الموضوع: الحلقة الرابعة / كورسير vs وجه قبلي

علشان بس محدش يقول اني مقصر معاه مش حارم حد من حاجه اهو امبارح ودتكم العين السخنه ونزلتكم البحر وان شاء الله النهارده هرجعكم الصعيد مشي معايا هههههههههه

طبعا اللي الناس متعرفهوش اني معايا باسبور صعيدي ستيزن محافظة المنيا هههههههه والنهارده الجمعه ومعزومين علي فرح ابن عمي وقولت اما اجهز الحلوة خوخه لهذه السفرية المرهقه 180 كيلو بعد ما جهزتها وتوكلنا علي الله لقيت الحاج بيقولي كورسير يا ابني انتا عارف ان مليش غيرك بعد ربنا وانتا ابني الوحيد قولتله خير يا حاج قولي علي اللي في قلبك قالي اطلع بيني زراعي يااااااااااد ههههههههه قولتله ليه بس القلبه دي يا حاج عليا قالي زي ما بقولك كدا قولتله حرام عليك اطلع زراعي وعندنا الصجرواي زي الفل قالي عربيتك مضمنهاش من هنا لحد ما تنزل بيها من علي الرصيف ( اصل انا متعود اركن عربيتي علي الرصيف واخلي الناس تمشي في الشارع ههههه )

قولتله اسمعني يا حاج قالي ابدا زراعي يعني زراعي لو حتي عطلت بينا هنلاقي حد ينجدنا قولتله انتا حر يا حاج زي ما تحب واتكلنا علي الله الساعه 8 الصبح وعرفت انزل بيها من علي الرصيف وروحت عديت علي خالي اللي كان مش راضي يركب معايا مش عارف ليه !!!!!

من هنا لهنا خدته معايا بالعافية وروحت طالع علي صلاح سالم للجيزة للمنيب لبداية الطريق الزراعي ولسه بقول يا هادي وببدء في اول الطريق ولقيت مطب في وشي روحت مهدي وواخده ملحقتش اجيب التالت ولقيت مطب تاني ومن بعد المطب الرابع فوجئت ان الطريق كله مطبات قولت ده انا علي ما اوصل للمطب رقم 50 هيكون الفرح شطب ايه اللي بيحصل ده وحسيت ان العربية عندي جالها حالة هيجان ولقيتها فاقت ولاول مره من يوم ما اشتريتها تجيب سرعة 100 ومكنتش مصدق نفسي وانا ببص علي عداد العربية اللي ماشيه جنبي لاني معنديش عداد اساسا ههههههههه

فرحت اوي ولسه بقول اخير ولقيت المطب رقم 100 في وشي ولما وصلت عنده بهدي العربية ولقيت صوت العربية مجلجل زي ما اكون كابس بنزين علي الاخر

قولت الله اكبر بركاتك يا ست 128 ولقيت ابويا بيقولي شوفت قولتله شوفت ايه قالي لو كنت مسمعتش كلامي كان زمانك مرمي في الصحرا دلوقتي بتغني ظلموه قولتله وبعدين يا حاج المشكله لسه متحلتش وفضلت ماشي عليها كدا بتاع 5 كيلو لحد ما لقيت شبه ميكانيكي علي جنب الطريق قولتله العربية فيها كذا وكذا لقيته راح مطلع المشرط من جيبه وفتح بطنها ولقيته بيرمي منها شوية ريش واكل قولتله سيب العشه زي ما هي اصل في قطه كل يوم تجبلي فرخه وتدخل بيها تحت الحوض في العربية وتاكل فيها فتلاقيني طول ما انا ماشي في ريش فراخ بيطير من العربية المهم الراجل قالي ده منظر حوض عربية كنت عايز اقوله وده منظر ميكانيكي قالي الشفاط عندك علق وخلاص لغيت وظيفته من العربية وقولتله يعني العربية هتبقي تمام قالي عيب عليك انتا بتكلم مهندس مش ميكانيكي بالابتدائية ومنظره اساسا ميقولش انه خريج معهد قطن

المهم الجمعه أذنت علينا في الطريق روحت راكن ودخلت جامع علي الطريق مفيهوش حصير ولا سجاد صلي علي البلاط يا معلم وبعد ما صلينا روحنا مكملين وفضلت علي حال المطبات ده طول الطريق لحد الساعه 6 المغرب لان العربية رجعت تاني متجبش غير 50 كيلو ومبتلحقش تجيبهم كمان وتلاقي مطب في وشك المهم كانت اول مره اروح فيها البلد بعربية ومعرفش الطريق هناك ودخلت في مكان ما يعلم بيه الا ربنا واخير لقيت بني ادم اسئله فين بلدنا ولقيت واحد غفير صعيدي اصلي مش صيني مضروب

طالعلي ومعاه طبعا البندقيه بتاعته واتفضل ومينفعش كدا قولتله قولي بس يا حاجه اروح عزبة الكاشف ازاي قالي انتا تعرف عيلة الكاشف قولتله انا من العيله يا حاج ولقيته يمراحب يمراحب واهلا بالغالي ابن الغالي قولتله ربنا يخليك يا حاج قولي بقا ابوس ايدك العزبة اروحها منين ابدا والله لازم تاكلوا قولتله معلش يا حاج وقت تاني انا جاي من السفر وتعبان ومعايا جيش جوا العربية قالي ابدا وانا الصراحه تعبت من كتر الكلام معاه وقولتله طب شكرا يا حاج وبدور العربية ولسه هطلع لقيت بندقيه طولها بتاع مترين بتترفع في وشي

قالي انتا هتمشي وانا بكلمك مش عيب قولتله لا انا بدور العربية مش بمشي علشان بس متبردش مني قولتله شيل البتاع اللي في وشي دي يا حاج انا مش ناقص خضه كفايا اللي انا فيه طول الطريق وابويا نزل كلمه اخيرا انا مش عارف كان ساكت كل ده ليه اتاريه كان بيضحك عليا وانا مش شايفه ونزل للراجل وكلمه ولقيته بيشرحلي ازاي اوصل وطبعا ماشي في ادغال وسط مزارع الذره العربية مش باينه قولت ليلتنا فل ان شاء الله

واخيرا وصلنا بعد عزاب الساعه 8 ووصلت لاصعب مرحلة وهي النزول من العربية تخيلوا واحد سايق بتاع 11 ساعه شكله هيكون ازاي وهو نازل من العربية

نازل سقط من العربية لاني لزقت في الكرسي وعلشان افرد جسمي واقف كنت شبه محمد هنيدي لما اتزنق في الحمام بتاع الطيارة وكان هاين عليا ازعق بعلو صوتي وانا بفرد ظهري

وبكدا ابقا انتهيت من الجزء الاول من مغامرة الصعيد في الذهاب المفاجأة الاجمل بقا في الرجوع من الصعيد لارض الوطن وفيها بلاوي من الاخر

المشاركة الأصلية كتبت بواسطة تامر.محمد

ههههههههههههههههههههههههه ههههههههههههه سفرياتك مسخرة و الله العظيم

تسلم يا تامر باشا ويا رب مكونش زهقتكم بس من حكاياتي

المشاركة الأصلية كتبت بواسطة shimo_moh

ههههههههههههههههههههههههه هههههههههههه لا وبتقول مش عارف خالك ماكنش راضى يركب ليه والله معاه حق

اموت واعرف سر التصميم بالسفر بيها ده :) لابجد انت تحمد ربنا انك فى الاخر بتطلع سليم من الحوارات دى

عايزة اقولك ع سر انت عارف ليه تهت فى الطريق لان كريم مجابش جى بى اس ليك :))))

ههههههههههههههههههههههههه خالي طول الطريق عمال يأكلني في موز وسوداني زي ما يكون راكب مع سواق من الجبلاية بيصبرني علي الطريق بالموز والسوداني

والحمد لله مطلعتش سليم اوي لسه علي فكرة محكتش علي رجوعي من هناك ههههههههههههه

وبالنسبة لكريم لو مجابش الجي بي اس هو حر مش هنخليه يعرف يركب الالنترا بتاعته تاني

المشاركة الأصلية كتبت بواسطة m7mda7md

مش قادر اقولك كمل ‏180‏ كيلو كمان و تعالي اسيوط هههههههههههه....حمدا لله ع السلامه

ههههههههههههههههههههههههه هههه حبيبي والله يا محمد باشا طول عمر اهل اسيوط اهل كرم وطيبه ونورت الموضوع يا غالي

المشاركة الأصلية كتبت بواسطة ahmedeihab

ههههههههههههههههههههههههه هههههه حلو الحته بتاعت بدور العربيه عللشان متبردش منى دى ههههههههههههههههههههههه
متابع يا جامد
^_^

ههههههههههههه اصل لو العربية وقفت شوية من غير ما تدور مبتدرش غير بطلوع الروح ومنور الموضوع يا ابو حميد

المشاركة الأصلية كتبت بواسطة kareem fawzy

هههههههههه
متابع يا دوحه :))




يادى كريم والgps يا جدعان مين قالكم ان ابويا فى طره لاند :))

هههههههههههههههههههه منور الدنيا يا كرميلة المنتدي وبعدين هما اللي في طره لاند واخدين توكيل الجي بي اس في مصر ولا ايه وبعدين هو انتا قليل في البلد يا كرميله يله بقا ادينا ميعاد نقبلك فيه ناخد الجي بي اس ويا دار ما دخلك حر

المشاركة الأصلية كتبت بواسطة m7mda7md

ألا قولي صحيح....انت سافرت بال 128 ليه...مسافرتش بعربيه تاني ماسكه نفسها شويه ليه؟

هههههههههههههههههههه هو انا كنت لاقي يا عمنا ده انا يوم ما جيت اطلع رخصة خاصه ملقتش غير عربية 124 واتسببت في سقوطي في الامتحان ههههههههههههه

المشاركة الأصلية كتبت بواسطة mazagangee

و الله انت صعبان عليا
والدك فعلا بيعاقبك انه مشاك في الزراعي
هات بطاقته و تعالى صحراوي و لا يهمك

ههههههههههههههههههههههههه هه انتا شكلك كدا ناوي تخليه يسلمني تسليم اهالي للجيش زي فيلم عبود علي الحدود

المشاركة الأصلية كتبت بواسطة koshary

هههههههههه بجد مغامراتك تحفه بس ازاى يعنى مبتجيبش فوق 50

العربية متفهمش فيها ايه عملتلها نص عمره والميكانيكي خد الدكتوراه في الماتور عندي وبردك العربية مبتعديش سرعة ال 60 كيلو