الموضوع: عن دعم البنزين

لسة متفرج على حوار مستفز ويحرق الدم في التلفزيون من الأخوة المسئولين في وزارة البترول. عن مدى دلع والهشتكة إلى فيها المصريين من مالكي السيارات . وإزاي أن بعض مالكي السيارات الملاكي بيمصوا دم الغلابة من أخوتهم المصريين عن طريق إستهلاك الفرد منهم لـ 1000لتر شهرياً من البنزين المدعم!!!!! (ده على أساس أنا كل المصريين راكبين العربيات gmc .) وطبعا كله بناء علىالدفاتر والإحصائيات والتقارير!

فتفق ذهن العباقرة في وزارة البترول عن فكرة جديدة تتناسب مع مناخ الدميقراطية والإقتصاد الحر لتضع المحروسة على مصاف الدول الكبرى. الفكرة ياسادة هي العودة لإستخدام نظم البطاقات والكوبونات (أيوه نفس إلى كان بحصل في النظم البلشفية) يعني هيتوزع على مالك السيارة كوبونات لتموين البنزين بما يوازي 2500جنية في السنة. طب ياعم هامان ( متحدث الوزاراة) اللتر متوقع هيبقى بكام .هيبقى بعد رفع الدعم أكثر من 3 جنية .(يعني حضرتك هتتحرك 550 كيلو في الشهربالسعر المدعم وبعد كده اللتر بأكثر من 3 جنية)
طبعا أنا مش هتكلم عن السوق السوداء أو التضخم أو الهبل إلى هيحصل.... السؤال إلي هيفرتك دماغي قبل ما أنام هي الناس دية مصرة تعمل فبنا كده ليه إحنا عملنا إيه ؟؟؟؟ حسبي الله ونعم الوكيل...