محتار بين لوجان و ريو 2012 .. و اسئلة اخرى !!

**كوباية شاى** · 05-06-2012 05:26 PM

السلام عليكم !!

بصوا يا شباب انا متابع المنتدى من غير ما اشارك بقالى فترة علشان انا لسة معنديش عربية .. بس قريبا ان شاء الله على اخر الشهر دة 6-2012 ناوى اجيب اول عربية ليا .. طبعا انا سوقت عربيات كتير جدا بحكم عملى و كلها ايجار . بس الموضوع بيختلف تماما لما تبقى عربية ناوى تكمل بيها 10 سنين قدام.

انا محتاج منكم نصيحة فى كذا حاجة

اولا عايز رايكم فى الاختيار لو بقارن فى الشريحةالسعرية لوجان و سانديرو و لانوس ( انا مستبعد الفيرنا تماما )

ثانيا عايز اقارن لوجان 2012 الاوتو ب كيا ريو سيدان

عارف انهم مش نفس الشريحة السعرية بس بصرف النظر عن الفلوس.. انا عارف ان لولا اتفاقية اغادير كانت اللوجان هتبقى بنفس سعر الريو فى حدود ال 97 الف.

هقولكم احتياجاتى فى العربية علشان تقدروا تدونى معلومات مفيدة فى المقارنة..

انا عايز عربية مريحة فى السفر ( معدل مرة الى الاسكندرية و مرة الى الصعيد شهريا )

ثبات على الطريق السريع

همشى بيها حوالى من 40 ل 60 كيلو يوميا داخل القاهرة

راحة السائق فى المسافات الطويلة شئ مهم جدا بالنسبالى

خدمة ما بعد البيع و اسعار قطع الغيار.

سؤالين صغيرين فى الاخر بقى

( حد عندة معلومات لو ركبت غاز للعربية و هى زيرو دا تاثيرة اية سواء لوجان او ريو علشان بعد ازمات البنزين المتكررة و ارتفاع سعرة المتوقع قريبا هيبقى الغاز ضرورى خصوصا انى بسافر و بمشى كتير جوة المدينة ) اللى اعرفة ان اجهزة الغاز الجديدة شالت معظم السلبيات اللى كانت بتاثر على الموتور و بقى الغاز بيدى كفائة زى بنزين 95

( هل تركيب الغاز بيخرج العربية من الضمان ؟؟ )

انا اسف للاطالة و منتظر ردودكم

شكرا

**Last-Fighter** · 05-06-2012 05:34 PM

شباب سلام عليكم انا كمان فى نفس حالة الاستاذ كوباية شاى و نفسى حد يجاوب على اسئلته بس ارجوكم اللى يجاوب يكون عن تجربة فعلية مش يقولى انا سمعت
انا زيه محتار جدا و محتاج مساعدتكم بجد

**S O P H O S** · 05-06-2012 06:02 PM

انا هقولك راي الشخصي لو بين الاثنين دولا انا اختار الريو
بس بشرط مش اقلبها غاز
والاثنين معقولين ومتقاربين
بس انا اختار الكيا ...
مجرد راي

**samyyousef** · 05-06-2012 06:33 PM

السلام عليكم
لا أظن أن ايا من السيارتين الرينو او الكيا يستهلك بنزين بشكل يستدعي التحويل الى غاز

**S O P H O S** · 05-06-2012 06:42 PM

المشاركة الأصلية كتبت بواسطة samyyousef

السلام عليكم
لا أظن أن ايا من السيارتين الرينو او الكيا يستهلك بنزين بشكل يستدعي التحويل الى غاز

بالظبط كده علشان كده اخترت الريو مع عدم التحويل لغاز ...
ما افضل ترك الشئ كما صنع

**mido_soliman** · 06-06-2012 03:47 AM

لا يوجد وجة مقارنة بين اللوجان والريو فى كل شىء
الريو افضل بمراحل

**tutankhamoun** · 06-06-2012 06:28 AM

( حد عندة معلومات لو ركبت غاز للعربية و هى زيرو دا تاثيرة اية سواء لوجان او ريو علشان بعد ازمات البنزين المتكررة و ارتفاع سعرة المتوقع قريبا هيبقى الغاز ضرورى خصوصا انى بسافر و بمشى كتير جوة المدينة ) اللى اعرفة ان اجهزة الغاز الجديدة شالت معظم السلبيات اللى كانت بتاثر على الموتور و بقى الغاز بيدى كفائة زى بنزين 95
( هل تركيب الغاز بيخرج العربية من الضمان ؟؟ )

أولا تركيب الغاز بيخرج العربية من الضمان طبعا (الموتور على الأقل )
طيب ردا على سؤال الغاز

مين اللي قال لحضرتك أن الضرر جاي من نوعية الجهاز الخاص بالغاز ؟

الضرر بييجي من الغاز نفسه و لذلك أيوة الغاز بيضر الموتور بس لها طرق للحفاظ على الموتور لفترة طويلة شوية .
الغاز فيه كبريت عالي و الكبريت هو اللي بيعمل تآكل داخليا عند حرقه .
البنزين مفيهوش الكبريت .

طيب تعمل أيه علشان تتفادي كدا

الأول العربية لازم تدور الصبح بالبنزين و تمشي بها مسافة و بعدين تنقل لغاز .

قبل ما تركب الغاز أصلا لازم تكون مشيت بالعربية مسافة لا تقل عن 5000 كم علشان البنزين بيكون طبقة من مادة معينة (نسيت أسمها) بتقلل تأثير الكبريت في البساتم .

الحاجة بقى الأخيرة و هي موضوع أن الغاز بيديك قوة بنزين 95 ؟

طبعا اللي قال لحضرتك الكلام ده ............... ميعرفش حاجة في البالوظة !

مبدئيا
الموتور مُصمم بضغط مُعين و كل نسبة ضغط لها نوعية من الأوكتان لا يجب أن تقل عنها
فلو مثلا أنت عربيتك هاتحتاج بنزين 90 أو 92 و أنت بتحط 95 ................... و لا هاتحس بالهوا و لا أي فرق .

أنت مش هاتطلع قوة أكبر من قوة الموتور الأصلية علشان حطت وقود درجة أشتعاله و طاقته أعلى من وقود آخر .

طيب الغاز بقى ؟

الغاز أصلا ............ أقل في الطاقة من البنزين
يعني بالبلدي
العربية بتبقى بطة بلدي في السحب لما بتشتغل بالغاز ............ مقابل البنزين طبعا .(يعني حتة كفائته في السحب أقل من بنزين 90 كمان ) فرضا أن موتورك مُصمم لبنزين 90 .
ميزة الغاز هو التوفير فقط لا غير .

أنت بتقول بتسافر كتير
درجة توافر محطات الغاز على الطرق اللي بتسافر عليها هاتفرق معاك لأن لو أنت بتسافر على طرق مفيهاش محطات غاز يبقى أنت عندك جهاز غاز في العربية ملوش أي لزمة .

طبعا داخل القاهرة إلى حد كبير هاتستفيد لأن محطات الغاز منتشرة تقريبا .