الموضوع: اه يا بلد ......... ملهاش كبير ...

اهلا يا بكوات .......
شد انتباهى و انا راجع من الاسكندرية .... عبارة طريفه مكتوبة على احدى سيارات النقل الكبير اوى .. الا و هى ..... "احترام الكبير واجب " ... و فعلا ... العبارة ده فكرتنى لما كنت فى سته ابتدائى و ضخم الجثه نسبيا بالمقارنه بتلاميذ اولى و تانية ابتدائى و كنت بجرى فى الحوش براحتى .... و لو خبطت فى اى عيل فى اولى و لا تانية الاقية قام طاير واقع على الارض ... و انا زى ما انا خالى من الاصابات ....
و ادركت حكمه تلك العبارة ...و لكنها اثارت فى عقلى عدة تساؤلات ... هل الاحترام لكبير الحجم .. مثلا .. زى المقطورة الى عدت منى جنبى و الهواء بتاعها كان هطيرنى على الفرده التانية ... ولا احترام الكبير فى السن ....


كان عندنا جار زمان .. كل يوم اصحى على خناقه بينه و بين مراته ... كان مفرج عليها الناس ... يصبحها بخناقه ويمسيها بخناقه ..... و انا وقتها كنت فى ثانوى . .. فى مرة كنت باصص من الشباك .. و بالصدفة حصلت المشكلة ... فشيىء بديهى .. بصيت ناحية البلكونه اللى بتاعته اللى طالع منها الزعيق .... قام سايب مراته اللى مفرج عليها الناس و قام طالعلى و شعرة واقف زى الديك الشركسى .. و خرج يجعر و بيقولى : بتبص على ايه يا بنى انت ؟؟؟



فانا استغربت و بحسبة بكلم جار تحتية ولا فوقيه .... و ببص فوق و تحت كده .... لاقيته قام قال : ايو انت يا ابن سيف ؟؟ اندهلى ابوك من جوة .......


انا مدرتش بنفسى ساعتها .. و الله .. و قولتله .. هو انا مش مالى عينك ولا ايه ؟؟؟...و بعدين ده هو سيف ده بيلعب معاك بلى فى الشارع ؟؟؟ ... احترم نفسك انت راجل كبير و عيب اللى انت بتعمله ده ... علشان مقلش منك قدام الناس ....


الراجل ازبهل كده و قام مزعق .. لاقيت الحج والدى الله يرحمه بقى ... جاى من ورايا و قام جاررنى من قفايا و بيقولى عيب ده راجل كبير .... يا دى الكبير .....


الكبير يا ساده .. كبير تصرفات و عقلية و تعامل .... ممكن تلاقى عيل مكملش 20 سنه و محترم و مالى مكانه ... و فى واحد بلغ من العمر ارزله و تلاقيه كده هايف و نطع و لا لية اى خمسين لازمه ... و فى رجاله ... على رأى والدى الله يرحمه .. مبتسخنش متراحها ... يقعد فى فى القاعدة و تلاقية عمال يهبل و لا عارف يتكلم و لا يحل و لا يربط ....


و بدون الدخول فى مهاترات.... او رغى كتير ... احنا عاوزين نكون كبار فى الاخلاق و كبار فى التصرفات و كبار فى المنطق و التفكير ... مش فى السن ولا الحجم ...
.
و من الاخر ... الكبير كبير ... و النص نص ... و الصغير ممكن يكون كبير بدماغه .....