جاهز فى نفس اليوم أنا شخصيا خلصت كل حاجة فى يوم واحد
وانا اقول لك تعمل اية
1- سيب المقدم فى حساب فى البنك او افتح بيهم دفتر (وديعة) وهتاخد عليها فوائد (التعاملات اسلامية).
2- هات عرض السعر من المعرض ولو فى عربية جاهزة خلية يديلك رقم شاسية وموتور وفهمة ان انت مخلص مع البنك .
3- خد عرض السعر ورقم الشاسية والموتور وروح على البنك وجهز ورقك وعلى فكرة الرقم التامينى دة الموظف بتاع البنك بيطلعة من على كمبيوتر البنك وهو قاعد.
4- بعد ورقك مايخلص هتعقد كتير اقوى تملا ورق كتير قوى والورق بيعتمد ويخلص فى نفس اليوم يعنى حوالى نص ساعة بعد ما تخلص اجراءتك.
5- هيديللك خطاب استلام السيارة جرى على الفرع الرئيسى اختم منة الورق ودة سهل جدا بس ما اعرفش الفرع بتاع الفيوم فين ممكن يكون كلة بيعتمد من فرع القاهرة ودة فى وسط البلد .
6- روح المعرض استلم العربية وجواب الافراج الجمركى دة بيختم مجانا من المرور الرئيسى وجة برضة سهل جدا انا رحت ختمتة من مرور بين السرايات لان بة الادارة العامة لمرور الجيزة(مجاناً)
7- طلعت جرى على المرور رخصت العربية (حوالى ساعتين)
8- طلعت على المعرض اديت لة صورة الرخصة بها حظر بيع لصالح بنك ناصر
9- الموظف خد صورة الرخصة وطلع علىالبنك علشان ياخد فلوسة.
10- رحت البنك اديتهم صورة الرخصة
11- لمااستلمت العربية من المعرض مضانى على ايصال امانة باستلام السيارة اخدتة منة لما سلمتة صورة الرخصة
12- كل الاجراءات دى اخذت منى حوالى ثلاثة ايام فقط
13- ملحوظة بنك ناصر فوائدة 6% فقط 1% مصاريف ادارية تامين على الحياة حوالى 400 جنية تدفع مرة واحدة طوال فترة التقسيط وهو بيحطها على القسط
وبالتوفيق ان شاء الله

وانا جبتها من بنك ناصر بس كانت الفائده 6% بس على فكره هي ذادت في اول شهر مارس وكان فيه موظف في البنك معرفه بصراحه الاجراءات مخدتش نص ساعه

وكمان هما ناس محترمين جدا

وبما ني طبيب معملوش تأمين اجباري بتاع البنوك التانيه واعتقد انهم ما بيعملوش لكل الموظفين

طيب يا جماعه موضوع القسط مع بنك ناصر ده ممكن يكون حرام ولا ايه؟
وهل هوه افضل من التقسيط مع الشركه المصريه العالميه نفسها ؟