الموضوع: تنبيه هام عن ريو 2012

السلام عليكم
الموضوع ده هام جدا لكل اللي اشتري العربيه ديه
نبدأ من الاول انا اشتريت العربيه ديه من مارس اللي فات , لاحظت ان استهلاك البنزين عالي جدا فيها
و كنت كل ما بسأل حد عن الموضوع ده يقلي استني اول 1000 كيلو
المهم الموضع ده استمر معايا حتي الان , ناس قالتلي انت رجلك تقيله علي البنزين و شككوني في نفسي , بس انا سوقتي عاديه تماما
المهم روحت التوكيل فرع القطاميه في الصيانه بتاعت 1000 و قلتلهم علي المشكله , و كان واضح جدا انهم مهتموش بيها و عملوا صيانه الالف و سلمهالي
روحت بيها تاني مخصوص للموضع ده و عملت مشكله لان استهلاك البنزين وصل معايا ال 100 كيلو وسط البلد بتاخد ما بين 15 لي 18 لتر (متتخضش) المهم المهندس كشف عليها و قالي ان البوجيهات فتحتها مكنتش مظبوطه و اننا خلاص ظبطناها
و قالي افول للزور و امشي 100 كيلو و اوفل تاني و اتصل بيا و قولي عملت كام ليتر
انا انبسطت و قلت الحمد لله المشكله اتحلت حتي اللحظه اللي حطييت فيها البنزين بعد 100 كيلو و اكنت المفاجأه انها استهلكت 18 لتر
نمت علي الموضوع شويه علشان اتشغلت في الشغل و هما عاملين سيستم زباله ان اي مشكله خارج الصيانات الدوريه تتعمل من الاحد للخميس (يعني لازم يوم شغل يروح عليك)
المهم كلمت الكول سنتر و عملت مشكله كبيره , اتقالي روح ابو رواش ده الفرع الرئيسي و مجهز افضل من القطاميه , قلت ماشي
روحت و استنين دوري و لاقيت ورايا واحد معاه ريو 2012 خليجي , قلت اروح اساله عامله معاه ايه , اول ما قلت للراجل العربيه عامله معاك ايه؟ قالي استهلاك غير طبيعي في البنزين
هنا بقي قلت لا فيه حاجه مش مظبوطه , جالي المهندس و سالته , قلتله بصراحه كده العربيه ديه نازله فيها عيب , قالي انت تالت عربيه تيجي بنفس المشكله , قلتله و الرابع ورايا اهوه (علي الخليجي)
و قالي متقلقش الموضوع ده هيتحل و انهم بعتوا تقرير لكيا بره علي الموضوع ده
المهم العربيه خدت 4 ساعات و خلصوها و قالي ان الصمام بتاع البنزين بيوصلو كهربا عاليه عن المفروض و بالتالي بيفتح اكتر و بيحرق بنزين اكتر من المفروض و كمان ساعات بيعلق و ده بيفسر موضوع ان ساعات لما ادوس علي البنزين الاستجابه بتبقي بطيئه و فجأه الار بي ام يعلي معايا مره واحده
الموضوع ده كان امبارح بس و انا لسه مجربتش العربيه بعد الصيانه ديه
بس انا ناوي لو لا قدر الله متحلتش انا هعمل مشكله كبيره.
المهم انا عملت التنبيه ده للناس اللي تملك العربيه ديه انها تحسب استهلاكها للبنزين و لو لقت انها بتستهلك بنزين عالي تروح ابو رواش و متمشيش قبل ما تصلحها و يسبوهم من كلام الناس اللي تقلك اول 1000 او رجلك مش مظبوطه علي البنزين و الهبل ده , مش اول مره نركب عربيات يا جدعان
اتمني اني اكون افدت الناس

متابعين استهلاك العربيه بعد الصيانه