أبو رامى الكبابجى و تجربة منيلة بنيلة

**Ghosts** · 01-06-2012 07:58 PM

أزيكم يا أصدقائى ....
لسة جاى دلوقتى حالآ من مطعم أبو رامى ....

سمعت كتييييييييييييييييير أوى عن الكبابجى دة قلت لما أجربة أنا و ال ghost الصغير (أخويا) ....
يقولك دة بياكل عندة الوزرا والفنانين على رأسهم عادل أمام ....

روحنا وياريتنا ما روحنا ....
مبدئيآ الخدمة زى الزفت لأنهم جايبين شوية عيال صيع يخدموا على الناس ....

قلت يا واد طنث خالث المهم يكون الأكل كويس ....
كيلو الكباب ب 170 جنية قلت يا واد طنث خالص المهم يكون الأكل كويس ....

طلبت أنا و أخويا كيلو و كان عبارة عن 4 صوابع كفتة و 5 ريش مدهننين فى طبق ملياااااان جرجير ....
أكيد وزنين الجرجير مع اللحمة لأن دة مش ممكن أبدآ يكون كيلو ....

خلصنا الأكل فى 5 دقايق بالظبط ....
طب أحنا لسة جعانين ....

أكلنا بقى عيش و سلطة....
والسلطة هناك عبارة عن عينات (معلقة بابا غنوج, معلقة طحينة, أوطاية وخيارياااااية) ....
مفيش حاجة كانت على الترابيزة إلا لما كلناها ومن كتر غيظنا كنا عايزين الراجل يلف لنا الجرجير Take away

أحنا كنا رايحين المطعم دة على السمعة بتاعتة بس صدق من قال:
لا تصدق كل ما تسمع و نصف ما ترى ....

معلش محدش بيتعلم ببلاش ....
و نصيحتى ليكم يا جماعة بلاش تروحوا تاكلوا فى المطعم دة ....

**ابو سيف** · 01-06-2012 08:14 PM

الكباب و الكفته عنده حلوين ... بس عادديين مش اختراع و موجودين عند ناس كتير
السعر فعلا مبالغ فيه جدا جدا و الكميه قليله

اللى عنده ملوش حل حاجة واحدة بس
ممبار محشي لحمه .... بس
اللى يتاكل عنده مش هتاكله عند غيره
غير كدة كلها سمعه فعلا و ملوش لازمه

**yakoot** · 01-06-2012 08:19 PM

170 جنيه !!!!!

**Ghosts** · 01-06-2012 08:20 PM

المشاركة الأصلية كتبت بواسطة ابو سيف

الكباب و الكفته عنده حلوين ... بس عادديين مش اختراع و موجودين عند ناس كتير
السعر فعلا مبالغ فيه جدا جدا و الكميه قليله

اللى عنده ملوش حل حاجة واحدة بس
ممبار محشي لحمه .... بس
اللى يتاكل عنده مش هتاكله عند غيره
غير كدة كلها سمعه فعلا و ملوش لازمه

أنا مليش فى الأكل دة خالص ....
أنا أعز الكبااااااااب و الكفتة أوى ....

بس أنا مش عارف أية اللى حصل للمطاعم فى الأيام اللطيفة دى ....
أبو شقرا بقى غااااااااالى جدآ و أبو رامى شرحة ....

محدش يعرف أبو أى حاجة تانى ناكل عندة كباب وكفتة وننبسط؟؟!!

**Ghosts** · 01-06-2012 08:24 PM

المشاركة الأصلية كتبت بواسطة yakoot

170 جنيه !!!!!

بمنتهى الأمانة يا فندم ب 170 جنية ....
وياريت كان الأكل عدل ....

**FunnyMickey** · 01-06-2012 08:47 PM

والله يافندم كنت طلبت كيلو جرجير افضل
كان حيحطلك كفته وكباب فرشه

عالم تحرق الدم
اعتفن حاجه اما المطعم يفتكر انه بقاله سمعه بقي ويزيط

مش ابو رامي ده اللي طلع لام رامي في الحلم لابس ترنج ابيض في ابيض :)

احمد رزق شكله ساب المطعم :)

**Ghosts** · 01-06-2012 08:58 PM

المشاركة الأصلية كتبت بواسطة aboomar22

لو حابب تاكل فى مكان كويس عندك المنوفى الكبابجى شارع فيصل قيل شارع العشرين معروف قوى وعندك كمان دار جدودنا كمان رائع دول اللى انا عارفهم وللحق واحد صاحبى كان شغال عند المنوفى قالى كل وانت مطمئن منتهى الامانة والنظافة فى التجهيز واللحوم من مزرعتة فى المنوفيه ده للى بيكون متشكك فى نوعية اللحوم

طب وبالنسبة للأسعار؟؟!!

**nonetta** · 01-06-2012 09:03 PM

محلات الكباب والكفتة الشهيرة
ابو رامي السيدة زينب
الرفاعي السيدة زينب
فرحات الحسين ومدينة نصر
حسني مدينة نصر
المنوفي شارع فيصل

اختلفت الاراء على كل منهم
كل واحد بيشكر فيه مجموعة من الناس
مش لاقيين حد متفق عليه
انا شخصيا ما جربتش الا حسني وكان اكتر من رائع

**Ghosts** · 01-06-2012 09:12 PM

المشاركة الأصلية كتبت بواسطة nonetta

محلات الكباب والكفتة الشهيرة
ابو رامي السيدة زينب
الرفاعي السيدة زينب
فرحات الحسين ومدينة نصر
حسني مدينة نصر
المنوفي شارع فيصل

اختلفت الاراء على كل منهم
كل واحد بيشكر فيه مجموعة من الناس
مش لاقيين حد متفق عليه
انا شخصيا ما جربتش الا حسني وكان اكتر من رائع

ماهو أنا رحت عند أبو رامى عشان الشهرة الغير مبررة دى ....
أأأأأأأأأأأأأة يا بطنى الكباب أشتغل ....