الموضوع: قصتى مع توكيل كيا

حابب احكى ليكم حكايتى البائسه مع توكيل كيا ال------ مش عارف أوصفه بأى صفه .
هحاول تكون ألفاظى محترمه
البدايه يوم 8-12-2011 لما روحت التوكيل فرع أسيوط و تعاقدت معاهم على سبورتاج الفئه التانيه و دفعت اربعين ألف جم وأخدت ايصال
و قاللولى الاستلام من 4 الى 6 شهور يعنى على أخر شهر ابريل تقريبا
بعد الحجز كنت بأدخل كتير على نايل موتورز و تكونت عندى قناعه ان السبورتاج لازم ليها بنزين 95 اما بنزين 92 ينفع لكن على المدى الطويل ممكن يأثر على الموتور .
روحت تانى للتوكيل و قلتلهم انا عاوز الغى حجز السبورتاج - بس انا مش هسحب الفلوس لكن هنقل الحجز الى بيكانتو اوتوماتك ب 83500 جم لأبنتى و قاللولى ان الاستلام فى النص التانى من شهر مارس
أول ما جه نص مارس كنت تقريبا كل يومين اسأل عن ميعاد الاستلام و كان الرد ان العربيات وصلت الميناء و لسه الجمارك و ان شاء الله هيظبتولى اللون الاوف هوايت اللى انا عاوزه
وصلنا فى المماطله لغايه يوم 15-4-2012 و بلغونى ان العربيات خلاص هتتحمل من الميناء يوم الثلاثاء 24 ابريل ولكن ------------------------------- المفاجئه الكبرى ان العربيه بقت ب 80500 جم ليييييه بقى ......
شالوا منها غالبية الاوبشنز من-- غير الأزاز الكهربا و لا المرايا الكهربا ولا الفوجات ولا الريموت وهنا كانت الصدمه الكبرى
فقلتله انا عاوز الفئه اللى اتعاقدت عليها فرد و قاللى لو عاوز الفئه الاعلى يبقى فى نص مايو
فقلتله نص مايو يمد لنص يونيو و ندخل ل يوليو و فى الحاله دى تكون 2013 قربت تنزل
روحت طلبت سحب فلوسى ال 40 الف جم و طبعا دخول الحمام مش زى خروجه - طبعا هينشفوا ريقى على مايدونى الفلوس
روحت حجزت بيكانتو اوتوماتك فول ابشنز خليجى مواصفاتها كالاتى :
تكييف- باور- كاسيت اصلى -تاره مالتى- بلوتوث- فرش جلد نبيتى -فوجات - اوكر نيكل - عتب - سبويلر خلفى - مساحه خلفيه- جنوط 14 لونين-سنتر - 2 مفتاح ريموت_ ب 86 الف جم
ان شاء الله الاستلام فى خلال يومين
السؤال اللى بيطرح نفسه :
هو العربيات لما طلعت من كوريا ادارة المبيعات مكانتش عارفه ان الشحنه اللى جايه من غير أوبشنز ؟ طب مقالوش ليه وكنت سحبت الفلوس على بدرى
العقل بيقول ان ادارة المبيعات هى اللى قررت ان تخفض الاوبشنز طب مقالوش ليه
العقل بيقول كمان ان اللى حجز على 83500 جم يستلم زى ما تعاقد مع الشركه و اللى هيحجز من جديد يتم التنبيه عليه ان الاوبشنز أقل
طبعا ال40 الف جنيه فضلت عندهم حوالى 4 شهور و نص - شوفوا بقى يعملوا بكام فى البنك
أنا راضى زمتكم نوصف التوكيل ده بأى صفه !!!!!!!!!

المشاركة الأصلية كتبت بواسطة fgfg1975

اولا مساء الفل يا دكتور
على فكره الموضوع ده عيب عليهم و يفقدهم احترام العملاء
ممكن حضرتك تعمل complain للشركه الكوريه علشان يعرفوا ان وكيلهم فى مصر
بيتفق مع العميل على مواصفات و يسلمهم حاجه تانيه
ولله حركه ما يعملهاش المعلم مشمش فى وكاله البلح

يا عمى ................المسامح كريم واللى ماتحتاجش النهارده لوشه بكره تحتاج لقفاه
ويا رب باركلى فى العربيه الخليجى اللى رايح أستلمها دلوقت و مايكنش فيها أى عيوب صناعه وما أحتاجش للتوكيل