عايز مقارنة بين البرتون ساجا والرينو لوجان

**bassemali** · 19-06-2012 12:32 PM

الساجا مع اخويا من 2010 وعامله 65000 كيلو ... العربيه انا سقتها كتير وأنا اللي نصحته بيها لما كان بيشتري وبيقارن بينها وبين اللوجان ... العربيه ماتورها عزمه عالي جدااااااااااا ... ماتحسش أنك راكب عربيه 1300 خالص ... والتسارع رهيب ... فراملها وتكييفها والثبات ممتازين ( أنا جبت بيها 170) وسع الصالون تتفوق فيه اللوجان ... إنتشار قطع الغيار وسعر إعادة البيع تتفوق فيه اللوجان ... لكن التوكيل الأتنين انا شايفهم زي بعض... وأسعار قطع الغيار برضه أنا شايفها قريبه ... أنا بشوف الساجا أفضل حاجه ف الفئه السعريه دي للي عايز أداء رياضي ... واللوجان والإسبرانزا الأفضل للي عايز عربيه عائليه ... وكمان نسيت أقولك ان الساجا سعرها أرخص من الرينو حوالي 3000 جنيه ده غير أنها جايه من بلدها أصلي مش متجمعه هنا أو هنا ... الساجا فيها باركينج سينسور مش موجود في اللوجان كمان ... لكن من حيث الإعتماديه أنا ماجربتش اللوجان عشان أحكم بس الساجا إعتماديه ممتازه ... أتمنى أكون أفدتك وبالتوفيق... وأقولك على سر ... روح المعرض أقعد في دي شويه وأقعد ف دي شويه وشوف أنت مرتاح لأنهي فيهم أكتر ... صدقني الموضوع ده بيفرق كتير ف إتخاذ القرار.

**hesham_tawfiq** · 19-06-2012 02:53 PM

السلام عليكم
انا معايا العربيتين اللوجان مانيوال سيدان والساجا الاوتوماتيك وهحاول ارد على حضرتك فى المقارنه
الكماليات فى العربيتين تقريبا واحده ماعدا فالساجا حساسات ركن مش موجوده فى اللوجان بالاضافه الى امكانية تعديل ارتفاع عجلة القياده بس فى نفس الوقت اللوجان فيها 4 زجاج كهربا وفى الساجا الاتنين اللى قدام بس هما الى كهربا وورا مكن زجاج يدوى
الراحه للركاب تتفوق فيها اللوجان بوضوح انما الساجا برضه مريحه مش ضيقه
استهلاك البنزين واحد فى الاتنين ودا مش فى مصلحة الساجا لان موتورها 1300 سى سى ودا كمان بيأثر على سحب العربيه مع تشغيل التكييف انما اعتقد ان مقارنتى هنا مش فى محلها لان الساجا الى معايا اوتوماتيك فطبيعى استهلاكها اعلى من المانيوال
التقفيل الداخلى فى العربيتين يعتبر على نفس المستوى مع اماكن تخزين اكتر فى الساجا عن اللوجان
التكييف فى الساجا افضل نظرا لضيق مساحة الصالون عن اللوجان
حجم الشنطه فى الوجان اكبر بكتير ( 500 لتر ) مقابل 350 لتر للساجا ودا يكون افضل للسياره العائليه
مستوى التوكيل وجودة الخدمه وتوافر قطع الغيار محسومه لصالح اللوجان بدون نقاش ( عن تجربه )
بالنسبه لاعادة البيع اللوجان حاليا انتشرت جدا عن زمان فأعادة بيعها هتكون اسهل
اتمنى اكون افدت حضرتك ولو افتكرت اى حاجه اضافيه اكيد هحط بيها بوست وبالتوفيق لحضرتك

**eng.ahmedbasha** · 20-06-2012 08:01 AM

" أنا بشوف الساجا أفضل حاجه ف الفئه السعريه دي للي عايز أداء رياضي ... واللوجان والإسبرانزا الأفضل للي عايز عربيه عائليه ..."

ممتازة الجملة دي :) دقيقة جدا وعلقت معايا بصراحة :)

"مستوى التوكيل وجودة الخدمه وتوافر قطع الغيار محسومه لصالح اللوجان بدون نقاش ( عن تجربه )"

أعتقد أن كده حسمت إختياري :) وخصوصا انك الوحيد اللي معاك ال 2 شكرا ليك :)

سؤال أخير بالنسبة للصاج والعفشة شايف حاجه تفوقت ع التانيه ولا زي بعض ؟

**hesham_tawfiq** · 20-06-2012 03:39 PM

الصاج والعفشه فى الاتنين كويسين جدا ونفس المستوى
توكل على الله وربنا يوفقك

**eng.ahmedbasha** · 21-06-2012 03:50 PM

الله المستعان

شكرا ليك مرة تانيه علي تعاونك ووقتك :)

ربنا يقسم اللي فيه الخير

**bobozoro** · 23-06-2012 10:17 PM

مقارنة الساجا باللوجان الاتوماتك في الاتنين:
74900 و 78900 لو هتحسب الفرق ال4000 ده فرق قطع الغيار وانك هتعمل حاجاتها عند الوكيل لمدة 3 سنين يبقي تقدر تحط موضوع قطع الغيار ده علي جنب

**wesdahab** · 29-07-2012 12:46 AM

المشاركة الأصلية كتبت بواسطة bobozoro

مقارنة الساجا باللوجان الاتوماتك في الاتنين:
74900 و 78900 لو هتحسب الفرق ال4000 ده فرق قطع الغيار وانك هتعمل حاجاتها عند الوكيل لمدة 3 سنين يبقي تقدر تحط موضوع قطع الغيار ده علي جنب

أنا حابب أقولك إن اللوجان ب 82000 والساجا ب 74000 "برة التوكيل" يعني الفرق 8000 جنيه

**crayvor** · 29-07-2012 08:04 AM

المشاركة الأصلية كتبت بواسطة gamalo

اخواني بالنسبة للتوكيل واحد صاحبي اشتري لوجان زيرو وبعد 3 اسابيع وهو ماشي فجأة العربية من العجلة اليمين تزلت كلها عا الارض وربنا ستر يعني العجلة بالمساعدين باي حاجة ماسكلة العجلة سابت عا الارض اتصل بالتوكيل خدوها علي التوكيل الرئيسي ف القاهرة قعدت 2 شهر ولم يحث شيئ + المبلغ الرهيب الي قالولوا هاتتكلف كام وهانبعت الصور فرنسا يشوفوا العيب فين بلا جدي لمدة 3 شهور لم يحدث شيئء اضطر الا اخذها وتصليحها علي حسابعة بنص المبلغ الي قالوا علية العربية كويسة جدا زي ماشفتها بس التوكيل زي ماقلت لحضراتكم وشكرا لرددوكم والاستفادة

ازاي قالوله "المبلغ الرهيب اللي حاتتكلفه" اذا كان شاريها من 3 أسابيع يعني ف الضمان؟

المشاركة الأصلية كتبت بواسطة hesham_tawfiq

السلام عليكم
الكماليات فى العربيتين تقريبا واحده ماعدا فالساجا حساسات ركن مش موجوده فى اللوجان بالاضافه الى امكانية تعديل ارتفاع عجلة القياده بس فى نفس الوقت اللوجان فيها 4 زجاج كهربا وفى الساجا الاتنين اللى قدام بس هما الى كهربا وورا مكن زجاج يدوى

اللوجان فيها تعديل ارتفاع عجلة القيادة وتعديل ارتفاع الكرسي كمان.