الموضوع: رأيكم فى الجيتز

حاجاتها موجودة جديد بس . وتقريبا التوكيل موفر لها اغلب الحاجات .
استيراد موجودة لها كل حاجة تقريبا (الشكل القديم) . لاكن ال 2011 مالهاش حاجة استيراد خالص (الشكل الجديد) .

العربية كويسة جدا أنا لسه جايبها من أسبوع تقريبا
من جوه واسعة و بشكل ماكنتش متوقعه كنا 3 ورا و قاعدين مرتاحين و اللي كان سايق مش عايز اقولك حجمه كان قد أيه ..... ههههههههه

لسه ماعملتش تقييم كامل عنها لكن أقدر أقولك بعجالة كده مميزاتها و عيوبها :

المميزات :
1- عربية صغيرة سهلة في الركنة و المناورة
2- سريعة و سحبها ماشاء الله طلقة بسبب ماتورها ال 1600 اللي هو نفس موتور الفيرنا علي جسم اصغر
3- التكييف فريزر
4- الصالون زي ماقولت واسع و مريح
5- أستهلاك البنزين لحد دلوقتي موفرة جدا
6- قطع الغيار منتشرة و في السوبرماركت
7- العربية مطلوبة و ماسكة سعرها يعني أعادة بيعها سهل و مش هاتخسر كتير و بالعكس ممكن ماتخسرش حاجة خالص
8- الفرامل بسم الله ماشاء الله ممتازة بس تستخدم التيل الاصلي

نيجي بقي للعيوب :
1- الشنطة صغيرة
2- المرايات الجانبية لاتوفر رؤية جيدة نظرا لأني متعود علي مرايات الياريس و الالنترا لكن مراية الصالون مع الزجاج الخلفي بتغني تماما عن مرايات الجانب
3- صوت الموتور عالي شوية نظرا لأنخفاض العزل و قوة الموتور علي العربية
4- العفشة ناشفة سنة مقارنة بالالنترا مثلا

عموما العربية كويسة جدا خاصة لو حالتها جيدة جدا ممكن تكون في حدود 64000 الي 70000 حسب السنة و الكيلومترات