سؤال في التجنيد: اللي عنده سكر درجة اولي ليه جيش؟؟

**mohmdomar** · 05-05-2012 07:18 PM

انا عندي سكر درجة اولي ودي معاناها ان البنكرياس عندي مفيش خالص وماقدريش اعيش من غير انسولين , اللهم اشفيني واشفي جميع المسلمين يارب من كل مرض

دلوقت انا واخد اعفاء عائلي عشان ابويا علي المعاش واخويا لسة بيدرس ودلوقت هو في اخر سنة وحيتخرج في شهر 8

المشكلة اني جاتلي فرصة عمل في السعودية ولما حاولت اطلع تصريح سفر قالولي ملكش سفر عشان اخوك في اخر سنة وان هو القانون كدا

دلوقت حد ينصحني هل لو قدمت دلوقت وانا عندي سكر هاحد اعفا ولا هلبس؟؟

ومليش بديل خالص حتي لو هسافر 3 شهور فقط يعني هرجع قبل ما اخويا يتخرج مفيش حاجة زي تقديم تعهد اني هرجع تاني او حاجة؟؟

**hazemhassan** · 05-05-2012 11:02 PM

تقريبا تاخد اعفاء
وربنا يشفى كل مريض

**م/مصطفى محمود** · 05-05-2012 11:27 PM

السكر بيخرج من الجيش (سواء درجة أولى أو درجة ثانية )

انا أكتشفت السكر فى الجيش وكان المفروض يتعملى لجنة رفد وأخرج بس انا رفضت (كان فاضلي شهرين وأخرج بشهادة إتمام الخدمة )

المهم بس انك تقدم وتدخل الكشف الطبي (شوف أقرب معاد وقدم فية)

وربنا يشفيك ويشفينا

**dr_abooody** · 06-05-2012 10:45 AM

انا عندي سكر زيك من النوع الاول و باخد انسولين

روحت قدمت ورقي عادي جدااو كشفت مع الناس و اترشحت ظابط احتياط و بعد كدة عملت منحنى سكر في حلمية الزيتون و اخدت اعفاء نهائي و كان في ناس زيي كتير
ما تقلقش هتاخد اعفاء اهم حاجة كل ما تشوف الدكتور تقولة ان عندك سكر عشان يكتبلك التحاليل و تيجي اليوم اللي قبل التحليل ما تخدش جرعة بالليل و كل شوكولاتة الصبح و يبقى معاك قلم الانسولين عشان لما تخلص حليل تاخد الجرعة عشان السكر بيكون مرتفع جداا لانهم بيدوك سكر تاني هناك عشان المنحنى

و بالتوفيق ان شاء الله

**Hacker5** · 06-05-2012 12:42 PM

اة بيخرج من الجيش
و انا خرجت من الجيش بسبب انى عندى استجماتيزم عالى فى العين

**mohmdomar** · 06-05-2012 01:03 PM

ربنا يطمنكوا يا رجالة يارب ما تصدقوش الموضوع دا كنت عاتل همه قد ايه

طيب السؤال اللي بيطرح نفسه بقا ايه هو اقرب معاد للتقديم ؟؟

**م/مصطفى محمود** · 06-05-2012 04:52 PM

أنت مواليد شهر كام ؟

**Hacker5** · 06-05-2012 05:05 PM

اخر تقديم كان فى ابريل لمواليد النصف التانى
انا مواليد نصف اول قدمت فى يناير

**mohmdomar** · 06-05-2012 05:14 PM

انا مواليد شهر 6
17/6/1985

كدا هضطر استني ليناير او ابريل اللي جاي ؟؟

**م/مصطفى محمود** · 06-05-2012 05:47 PM

أنت كده نص اول يعني دفعة 10 او 4 ، طبعا 4 فاتتك خلاص ، قدم فى دفعة 10 (بيتفتح التقديم فى أول 8 ، تابع الجرايد فى آخر شهر 7 لحد ما تلاقي خبر قبول دفعة جديدة )