الموضوع: اتمسكت رادار تاني

دي تاني مره اتمسك رادار

المره الأولانيه كان قبل الثورة بكام شهر .. كنت مسافر من الزقازيق للقاهرة .. زراعي .. و كان يوم الجمعة الصبح .. و فى الوقت ده مفيش عربيات أصلا .. المهم كنت ماشي متوسط 130 .. و بين منية القمح و بنها .. لقيت لجنة .. أنا مش مدي خوانه خالص .. و أنا أصلا بفرح لما حد يوقفنى .. عشان على طول رابط الحزام و ماشي صح و رخصي سليمة الحمد لله.

لقيت العسكري بيقول لي انت متصور رادار و خد الرخص و اداها للضابط .. و لقيت عربيات كتير راكنه .. باجيرو و حاجات تانية كتير .. و الناس عماله تجادل مع الضابط .. المهم وقفت بعيد و كلمت واحد صاحبى ضابط .. قال لى هو اسمه ايه .. سألت العسكري قال لى رامي باشا .. قلت لصاحبي .. قال لي طيب ما تروحلوش .. و أنا هحاول أكلم لك حد.

المهم كل شويه واحد يمشى من عند الضابط أقف أنا فى الاخر .. و صاحبي كلمني قال لي أنا كنت امبارح قاعد مع ضابط اسمه رامي بس مش عارف هو ولا لأ .. قلت له خلاص مش مشكله .. المهم الناس كلها مشيت .. فالضابط نده عليا .. قال لى .. أنا شايفك بتتكلم فى التليفون .. بص ياباشا .. لو حضرتك مستني حد يكلمني .. أنا مبكبرش لحد .. تحب تدفع 150 جنيه دلوقتي ولا تاخد وصل و تستلم الرخص من المرور .. حضرتك تحب ايه؟

بصراحه .. كان محترم أوي .. و أنا بضعف قدام الناس المحترمه .. فقلت له لأ .. هدفع دلوقتي .. و دفعت ال 150 جنية و خدت الوصل و مشيت.

المره دى بأه الاسبوع اللى فات .. برضه على طريق الزقازيق - القاهره .. بس الصحراوي .. كنت بجري شويه بين الكارتتين .. و لقيت لجنه عند الكارته التانيه .. برضه العسكري خد الرخص .. و قالي انت متصور رادار .. اركن و تعال كلم الضابط .. ركنت الضابط قال لي تحب تدفع ولا أسحب الرخص و تاخد وصل .. مقلتلوش تلت التلاته كام .. هدفع .. دفعت و مشيت .. و الموضوع مخدش دقيقة .. زى شكت الدبوس

أنا مش زعلان على فكره .. بس يا ريت يعملوا كده مع الناس كلها .. ده اللى هيخلي الناس يلتزم .. انما لو أنا واقف و بدفع .. وواحد برضه كاسر السرعه والضابط وقفه .. فقال له أنا فلان الفلاني .. و مشي .. هو ده اللى بيخلي الناس تكره الالتزام .. و يخلي الناس تكسر الرادارات .. و تخبي النمر بتاعت عربياتها.

ربنا يصلح الحال.