الموضوع: تحيا البونتو كلاسيك ! تعيش وتعلم على الاحصنة الكوري الكتير ! !

السلام عليكم ورحمة الله وبركاته

يمكن عنوان الموضوع يكون غريب بالنسبة لبعضكم ! او يمكن مايعجبش البعض الاخر

لكن اللى حصل النهارده هو الاغرب ! !

كنت مع زميلي في عربيته الانوس متوجهين نحية طريق المطار

وفي اثناء ما احنا ماشيين ظهرت فيات بونتو كلاسيك ! سودا بتجري

بصراحة انا ماجاش في دماغي ان زميلي هيسخن معاها ! لكن للاسف لقيته بدا يجري

المهم زميلي سخن وبيجري حسيته مش عارف يحصل بتاع البونتو

قلت لما اسخنه شوية وخلي ال Adrenaline يشتغل ! !

رحت قلتله على فكرة العربية دي حوالي 60 حصان ! عيب عليك لو ماطلعتش منها

كنا ماشيين 80 راح نازل تالت ودايس ! وياريته ماداس

هنا حصلت المفاجاة والاعجوبة ! ! البونتو قدامنا بفرق عربية وزميلي دايس ومش عارف يحصلها

80 / 90 / 100 / 110 ! ابص للعداد وابص للبونتو قدامنا بنفس فرق العربية ! واقول في نفسي هي البونتو الكلاسيك بقت تربو ولا ايه !

البونتو هدى عشان يدخل غرزة وزميلي راح مهدي وداخل الغرزة وراه

والطريق فتح تاني وماشيين 80 برضوا ! ونفس الكلام

من 80 لحد حوالي 110/120 ! الفرق ثابت مابين الاتنين

وهنا رحت انا قايله

كتك خيييييييييييييييييييييييي يييبة

طبعا زميلي اتعصب واتنرفز جدا ! كنا في ملف راح داخل ورا البونتو غرزة اصلا مش هتجيبه ! ورمى على ماتركس كانت جمبنا كان هيلبس فيها لولا ان ربنا ستر

حسيت اني ارتكبت غلطة كبيرة لما عصبته ! ! والحمد لله ان الطريق قفل على بتاع البونتو وراح زميلي معديها من اليمين وقالي شفت اول مادوست دوسة محترمة عديته ! انا لولا الطريق بس ماكنش مساعد وانا ماكنتش دايس

قلتله قلبك ابيض انت الكبير ماكملناش كلامنا وزميلي هدا شوية ولقينا البونتو فوووووووووو طاير من جمبنا

قلتله خلاص يا معلم مانت علمت عليه قلبك ابيض بقى يا كبير !

صحيح الشدة ماوصلناش فيها لسرعات عالية !

كلها على بعض تجميع من 80:120 بس مش فاهم

60 حصان ! بس ماتفهمش ازاي عربية 84 حصان ماتطلعش منها ؟ او يكون الاداء متقارب على الاقل في ال Mid range ! !

انا بدات احس ان العربيات الكوري بيبقى مبالغ فيها في عدد الاحصنة ! ! <<< واكيد مش كل الكوري طبعا !!

فيه عربيات كوري تانية كتير برضوا بتبقى فوق ال 100 حصان ! وتيجي تشوفها وهي بتجري ماتبقاش فاهم الاحصنة دي بتروح فين ؟ ؟

في النهاية

ارفع القبعة احتراما للبونتو الكلاسيك ! ! بجد ماشاء الله ماكنتش متوقع منها كدة