الموضوع: لية الحاجات دى مبتتصنعش فى مصر ؟؟؟؟

اخوانى الاعزاء ...........مرحبا بيكم ......

هدخل فى الموضوع مباشرة بدون لف كتير

انا عاوز اسأل سؤال

كام مرة اشتريت حاجة ولقيتها مستوردة وقلت لنفسك لية مبنعملش الحاجة دى فى مصر بدل مابنستوردها بالشىء الفلانى وطبعااا اكيد الحاجة دى فكرتها او تكنولوجيتها هايفة او قديمة حبتين او بسيطة فى التصنيع


طبعااا انا عارف ان فى ناس كتير هيقولولى حاجات كتير مش بتتصنع فى مصر وهيعددو الاشياء


انا كل فكرى عشان تبقو معايا فى الخط

انى سبت شغلى الاولانى واشتغلت فى مصنع فى اكتوبر بقالى شهر

المصنع دة بيصنع تروس وقطع غيار حسب الطلب للماكينات بتاعت المصانع الكبيرة وكدة ومن واقع شغلى بحتك بمصانع تانية كتير ومسابك وورش

وبصراحة الحالة كعب على رأى الاخوة السودانيين

الدنيا واقفة ومصانع كتير قفلت واتحولت لمخازن للايجار واللى شغال بقى وردية واحدة بعد ماكان ثلاث ورادى

ووجدت ناس كتير لسة بتنتج المنتجات اللى متعودة تنتجها ومابيحاولوش يدوسو فى طرق جديدة ومنتجات جديدة حتى لو منتجاتهم عفااااا عليها الزمن والف مصنع بينتجها برضة متمسكين بشغلهم ومنتجاتهم عشان دة اللى يعرفوة

ومبيحاولوش يجددو

ففكرت ان اسلم طريقة للخروج من ازمة الركود دى اننا ننتج اشياء جديدة مكنتش بتنتج قبل كدة فى مصر ..كنا بنستوردهااا وبأثمان باهظة

مثال توضيحى .......مراية اللوجان الكهرباء اللى كانت بحوالى الف وشوية ومش موجودة والناس مش لقياها حتى فى التوكيل (الوضع دة كان من فترة ..ومعرفش اية الوضع دلوقتى )هل مفيش مصنع فى مصر ميعرفش ينتج المراية دى خااالص .....انا متأكد ان فية

وبصراحة انا شايف ان الامكانيات موجودة فى مصانع كتير .....بس استغلال الامكانات هو اللى مش موجود


فهمتونى

نرجع تانى للسؤال

اية الحاجة الى شوفتها قبل كدة وقلت لية مبتتصنعش فى مصر ؟؟؟؟؟

وشكرااا لكل من سيشارك