الموضوع: رايح الزقازيق وراجع بالليل وقلقان

وانت رايح ممكن تسلك طريق بلبيس الزقازيق الصحراوي
الطريق نوعا ما الأسفلت كويس وهتجري مش اقل من 120

وانت راجع - الأحسن زراعي ولو علي رأيي الشخصي يبقي تبات والنهار له عينين

ولو هتبات وترجع الصبح يبقي ترجع بردو بلبيس صحراوي
الزراعي طويل وممل وبردو مش أمان اوي يعني

في فندق في الزقازيق مشهور اوي جمب المحافظة - اسعاره مش عارف عاملة ايه

حضرتك هتطلع من اكتوبر
تمسك الدرائري من عند دريم
هتفضل ماشي عليه (حوالي 65 كم) لحد اخره خالص
هتلاقي مخرج اسمه (المطار - مصر الجديدة) لا
حضرتك هتدخل شمال وتنزل النفق - طريق الأسماعيلية الصحراوي
هتفضل ماشي حوالي 2 كم وهتلاقي ملف - يوترن - هتلف وترجع وتدخل دخلة طريق الأسماعيلية الصحراوي (هتلاقي بردو يافطة مكتوب عليها استاد السلام)
هتدخل الطريق وهتلاقي يفط بتقولك مدينة العبور
حضرتك هتدخل مدينة العبور عن طريق النفق
هتلاقي بعد النفق كارفور علي يمينك
هتفضل ماشي طوالي - لاتدخل يمين ولاتدخل شمال
هتفضل ماشي ورا اليفط المكتوب عليها طريق بلبيس - مجلس المدينة
هتلاقي البوابات في نهاية مدينة العبور
هتدخل طريق بلبيس
هتلاقيه طريق حارتين تقريبا
بس الأسفلت كويس ويسمح تمشي عليه متوسط 120 (انا شخصيا بمسك الطريق 140 كم/ ساعة)
حوالي 35 كم وهتلاقي البوابات
كدة انت في بلبيس
هتفضل بردو طوالي مع العربيات
هتلاقي كوبري - اطلعه
هتفضل ماشي طوالي مع اغلبية العربيات
حوالي 35 كم كمان وهتلاقي نفسك في الزقازيق
لما توصل للزقازيق هتلاقي وحدة المرور علي يمينك
وبعدها شريط القطر
هتلاقي نفق هتنزله وتدخل يمين وتمشي جمب شريط القطر
هتدخل شمال تبقي في شارع الجلاء

ملحوظات علي الطريق من بلبيس للزقازيق
هتلاقي حتت كتير منه بيعاد رصفها حاليا - انصحك تهدي تماما تماما (مش ازيد من 10كم/ ساعة)
سواقين النقل متهورين
يمكن تقابل ناس عكسي
في مطبات مش قبلها يفط تحذيرية

اتمني يكون الشرح بسيط وسهل
اوعي تقف لحد في الطريق لأي سبب من الأسباب
اوعي تسأل حد علي رجله
اسأل حد راكب عربية ويستحسن ملاكي

والله المستعان
،
،

اخى الكريم

انا أفضل ان حضرتك تاخد الزراعى أأمن فى كل الاحوال عن الصحراوى

وطبعاً الاخوه الافاضل افاضوا فى الشرح لحضرتك

بالنسبة للمطبات ماتخدش في بالك
لأنك هتلاقي العربيات مهدية من قبله

نصيحة من اخ كثير السفر

اوعي تخلي نفسك دايما انت الرائد او الدليل او بمعني ادق انت اول عربية في الطريق
حاول تخلي دايما عربية قدامك دليك للطريق
لو في مطب وهو هدي - تهدي
ولو في مطب وهو لبسه - انت تاخد بالك وتهدي

ربنا يستر طريقك

والله المستعان
،
،