الموضوع: تجربتي مع عز العرب

انا بس عايز اقول من الموضوع ده ان زي ما فيه حاجه وحشه من عز العرب بردو فيه حاجات كويسه
بصراحه انا حصل معايا موقف مايقولش ابدا ان التوكيل سيئ وهو كالتالي
حصلتلي مشكله في زراير الزجاج الكهربي. فاحجزت وطلعت علي التوكيل يوم السبت الصبح علي الساعه 10 كدا وقلتلهم علي المشكله.. وكان عندي مشكله تانيه وهي ان في ميل في العربيه شويه ناحيه الشمال فاقلت اقولهم عليها ولما حجزت قلت اقلهم علي مشكله الميل ومشكله الزجاج ..
انا قلت مشكله الزجاج هاتتحل في عشر دقايق ويطلعو يقولولي ان مشكله الميل ديه عاديه وكل العربيات كدا (نظام توكيلات كتير مابيعترفش بالمشكله الا ماتكون العربيه خربانه) وعمال احضر ردود علي المشكله عشان انا شايفها بجد مشكله
غابو ساعه... ساعتين.. 3 ساعات ولاقيت العربيه طلعت..
فيه ايه ..؟؟!! العربيه مالها..
شرحلي بقي الموضوع المهندس مصطفي صلاح (اللي مش عارف اشكره ازاي) فهمني وقالي الاتي:
كان عندك مشكله في زراير الزجاج الكهربائي يمين وشمال وغيرناهم باثنين جداد والميل بتاع العربيه غيرنا مساعدين وسست جداد ورا قدام للجمب الشمال
ببص علي العربيه مافيهاش ميل.. (عربيتي بقي وانا عارفها من بصه اعرف اللي فيها)
ابص علي المساعدين.. مساعدين جداد..
ابص علي السست.. جداد
ايه ياجدعان ديه عربيتي والتوكيل غيرهم من غير ما يعمل فيلم..( فيه توكيل يعمل ده الا ما يكون محترم)
اه... فيه مشاكل
اه.. فيه قطع غيار بتتاخر.
لاكن لو قطعه الغيار موجوده بيغيرها من غير ما تطلب..
نيجي بقي لاهم سؤال اي حد ممكن يساله..
دفعت كام بقي يامعلم لجوز المساعدين وجوز السست وجوز الزراير؟؟؟ تلاقيك دفعت دم قلبك؟
والاجابه هي كل اللي دافعته اعدتي في التوكيل لمده 3 ساعت علي الفيس بوك
نيجي بقي لحد ناصح يحب يصتنصح ويقوللي يبقي دفعت خدمه او مصنعيه ودفعت فاتوره فله
ارد علي واقوله ايوه فعلا خت وارقه كدا من بتاعتهم مش فاهم ديه بتاعه ايه وعليها شويه ارقام .. انا اول ما شوفتها قلت بس هتظبط.. ولاقيت في اخر الورقه القيمه المدفوعه صفر.!؟؟!!!
ايه (علي راي شفيق)
صفر؟؟!!
ياعني مش هدفع حاجه ؟؟
رد علي المهندس وقالي. مش انت في الضمان .. وبتعمل صيناتك بانتظام.. وده عيب صناعه.. يبقي مش هتدفع حاجه..
قولولي بقي.. عز العرب توكيل كويس ولا وحش.. طب لو الاجابه انه وحش طب هو فيه توكيل وحش بيعمل ده.. اشك.
المهم بقي ان الموضوع ماخلص علي كدا
لاقيت بعدها باسبوع الرقم اللي بنحجز بيه الصيانات بيتصل بي(اصل انا مسجله علي موبايلي) قلت بس غلطو وبيتصلو يصلحو غلتطهم وهكع كعه محترمه
رديت وانا حاطط ايدي علي قلبي لاقيت مهندس بيكلمني وبيقولي عازين نطمن علي الصيانه اللي عملنهالك بخصوص المساعدين والستت وياريت تشرفنا في التوكيل عشان نطمن علي العربيه في اي وقت يناسبك
هو فيه كدا
يبقي ها
عز العرب زينه ولا عفشه
اعتقد ان كان فيه بعض السلبيات اللي في التوكيل فالتوكيل بيعمل اي حاجه يقدر يعملها عشان عملاء بروتون وديه كلمه حق كنت لازم اقولها عشان ماينفعش نمسك السلبيات وتبقي شغلنا الشاغل ولما تبقي فيه حاجه ايجابيه بالشكل ده مانديهاش حقها.
اشكر عز العرب بكل مهندسيه واخص بالشكر المهندس مصطفي صلاح وشكر خاص للمهندس امر وفي انظار المزيد

الحمد لله هما فعلاً ناس محترمة جداً