الموضوع: مكروباص خبطلي العربية ! ! ولما اتكلمت معاه اترفع عليا مطاوي !

السلام عليكم ورحمة الله وبركاته

العربية اتخبطت تاني ! مش عارف اقول تاني ولا تالت ولا عاشر ! والله متجابة بفلوس حلال ومدبوح عليها وكل حاجة

لا حول ولا قوة الا بالله

خارج من الجامعة بعد الامتحان زي الفل مافيش اي مشاكل ومعايا 2 زمايلي

لقيت واحد معاه هوندا سيفيك بيجري قلت لما اجري معاه شوية ! وللاسف كان كل اللى في دماغه انه بيحاول يلبسني !

يخليني وراه ومرة واحدة يقوم لاطش غرزة ! واتفاجاة انا بعربية قدامي

المهم قلت اسيبه ينفسن مع نفسه وبعيد عني ومشيت براحة وعلى مهلي جدا

لحد ماوصلت عند ال U-turn اللى عند دريم بارك عشان اطلع الدايري

واخد ال U-turn براحة الاقي مرة واحدة مكروباص خبطني من ورا

نزلت طبعا مخنوق ومتنرفز جدا ! العربية كل شوية تتخبط مش معقول يعني اللى بيحصل

انا مش من النوع اللى بياخد عوض او فلوس من حد بس المرة دي فعلا قلت لازم يتحمل نتيجة غلطته

انا واقف في حالي مش بعمل حاجة مش معقول يجي يخبط فيا وكنت متنرفز جدا

المهم نزل السواق خلاص حصل خير مش خبطة يعني اعملك ايه العربيات كلها بتتخبط ودي تتسمكر عادي يعني

هو بصراحة كان بيعتذر بس بتناكة ! اللى هو يعني اخبط دماغك في الحيطة وخلاص مش عاجبك اشرب من البحر

وانا والله عمري ماكنت من النوع اللى بيقبل العوض بس والله اللى بيحصل للعربية اليومين دول كتير يعني حرام مش كل شوية تتخبط

فكنت متنرفز بطريقة غبية وماقبلتش اعتذاره

بيقولي انت تحمد ربنا ان انت كويس وانا كويس ومحدش حصله حاجة وبعدين انت مش اول واحد تتخبط يعني ايه المشكلة

على قد ماكان بيعتذر على قد ماكان اسلوبه بينرفزني اكتر

المهم زميلي ظابط في البحرية راح متصل بالبوليس وقالي انت عايز منه حاجة ؟ قلتله اه يتحمل نتيجة غلطلته

راح وقف قدام المكروباص وقال اركن طيب على جمب عشان مانعطلش الطريق

فزميلي واقف قدامه عشان مايمشيش بعيد وده راح دايس اكنه عايز يدوسه

رحت انا مزعق فيه ومخبطله على الازجاج انت يعني غلطان وكمان مش عاجبك وعايز تدوسنا ! !

لقيته مرة واحدة راح نازل هو والتباع بتاعه وفاتحين علينا مطاوي ! وطبعا في ثانية كل الناس اللى كانت حوليك بتحوش كلو جاب ورا ! !

وللاسف انا وزمايلي معناش حاجة ندافع بيها عن نفسنا ! بعدنا عنهم شوية

وراحت الناس داخلة في النص وخلاص ياكابتن خد عربيتك وامشي

زميلي الظابط الا بالدين اتخانق معاهم وماينفعش ومش ماينفعش وبتاع المهم هديته وقلتله خلاص مش هتعور نفسك وتودي نفسك في داهية عشان ناس زي دي

وعلى قد مانا مضايق ان العربية اتخبطت ! وكل شوية تتخبط ومش عارف اخرتها هتبقى فين

مضايق اكتر من الموقف اللى حصل ! ان يترفع عليك مطوة في وسط الطريق وفي وسط الشارع والعربيات وتلاقي انك حتى مش عارف تدافع عن نفسك

الحمد لله ان الموضوع ماوصلش لاكبر من كدة ! والواحد بقى غلطان انه بيمشي بعربيته من غير سلاح !

ومش عارف والله البلد هتروح على فين تاني يعني الواحد يتخبط ولما يعترض يترفع عليه مطوة وياتمشي ياما تضرب

الحمد لله على كل شئ وقدر الله ماشاء فعل ودي صور الخبطة








قدر الله ماشاء فعل

اللهم صبرنا على ما ابتليتنا