الموضوع: طريق شرم الشيخ

السلام عليكم ورحمة الله وبركاته

أنا لسة كنت هناك في اجازة شم النسيم اللي فات وكان يوم السفر الجمعة اللي قبل شم النسيم مباشرة فكان الطريق ونس بس بزيادة عن اللزوم يعني كنت في أوقات كتير بحس اني على طريق السويس مثلا من الكثافة الزيادة عن الطبيعي بالنسبة للطريق ده بس مكانتش عاملة مشكلة بالنسبالي عشان أنا واخد عالطريق دة عشان سافرت عليه بتاع 5 مرات من قبل
عموما متقلقش ولو من النوع اللي بيقلك ممكن تمسك في ديل باص سياحة وهو هيبقى حافظ الطريق ولو مكنتش مشيت عالطريق دة من قبل يا ريت تخلي بالك من منطقة جبال ما قبل أبو زنيمة هتقابلها بعد رأس سدر بحوالي 40 50 كيلو وهتمشي فيها لمسافة 25 كيلو تقريبا هي في وسط الجبال وفيها ملفات حادة كتير يمين في شمال ورا بعد وبلاش تتخطى حد في الملفات دي وعموما بدايتها ملف حاد شمال وقبلها هتكون ماشي على ساحل خليج السويس
وتوصل بالسلامة ان شاء الله ورحلة سعيدة

المشاركة الأصلية كتبت بواسطة yalahwy2010

تسلم يا باشا على نصايحك الغالية
انا مشيت على طريق شرم 3 مرات وانا سايق.........الطريق بصراحة ممتع وبحب أسوق عليه
وانا من طبيعة سواقتى انى ما بعديش ال 100
ومتهيألى طالما هسافر فى النور يبقى كدة مافيش قلق من قطاع الطرق او الحرامية والكلام ده
صح؟؟؟...........وأبعد خالص عن السفر بالليل

يا باشا لا شكر على واجب
ومادام حضرتك مشيت علطريق يتبقى مشكلة الامان، وفعلا أنصحك تمشي عليه بالنهار وتحاول تمسك الطريق مع كذا عربية وتمشوا مع بعض
قول دعاء السفر وتوكل على الله وتوصل بالسلامة

والله يا باشا الموضوع في الاول والأخر قدر ونصيب بس احنا ناخد بالاسباب ونتوكل على الله
بالنسبة لنقطة إن الطريق فاضي ولا ونس ، هو غالبا في غير الاجازات مكن تمشي حتة كبيرة من غير ما تقابل حد بس الكلام ده بعد حقول بلاعيم بعد أبو رديس لكن لحد أبو رديس هتلاقي الكثافة أكتر لأن في عربيات كتير بتمشي على الطريق دة لحد أبو رديس عشان بتبقى تبع عمليات الحفر والانتاج اللي هناك
يعني أنا مرة سافرت في أخر نوفمبر 2008 لشرم من بعد أبو رديس قعدت ماشي مع نفسي تماما لمسافة 50 كيلو تقريبا
بس أنا مسمعتش إن في حد اتثبت على الطريق ده وموضوع العرب دة كان قطع طريق فقط لمطالب تابعة لقبائل
توكل على الله