السلام عليكم
1- رجاء من كل اللى هيقرأ الموضوع يكون عارف أن العبد لله محترف سيارات ( نظرياً فقط ) والفضل الوحيد فى ذلك هو الله ثم نايل موتورز لدرجة أن أى أحد عاوز يشترى عربية جديدة فى قريتى بيسألنى عنها و بيفاجأ بالمعلومات اللى عندى طبعا ( نظرياً فقط )
2- أنا بقالى 9 سنوات أمتلك سيارة الأولى كانت 128 والثانية كانت ريجاتا و بعتها من أقل من شهر وببحث عن سيارة .
3- بعد قراءات كثيرة عجبنى أوى Byd F3 علشان كل الكماليات والموتور ميتسوبيشى والعفشة التويوتا والوسع الكبير والإرتفاع والشكل الجميل والسعر المناسب المهم قرات تقريبا 95% من موضوعات المنتدى.
4- أمس خرجت متجها إلى معرض الغد مخصوص لرؤيةF3 بالذات و كان هناك ساجا وبرسونا لكن المرة دى كنت رايح مخصوص لرؤيةF3 المهم السيارة اللى هناك المانيوال ما شاء الله عليها لونه فرانى ماشاء الله حاجة جميلة جدا إنبهرت جدا بها ودورت السيارة العدادات لونها أزرق العربية من جوه ومن بره وكل حاجة ما شاء الله الأوتو فين الأخ اللى هناك أ. حماده محترم قال موجودة ممكن نجبها طيب نوع الفتيس إيه رد طبعا ميتسوبيشى قلتله طيب الأوتو فتيس نيسان رد وقال لأه طبعا
5- السعر المانيوال : قال 72 قلتله مش 71 قال غليت من 3 أيام المهم فى انهاية وصلت 71
الأوتو 84فى انهاية وصلت 83.5
6- الصيانة : عندهم . قطع الغيار رخيصة وموجدة وقال بعض الأسعا زى اللى موجودة هنا
.................................................. .................................................. ...........
كل اللى فات جميل و 100 % نيجى للى مش ......
1- لى صديق من أيام الجيش ( بالمناسبة انا مدرس وعندى 37 سنة ) صديقى دوكتوراة فى العفشة روحت له وقلتله على Byd F3 قالى أوعى تجيبها طيب ليه يا عم بالإلحاح علي قالى حاجاتها مش موجودة قلتله ليه مش موتور ميتسوبيشى والعفشة تويوتا قال طيب الجسم لو باب إتخبط وعاوز تغيره قلتله تويوتا قال لأه ( أرجو الرد ) المهم بالإلحاح قال طيب لو الفتيس حصل له حاجة قلتله مش فتيس الانسر قال لأه المهم قال بنجيب الفتيس و ناخد الفرغة بتاعة فتيس Byd F3 وننقل فيها فأجزاء فتيس الانسر طيب المساعدين قال بنركب بتوع التويوتا
2- مشيت من عنده وأنا زعلان جدا لأنى العربية دى عجبانى أوى المهم فيه واحد من قريتى معاه F3 شغال فى القاهرة وأنا مروح فى المواصلات جبت نمرته وكلمته و كانت المفاجأة أن كل اللى قال العفشجى حصل معاه:
أنا : أستاذ أحمد اخبار الByd F3 بعد التحية
أحمد: أنت بتشترى طيب أنا ببيع عربيتى موديل 2008 عاملة 112000كم
أنا : أخبارها إيه
أحمد: كويسة بس فيها حاجات صينى بتحتاج تتغير زى المساعدين غيرتهم يابانى والفتيس غيرته
أنا : الفتيس ؟؟؟؟؟؟
أحمد: أيوه جبت فتيس البوما وغيرته 2000 جنيه
أنا : شلت ده وركبت التانى؟
أحمد: لأه أخدت التروس اللى جوه الفتيس البوما وركبتها داخل الفرغة بتاعة فتيس F3 ( نفس الكلام ) لأن فيه حساس مينفش يتنقل وغيرت البلية يابانىو السك و الأسطوانة لكن بعد ما غيرت كل الحاجات دى بأت تمام وعلى فكرة العربيات الموجوده دلوقتى تقفيل مصرى أما عربيتى تقفيل صينى ( هل فيه فرق ؟)
.................................................. .................................................. ................
النهاية:
1- إيه تعليقاتكم على الكلام ده ( أتمنى إن يكون كل السلبيات دى مش حقيقية )
2- الفرق 12 ألف تقريبا بين المانيوال و الأوتو مش كتييييير؟؟؟؟؟؟؟؟؟
3- لو السيارة المستعملة دى للبيع تسوى كام2008
4- قرأت هنا عن موضوع السخونة الزايدة إيه حقيقته؟؟
5- أنا آسف جدا على الإطالة ,انا لا أهاجم أنا واحد منكم وببحث فعلا على سيارة
وشكرا
محمد
المفضلات