الموضوع: مراكز تعليم القيادة بالجمهورية

مدارس تعليم القيادة مهمة جدا ً والمفروض تنال قدر أكبر من الاهتمام ، والمبتدئين خاصة المفروض يتعلموا الأساسيات صح وبالتالى قلت أفتح موضوع عن مدارس القيادة وأفضلهم نظرا ً لأن فيه مدارس كتير بتكروت ومش بتعلم صح وأنا هذكر ليكم تجربتى ..

الكورس الأول كان فى مركز تعليم عند الألف مسكن بمصر الجديدة إسمه تقريبا علاء موتورز أو حاجة كدة والله مش فاكر ، بالظبط أمام نادى الشمس بوابة 5 ، الكورس كان 5 ساعات كل يوم ساعة ، بس صباح الكروتة + إن الراجل كان خلقه ضيق ودى سمة بشعة فى أى معلم قيادة ، أهم ميزة إنه يكون صبور ، بعد ما خلصت الكورس صراحة مستفدتش بقدر كبير يعنى بالكتير 25% وسعره كان 120 جنيه.

الكورس التانى كان فى الجولف سنتر ودة مركز محترم أوى فى أرض الجولف فى شارع نبيل الوقاد والناس اللى فيه زى السكر وبيقدموا مستوى عالى أوى واللى بيعلمك بيبقى عارف إنك جديد وبيتعامل معاك بمنتهى الصبر والإحترام ، السعر كان 200 جنيه 6 ساعات وآخر ساعتين بيعلمك تخطى امتحان السواقة فى المرور وبصراحة استفدت كتيــــــر جدا 100% .

أنا شايف إن الموضوع مهم خاصة للمبتدئين وأفضل طريقة للتعليم بدلا ً من الطريقة المتبعة عند المعظم النزول بسيارة الوالد تحت اشرافه ساعتين تلاتة هوب ودمتم ولا انتوا ايه رأيكوا ؟
عموما أقترح ذكر أماكن تعليم القيادة الممتازة حتى يكون مرجع للأخوة المبتدئين ويسهل عليهم بداية الطريق ، ولو حد عنده تجربة مع مركز زفت يحذر الناس منه برضه ...


====

مركز الجولف لتعليم قيادة السيارات:

22 ش نبيل الوقاد - أرض الجولف بجوار بون أبيتى - القاهرة

Tel : 26907333 Mob: 0123718257

المشاركة الأصلية كتبت بواسطة pato11

انا بقول مش مشكلة اجي اسبوع لحد المكان الي بتقول علية علشان اتعلم ..
بس انا ماعرفش الطرق يعني في السواقة الي هايكون معايا هايدلني ولا اية..

هو المكان الي بتقول علية فين بالظبط قولي المنطقة بس ..

22 ش نبيل الوقاد - أرض الجولف بجوار بون أبيتى - القاهرة

اسمة المنطقة اية ؟

هو عند سيتي ستارز الي هو جنب القوات الجوية وكدا وقريب من الاستاد ؟

آه طبعا بيقولك خش يمين شمال على طول ، هو بيقولك تمشى ازاى ، بالنسبة للمنطقة هى اسمها أرض الجولف منطقة معروفة جدا جدا وشارع نبيل الوقاد لو سألت عليه أى حد هيدلك عليه هو قريب أوى من سيتى ستارز يعنى مفيش 10 دقايق بالكتير ، حضرتك ممكن تكلمهم وتستفسر أكثر.