رحلة صيانة ال 1000 لدي وكيل معتمد بطريق المنصورة المحلة

**amagroup** · 16-04-2012 02:39 PM

رحلة صيانة ال 1000 كم لدي وكيل معتمد --العدوي---

اتصلت للحجز قبلها بيوم وحد وتم تحديد الميعاد الساعة 9صباحا وطبعا لاني رايح التوكيل فلازم الموبايل يهنج والمنبة ميدربش (عادي) قدر الله وما شاء فعل المهم وصلت الساعة 9:30 ودخلت الاستقبال ودار الحوار
انا:كان معادي الساعة 9
الموظف: ممكن تملي البيانات دي ......
بعد كام كلمة
انا: هي العربية تقفيل كوري ولا مصري لان الانزار شاكلة راكب هنا (انا طبعا عارف الاجابة)
الموظف:تقفيل مصي يا فندم
انا: نعم ! دي جايه علي المركب قطع يعني؟!؟
الموظف: هي تقفيل مصري .هو في حاجه كوري بتبجي حته واحده
انا: يعني زيها زي الفيرنا
الموظف: كله بيتجمع هنا
انا: اااه طيب انا عندي شوية مشاكل
اولا: في صوت دوشة في العجل لما بمشي
ثانيا: صوت حفه في الدريكسيون بصوت واطي خالص
ثالثا:- نظام اتوفيثر الوقود Eco عاوز اكشف عليه
وطبعا هغير زيت وفلتر
الموظف: انا كتبت كل حاجه
انا: هدفع كام
الموظف: 153
زيت 120 وفلتر 28 و 5 ثمن ورده طابة الزيت عشان لما اربط الحمل يكون عليها
وهنا جيه المهندس

وخرجت معاه وسألته نفس الاسئلة اللي فاتت وقال الاتي:-
العربيه تقفيل كوري طبعا والانزار بيركب هنا ونوعة صيني
نظام الeco في العربيه مقلوب يعني لو عاوز توفر بنزين اعملة Off
انا: نعم عكس ما الكتالوج بيقول
المهندس: اه الكاتالوج مكتوب غلط
انا:؟!؟!؟!؟!! طب المفتاح فيه شريحه
المهندس : لو لقيت المفتاح فيه نقطة لحام بلاستيك في بعضه يبقي فيه شريحه
انا: طب صوت دوشة الكاوتش اللي ورا وحفة الدريكسيون
المهندس هنشوفها

ودخلت العربية وبعد ساعة خرجت بعد تغيير الزيت والغسيل
وكانت النتيجه

المهندس: صوت حفة الدركسيون ده في علبه باور الدريكسيون وهيختفي مع الوقت
اما الصوت اللي ورا فا ده والكاوتش (العجل) بتعها خشن ومع الوقت الصوت هيروح
وعلي فكرة العجلة اللي ورا يمين كانت مريحه زيادة ولان مفيش ضمان علي الكاوتش روح اكشف عليه

تم بحمد الله

انا في رائي الوكيل ده جيد جدا ولو ان حسيت ان في شوية سرح كده في الكلام (موضح باللون الاحمر) بس انا رجعت مرتاح

إيه رأيكم

علي فكرة الكاوتش اتضح انه من ترييح العربيه اثناء الشحن الفارده اتاثرت واضطريت اجيب شمبر ليها

تخيلوا

**Samir Elshahawy** · 16-04-2012 07:27 PM

أخي الكريم ..

مش اي حاجة مهندسي التوكيل يقولوها ممكن نصدقها للأسف هما فاكرين أننا ماعندناش فكرة أو مابنقراش زيهم

طبعا العربيات بتيجي من بره متقفلة جاهزة و كل اللي بيتعمل هنا الاضافات التالية :
- الكاسيت
- الانذار
- ممكن التكييف
- بعض الكماليات (فوج لايت - فرش داخلي - جنوط - باركينج سنسور)

موضوع نظام الايكو المقلوب ده غريب جدا و اول مرة اسمعه طبعا لو أنت جربت تعمل زي ماهو بيقول و عملته off هاتشوف النتيجة بنفسك

برضه حكاية الشريحة اللي جوا المفتاح دي و نقط اللحام البلاستيك مش داخلة دماغي و مش فاهمها بصراحة

بالنسبة لصوت الكاوتش هو فعلا كان عالي في الاول عن دلوقتي و بعد كده الصوت خف و لكن مازال عالي ده بسبب نوع الكاوتش نفسه و نوع النقشة اللي بتسبب معامل أحتكاك عالي لكن في نفس الوقت بتعمل تماسك كويس مع الطريق خاصة في ظروف المطر و الرمل
الافضل أنك تظبط ضغط الكاوتش طول الوقت علي 32 أو زي ما مكتوب في الكتالوج أو علي القائم

**amagroup** · 17-04-2012 11:00 AM

المشاركة الأصلية كتبت بواسطة SE_coralsea

أخي الكريم ..

مش اي حاجة مهندسي التوكيل يقولوها ممكن نصدقها للأسف هما فاكرين أننا ماعندناش فكرة أو مابنقراش زيهم

طبعا مش كل حاجه بنصدقها بس كان هيجري ايه لو موظف الاستقبال قال معرفش والمهندس هو اللي هيقولك عادي

اه منك يا مصري ... بتحب تفتي قوي "طب علي الاقل قول علي حسب علمي ولا اعتقد ..."

المشاركة الأصلية كتبت بواسطة SE_coralsea

أخي الكريم ..

موضوع نظام الايكو المقلوب ده غريب جدا و اول مرة اسمعه طبعا لو أنت جربت تعمل زي ماهو بيقول و عملته off هاتشوف النتيجة بنفسك

برضه حكاية الشريحة اللي جوا المفتاح دي و نقط اللحام البلاستيك مش داخلة دماغي و مش فاهمها بصراحة

الغريب ان الeco نزل عداد الاستهلاك بعكس لما كنت مشغله ؟!؟
عموما لسه برده بالتجارب هيبان انا هقيس معدل الاستهلاك واشوف
الحل الوحيد عشان اعرف المفتاح هو اني اروح لبتاع مفاتيح واجرب اعمل واحد.

المشاركة الأصلية كتبت بواسطة SE_coralsea

أخي الكريم ..

مش اي حاجة مهندسي التوكيل يقولوها ممكن نصدقها للأسف هما فاكرين أننا ماعندناش فكرة أو
بالنسبة لصوت الكاوتش هو فعلا كان عالي في الاول عن دلوقتي و بعد كده الصوت خف و لكن مازال عالي ده بسبب نوع الكاوتش نفسه و نوع النقشة اللي بتسبب معامل أحتكاك عالي لكن في نفس الوقت بتعمل تماسك كويس مع الطريق خاصة في ظروف المطر و الرمل
الافضل أنك تظبط ضغط الكاوتش طول الوقت علي 32 أو زي ما مكتوب في الكتالوج أو علي القائم

انت هتقولي علي الكاوتش ده بيعمل صوت صرخه فظيعه لما اقرص علي الفرامل