الموضوع: تقييم قياده الجوك الاوتوماتيك

السلام عليكم

فيما بلي تقييم قياده الجوك


اولا زي ما انتوا عارفين انا راكب تيدا سيدان اوتوماتيك عادي مش سي في تي واول مرة في حياتي اجرب عربيه سي في تي
ها ابدا اولا باحساسي من ساعت ما شوفت العربيه عشان اركبها واجربها اولا تحس ان العربيه مش لذيذه اول ما تشوفها بس العربيه دي عامله زي الفيلم اللي مش بتضحك عليه من اول مرة .. لازم تشوفه كذا مرة عشان تضحك عليه وبعد كد ما يجي في التليفزين ما بتفوتوش وبصراحه العربيه كل ما بشوفها اكتر بحب شكلها اكتر لتميزة واحساسك بانها مختلفه عن الطبيعي وتحس انها عايزة تجري من الطابع الهجومي اللي في ملامحها

ثانيا ركوب العربيه : تحس انك راكب عربيه رياضيه وتحس ان ما فيش حاجه ناقصه في العربيه وده احساس انا مفتقده في عربيات كتير بمعنى اخر ما تحسش ان متشال منها حاجه عشان ترخص وده اجمل ما في الموضوع وثانيا بقى انا حسيت اني معزول عن اللي حوليا في العربيه مش عارف ازاي بس حسيت اني عايش مع العربيه وبس كل حاجه قريبه منك وجاهزة للاقلاع وطبعا العربيه من روا اصغر من القاشقاي بس مقبوله والشنطه مش بطاله
نيجي بقى للسواقه: انا اول ماطلعت بالعربيه كنت مخنوق لاني كنت بكبس عليها بشكل مش مظبوط لان حماس الشكل من برة اداني نفس الاحساس ونا راكب عشان كده كبست عليها زياده وده مش طريقه صح لسواقه السي في تي فهديت وابتديت اسوق عادي وازود حبه حبه العربيه كانت ممتازة وطبعا عشان هي اخف من القاشقاي بحوالي 170 كيلو كانت فيقه عنها شويه وخصوصا لما تشغل نظام الاسبورت بيبقى مفوق العربيه جدا واللي عجبني فيها قوي ان فيها كمان نظام اقتصادي للسواقه لتوفير اكبر قدر من البنزين وده على الطرق المفتوحه بيخنق العربيه جدا لكن في الزحمه ممتااااااااااااااز جدا عشان كده كده مش بتجري وفيها كمان نظام القياده العاديه في حاله السواقه بدون جري وده بيفوق العربيه عن النظام الاقتصادي ولكن ليس مثل الرياضي بس فعلا عجبني الثلاث انظمه دول جدا
الكروز كنتول ممتاز جدا وفيه كذا استخدام :
1- مثبت سرعه وده كلنا عارفينه
2- محدد سرعه يعني اقدر امشي على اي سرعه تحت السرعه اللي انا بحددها والعربيه مش بتزود خالص عن السرعه اللي انا طالبها
نيجي بقى للعفشه : العربيه عفشتها تحفه متينه والعربيه مش بتعوم وانا جربت اكسر الدريكسيون يمين وشمال جامد جدا العربيه ماسكه نفسها بس هي ناشفه حاجه بسيطه عن القاشقاي لاختلاف التعليق الخلفي عشان الثبات
بصراحه شايف العربيه ممتازة بالنسبه لعائله صغيرة او متوسطه بس حاسس ان العربيه دي ناقصها فتحه سقف وسينسور بارك وتبقى تحفه فنيه
شكلها من برة يحسسك انها ها تديك اكتر من ما هو متوقع ولكن طبعا عشان الموتور 1600 بس الاداء مش وحش خالص وطبعا هي برة بتنزل بالموتور الدي اي جي اللي اداءة اعلى بكتير من الموتور الحالي عشان يقدر يوازن بين شكلها الهجومي والاداء اللي طالع منها بس ده مش معناه ان الموتور ده وحش خالص
وبالتوفيق للي عايز يشترها انه مش ها يندم
وانا تحت امركم في اي سؤال في حدود معلوماتي