الموضوع: صيانه ال 5000 في فرع صيانه القطاميه

السلام عليكم ورحمة الله

في موضوع اتعمل قبل كدا عن فرع الصيانه الجديد في القطاميه و عن تجارب الاعضاء زي ماهو في اللينك دا:
http://www.nilemotors.net/Nile/253835-eim.html

انا كنت بعمل صيانه ال 5000 في الفرع الجديد عشان اقرب واحد ليا و قولت انقلكم تجربتي في نقط سريعه و تقييمى في الاخر

- الوصول ليه سهل بس لازم تركز في الطريق و الدخله ليه

- الركنه برا المركز مش كويسه وكان في ضغط يومها العربيات مش عارفين يعملوا فيها ايه

- الانطباع العام عن مكتب الاستقبال ضعيف جدا محطوط فيه المهندس والناس في مساحه ضيقه جدا و الراجل كان مشغول جدا بس كان محترم

- طلبت يشوف التكييف و المارش مع الصيانه بس ما فيش حاجه اتعملت فيها لا المارش اتعدل ولا التكييف .. قالي الماكينه بتاعه الفريون و ضبط التكييف بايظه بقالها شهر .. استغربت لان في دلوقتي عرض للكشف علي التكييف ولا تعليق

- الاستراحه متواضعه و لا يوجد انترنت ولا مشروبات سوى الشاى و التكييف ساقع جدا جدا والكراسى غير مريحه (علي الأقل ليا انا ) وفى تليفزيون كبير

- مكان الصلاه متواضع جدا جدا لانه خاص اكتر بالعمال

- ماشوفتش اي حاجه بتحصل في العربيه لانها دخلت من باب الورشه الرئيسي و اتحركت لمكان الغسيل من غيرما تترفع علي اي حاجه وهنا ليا سؤال.. هو المفروض التربيط بتاع العفشه اقدر اشوفهم وهو بيشتغلوا فيها ولا دا مش بيحصل في الورشه الرئيسيه ؟؟

- انتظرت المده اللي بلغوني بيها بالضبط واقل كمان وادونى هديه دواسات كويسه جدا

- العربيه فعلا عفشتها رجعت كويسه وحسيت بنعومه فعلا

- سألت المهندس عن الأير باج وربطها بالحزام قالي العربيه علي قد سعرها ودي بتتحسب كماليه ولما قولت له طاب فين الفيوز اللي بفصل بيه الأير باج .. قالي الاير باج بتتفصل عن طريق الكمبيوتر من التوكيل و دا ممنوع تماما

- التقييم العام ما بين ضعيف ل متوسط .. الانطباع العام و رشه كبيره ملحق بيها تكييف بارد عشان تنتظر فيه من الحر


لسه ما جربتش غيره .. حبيت انقلكم تجربتي وأسف علي اللإطاله