الموضوع: الثلاثة يمتطونها

انا هبدأ موضوعي بسؤال ودي عكس طريقتي في الكتابة الي دايما بتنهي موضوعي بسؤال
بس الموضوع اكمنه بيتكلم عن وضع غلط ومقلوب زي باقي الأوضاع النهاردة
فاشمعني انا الي هكتب الموضوع بالمعدول

هو الموتسيكل كام راكب ؟؟
بالذات الصيني

المنظر دة اكيد مش انا بس الي بشوفه وبيحرق دمي

المنظر للأسف ماصورتوش لأنه مش غريب او حاجة نادرة
انت لو نزلت الشارع ووقفت 5 دقايق هتشوفه 300 مرة بمعدل موتوسيكل كل ثانية (5*60 =300)

المنظر كالتالي
موتوسيكل صيني
مش معلق لوحات
3 راكبينه (يا سبحان الله)
الي في النص او الراكب الأخير لابس كاب ورافعه خالص من علي راسه (الأستايل الجديد في لبس الكاب الصيني بردو ابو 5 جنيه)

طريقة القيادة
متهورة اشبه بالجنون والأنفلات بين العربيات زي السكينة في الحلاوة

مظهر الشباب الذين يمتطون المسكين - قصدي الموتوسيكل
رفيعين
احدهم لابس شبشب
الثاني لابس كاب
الثالث لابس قميص مشجر وفاتح صدره (تعبير عن الأنطلاق بالمعجزة الصيني الي متحملاهم)

السلوك
شتيمة
معاكسة
الفاظ نابية كناية عن خفة دمه وسوء تربيته

النهاية
خناقة مع احد قائدي السيارات لتجاوزه سرعتهم الجنونية
لو لأنه مش بيعرف يسوق وخبط فيهم وهما بياخدو غرزة ضيقة ماتعديش فار
او لأن حد بيئة مش عاجبه الشتايم والهزار بتاعهم

في منظر تاني لا يقل عنه اهمية

الموتوسيكل ابو طقم صوت طاحن (يطحن اذان المارة ويدغ دغ مشاعرهم)
تلاقيه غالبا موتوسيكل ديلفري صيدلية ومركب السماعات اما علي الجادون (عجلة القيادة بس في الموتوسيكل) وطبعا بتبقي مغطية علي عدادات الموتوسيكل زي السرعة ولفات الموتور بس هو مش محتاج للعدادات لأنه واثق انه مقفلهم هما الأتنين
او بيبقي مركبها في صدر الموتوسيكل مكان صندوق الخزين في حالة انه فيسبا

وطبعا مستوي الصوت علي اخر حاجة وبيسمع اغاني اما عاطفية مليئة بالشجن للمطرش العاطفي (ي و هـ ن م ل ك ق ف غ ع ظ ط ض ص ش س ز ر ذ د خ ح ج ث ت ب أ) (الحروف مقلوبة زي الأوضاع)
او بيسمع اغاني شعبية (بردو راقية) كلها اما عتاب للصديق الندل او حسرة وندامة علي غدر حبيبته يعني من الأخر مفيش صاحب يتصاحب علي حد تعبيرهم

للأسف مش بهرج ولا الموضوع للفكاهة

انا حزين علي المستوي المتردي
وقد ايه كم الموتوسيكلات الطائشة التي لا تحمل لوحات ومخالفة جميع القواعد والأداب والمنافية للسلوك القويم

اتمني ما شوفش المنظر دة لأنه بجد وان دل فأنما يدل علي ان مصر اخر الركب ولن تلحق بأي حضارة طالما راكبة موتوسيكل صيني (التقسيط بصورة البطاقة - ياريت حتي بالأصل) والدول المتقدمة راكبة عربيات تربو

في حين ان اول مركبة بعجلات كانت في مصر من ايام العجلات الحربية

وسمعني سلام
عظيمة يا مصر

والله المستعان
،
،