الموضوع: مشكلة في ال rbm بتاع اللوجان بتاعتي

السلام عليكم و رحمة الله

عندي لوجان 2010 من سنتين و شغالة كويس الحمد لله ، بس من 4 أشهر تقريبا بدأت ألاحظ حاجة غريبة بتحصل و أنا سايق

- و أنا بغير من سرعة لسرعة أعلى ، بشيل رجلي من على البنزين و أدوس على الدبرياج ، عادي يعني
- أول ما يوصل الدبرياج للآخر ألاقي فجأة الموتور بيدور بسرعة جدا و بطريقة متزايدة ، مع أني شايل رجلي أصلا من على البنزين
- و فجأة في خلال ثانيتين مثلا ، ألاقي العداد نط من 2000 ل 5000 و مكمل ، طبعا أنا باتخض لما بلاقي الموتور عمال يلف بسرعة كدة في الهوا (عشان أنا دايس دبرياج) ، فبقوم على طول قافل مفتاح العربية فالعربية تبطل و الموتور يقف و تفضل العربية مكملة مشي بالقصور الذاتي
- طبعا أما باجي أشغل العربية تاني بيحصل نفس الموضوع ، أول ما أدور المفتاح و العربية تدور ، ألاقي الموتور بدأ يلف بسرعة متزايدة تاني و عمال ينط من 1000 ل 3000 و مكمل ، ... طبعا أروح أنا على طول قافل المفتاح تاني قبل ما عداد ال rbm يوصل لآخرة.
- و طبعا هذه الحلقة المفرغة لا تنتهي الا بهذه الوسيلة:
- أول ما أشغل العربية و عداد ال rbm يبدأ يتحرك بقوم دايس دوسة بنزين سريعة و جامدة جدا تخلي العداد ينط فجأة أسرع من التزايد التلقائي بتاعة ده
- بعد ما دوسة البنزين السريعة دي (تقريبا بخبط دواسة البنزين) تخلص و دواسة البنزين ترجع لوضعها الطبيعي ، ألاقي عداد ال rbm رجع طبيعي و وقف على أدنى مستوى.

المشكلة دي عملالي قلق فظيع ، و بتحصل فجأة و أنا سايق ، و أحيانا بتحصل و أنا ماشي بسرعة على نزلة كوبري مثلا ، بيبقى الواحد مش عارف يتصرف ازاي.
مرة حصلتلي و أنا ماشي في صلاح سالم و كنت ماشي بسرعة و في عربيات كتير من حولي ، اتكهربت طبعا


من 4 شهور رحت التوكيل و قلتلهم على المشكلة دي ، شكلهم كانوا مستغربين ، و الله أعلم ، بعد ما خلصوا العربية قالولي انهم نضفو ثروتل (Throttler) كده ، و خلي العربية تحت الملاحظة لمدة اسبوع و لو في حاجة تانية كلمنا ، الحمد لله لم يتكرر الأمر لمدة شهرين أو أكثر و عاد من جديد.

حد حصلت معاه المشكله دي؟
حد متخيل ايه ممكن تكون المشكلة؟

متشكر جدا

بص يا باشا أول ما تلاقي الrpm بيعلى كده اديها الغيار المناسب لسرعتك و شيل رجلك من على الدبرياج و هدئ سرعتك بالفرامل بس من غير دبرياج و لما الدنيا تسلك ابقى اديها واحد بنزين جامد و الrpm هيرجع يتظبط معاك, أهم حاجة انك ماترتبكش أول ماحصل معاك كده و خلي أعصابك هادية عشان تعرف تتصرف صح

.
للأسف ال rbm بيعلى بسرعة جدا ، مثلا من 2000 ل 5000 في 3 ثواني مثلا أو ثانيتين ، فغالبا مش بلحق أتصرف ، غير أني أقفل مفتاح الكنتكت
ان شاء الله لو حصلت تاني لا قدر الله هجرب.

أنا شاكر جدا على معلوماتكم يا جماعة ، الحمد لله حجزت ميعاد في التوكيل و ان شاء الله أوافيكم بآخر الأخبار