الموضوع: تحذير مهم من بعض سواقين التاكسي

السلام عليكم
من كام يوم ركبت مع سواق تاكسي ابيض فيرنا ومركب فرش جلد ازرق فى رمادي ووصلنى مشوارى والعداد كان عامل 3.75 فمكنش معايا فكة فديته 5 جنيه ونزلت
ومسافة ما نزلت وقفلت الباب لقيته ماسك ربع جنيه مكرمش و بيقولى "ايه دا يا استاذ انت مديني ربع جنيه" المهم انا استغربت شوية كد لانى يوميها مكنش معايا إربع جنيه المهم انا شكيت فى نفسي وقلتله اسف مخدتش بالى وقمت مدور على 10 جنيه اديتهاله وهو اداني 5 جنيه
المهم اني لما مشي فضلت احسب وادقق فى حساباتى وفلوسي ملقيتش اني مكنش معايا اربع خالص المهم انا حفظت لون الفرش بتاعه عشان لو صادف انى ركبت معه تانى فى اي وقت اخد حذري ونا بديله الفلوس يمكن حظه العسر انه يقع معيا تانى

المهم لسه واخد قريبي بيحكيلى دلوقتى موقف مشابه مع تاكسي ابيض فيرنا ومركب فرش احمر فى اسود
السوق برضه خد منه الـ 5 جنيه وبعد الراجل ما نزل هو واطفاله قاله يا باشا دا ربع جنيه مكرمش فقله معلشي وقام قريبي مطلع من جيبه 50 جنيه واداهاله وقاله هات الباقى فالسواق عمل انه بيطلع فكة وقام باصص لقريبي وقاله ياباشا دي 5 جنيه هو انت مش مركز ولا ايه بسبب العيال
قام قريبي قاله لأ نا مديك 50 جنيه فقام السواق قايله لأ وحياة عيالك 5 جنيه بس وقام سايبه وماشي

من هنا ورايح لما تطلع فلوس من جيبك تديها لسوق تاكسي امسكها كويس وبص فيها كويس جداً واديها للسواق مفرودة وقله امسك يا اسطى الــxx جنيه يا اسطى

كفانا الله وايكم شر المال حرام واللي بيقبلوه على نفسهم
حسبنا الله ونعم الوكيل