تقرير عن صيانة ال 40.000 لهيونداى النترا 2009 خليجى

**Mohab555** · 24-05-2012 06:50 PM

السلام عليكم ورحمة الله وبركاته
-------------------
ازيكم ياشباب النهارده هنقلكم تجربتى مع صيانة ال 40.000 لعربيه اخويا النترا 2009 خليجى و بما انى بتعامل مع حبيب قلبى واخويا الكبير م/ محمد فضالى ( مركز توب جير ) فقلت اكيد لازم الصيانة تبقى هناك خصوصا انها صيانة مهمه وانا الصراحة اثق فيه ثقه عمياء وكل عربيات العائلة وكمان الاصدقاء بتعمل صيانة هناك .... رتبت الخطوات الى همشى عليها وكانت كلاتى :
----------------
1- تحديد قطع الغيار المطلوبة وشرائها
2- تحديد يوم للصيانة

- وفعلا نزلت اشتريت قطع الغيار المطلوبه وطلعت على المهندس محمد و بدأنا على بركه الله وحدد ايه البنود بتاعه الصيانة الى هتم وكانت الاتى :
---
1- تغيير زيت + فلتر
2- تغيير تيل امامى
3- تغيير فلتر هواء
4- تغيير فلتر تكييف
5- تغيير بوجيهات
6- تنظيف البوابه و الحساسات
7- الكشف على العربية بالكمبيوتر لاكتشاف اى اعطال
8- الكشف على السوائل
9- رجلشه العجل الخلفى
10 - تغيير سير المجموعه
11- تغيير فلتر بنزين
وبدأنا على بركه الله العمليه :
--------------
مبدأئيا كده الراجل الى شغال مع م/ محمد و اسمه أ/حسام برنس بمعنى الكلمه ماشاء الله عليه دماغه ذريه فى العربيات فعلا ماشاء الله عليه ...

1- سبنا العربيه تبرد شويه و بعدين بدأنا بفك البوابه و الحساسات لتنضيفهم و وكفايه ان علبه ال GUNK خلصت عليهم !!! و كانوا ياجماعة منزلين و المصحف طينه بمعنى الكلمه و الحمد لله رجعوا زيرو تانى بعد التنضيف و خدوا علبه واحده ب 30 جنيه
2- تم فك البوجيهات و كانوا طلعين شغالين الحمد لله و غيرناهم بطقم بويجهات NGK يابانى من المركز ودول ب 50 جنية

3- غيرنا فلتر الهواء وكان طالع لونه اسود و مش نافع و غيرنا فلتر التكيف وده الصراحة كان طالع مقطع وميت و مضروب بالنار وفلتر الهواء اشتريته ب 60 جنيه اصلى و فلتر التكييف ب 70 جنية كورى علشان الاصلى لقيته مش موجود

4- تغيير سير المجموعه و كان طالع كويس و ده اشتريته ب 110 اصلى و ركبناه و كله تمام

5- الكشف على السوائل و كانت كلها تمام

6- غيرنا بعد كده فلتر البنزين و ده موجود تحت الكنبه الى ورا و فعلا يا جماعة الفتلر كان منزل اقسم بالله طينه مش بنزين وجبت فلتر البنزين اصلى ب 120 جنية

7- بعد كده دخلنا على زيت الموتور و الفلتر و نزلنا الزيت وكان شغال مش حلو ومش وحش وغيرنا الفلتر وده اشتريه ب 25 جنية اصلى و حطينا زيت لكوى مولى TOP TEC 5W40 و ده جركن 4 لتر ب 260 جنية !! ارخص من شيل و انظف ب 500 مره

8- دخلنا على التيل الامامى و كان بيودع ووركبنا التيل الجديد وده اشتريته اصلى ب 400 جنيه وبعدها رجلشنا على العجل ورا علشان الرجلاش كان فى الضياع

9- بعد كل ده وفى النهايه كشفنا على العربية بالكمبيوتر و الحمد لله كله تمام

---
انطباعى بعد الصيانة حاسس ان العربية رجعت زيرو بمعنى الكلمه و الزيت اللكوى مولى ده مشكلة خلى العربية على السلانسية اكن الموتور مش داير اصلا وكمان حتى مع التكييف تحس انها بقت سايلانت ... ومشيت وانا فرحان بالعربية جدا

وفى النهاية احب اشكر المهندس محمد فضالى على الشغل الممتاز و جه العادى بتاعوا و ايضا حبيب قلبى أ/ حسام و الى بذل مجهود كبير و اشتغل شغل رائع الحقيقه ..

تحياتى وان شاء الله التقرير يكون مفيد لحضرتكم

**Mohab555** · 24-05-2012 07:39 PM

المشاركة الأصلية كتبت بواسطة medicalist

الف مبروك يا باشا
وربنا يباركلك فيها ان شاء الله
بس انا داخل على ال 60 الف ولسه التيل بيقولوا كويس اغيره ولا اسيبه طالما فيه
و بالنسبه لزيت الفتيس ماجبتش سيرته برضه لسه انا ما غيرتوش من الزيرو وخايف اغيره
نفس الكلام بالنسبه للسيور ماحدش قال انها تتغير

ربنا يخليك يا كبير
بص انت كده لازم تكشف على التيل لو محتاج يتغير غيره و هو دى فى الغالب الى هيحصل ماشاء الله 60 الف تيل فرامل انت كده دخلت الموسوعه ... بالنسبة لزيت الفتيس بص انا المهندس محمد قالى نغيره فى الصيانة دى وانا فضلت انزله على 50.000 لانى كشفت عليه وطلع كويس مش سىء بس ان شاء الله هغيره الصيانة الجايه و بالنسبه للسيور انت عندك سير واحد بس هو الى ماسك الدنيا مش زى باقى العربيات 3 سيور و اسمه سير مجموعه و ده بيتغير كل 40.000 علشان تبقى فى الامان فلازم تغيره لانك ماشى 60.000 ....

**mahmoud_afifi** · 24-05-2012 07:51 PM

ماشاء الله تقرير جميل والف مبروك الصيانه عقبال صيانة ال1000000 كم.

**mahmoud_afifi** · 24-05-2012 07:52 PM

المشاركة الأصلية كتبت بواسطة mohab555

ربنا يخليك يا كبير
بص انت كده لازم تكشف على التيل لو محتاج يتغير غيره و هو دى فى الغالب الى هيحصل ماشاء الله 60 الف تيل فرامل انت كده دخلت الموسوعه ... بالنسبة لزيت الفتيس بص انا المهندس محمد قالى نغيره فى الصيانة دى وانا فضلت انزله على 50.000 لانى كشفت عليه وطلع كويس مش سىء بس ان شاء الله هغيره الصيانة الجايه و بالنسبه للسيور انت عندك سير واحد بس هو الى ماسك الدنيا مش زى باقى العربيات 3 سيور و اسمه سير مجموعه و ده بيتغير كل 40.000 علشان تبقى فى الامان فلازم تغيره لانك ماشى 60.000 ....

السير كل 60 الف كيلو

**Kareem Fawzy** · 24-05-2012 10:43 PM

تسلم ايدك والف مليووون مبرووك الصيانة
بس نصيحة ليك زيت الفتيس بالذات امشى على تواريخه بالظبط خصوصاً انه مفروض يتغير كل 40 الف او سنتين
لان زيت الفتيس دة روح الفتيس
وبسبب عدم تغيره عندى كان هيحصل مشكلة فى الفتيس لولا البشمهندس هانى ميخائيل لحقها

وبالنسبة لسير المجموعة بيتغير على 60 الف يا باشا