يعني ايه ثبات؟؟

**eng.m7md.ali** · 21-06-2012 02:24 AM

انا عارف ان الموضوع متكرر
بس بستغرب من الناس اللي بتتكلم عن عربية ويقولوا انها ثابتة جداً على سرعة عالية والكلام ده
واتفاجأ ان مفهومهم للثبات غلط خالص
انا بحب السرعة وبحب العربيات الثابتة على السرعات العالي
عشان كدة لازم نوضح مفهوم الثبات الحقيقي للناس
مينفعش تمشي في طريق مستقيم وتقول ان العربية ثابتة
كمان مينفعش تجيب سرعة 180 وتفضل ماشي علطول وتجي تقول العربية ثابتة جداً وكان ممكن تجيب اكتر .. يعني ايه كان ممكن تجيب اكتر؟ ماكل العربيات سرعتها بتزيد عادي

مقياس الثبات في العربية تقدر تحدده من خلال تحكمك للعربية على السرعات العالية

يعني تقدر تتفاده فجأة حاجة قدامك .. تقدر تاخد ملف حاد على سرعة كبيرة .. تقدر تاخد غرزة ديقة على سرعة كبيرة .. من الاخر تقدر تتحكم بطريقة كاملة في عربيتك

طبعا الكلام ده مش في اغلب عربياتنا اللي بتتباع غالي بسبب الجمارك الكتير

الكلام على العربيات المحترمة زي كل الاوروبي والامريكي تقريبا . على شوية من اليابان
ندي مثال صغير ومحدش يزعل مني :
مينفعش نيجي عند عربية زي اكسنت rb مثلا او الانترا ونقول العربيات دي ثابتة
بالعكس
جرب تاخد غرزة جامدة او تتفادة حاجة قدامك فجأة شوف هيحصل ايه
كمان العفشة الخلفية عليها عامل مهم جداً وبتفرق من متصلة او منفصلة

كمان في عربية بهرتني بثباتها بصراحة ومكنتش متوقع منها كدة وهيا اسبرانزا m 11

العربية دي فيها حاجة مش طبيعية بسم الله ماشاء الله ثباتها حلو بس كل حاجة وليها حدود

عشان كدة مش عايزين حد يتغر في عربيته ويقول عليها ثابتة غير بالتجربة العملية

وربنا يسترها عليا جميعاً

**ahmad--ezzat** · 21-06-2012 02:30 AM

انت ذكرت كل حاجه كده

مستني ردود ايه بقي هههههه

**AhMeD MeTwAlY** · 21-06-2012 03:08 AM

واللهي كلام زي الفل يا ريت الناس كلها تشوفه عشان انا بشوف حجات غريبه عن العربيات الكوري

**semi** · 21-06-2012 03:12 AM

مفيش احسن من الالماني في موضوع الثبات
العربيات اللي بتنزلنا بتبقى على ادها عشان الفلوس والجمارك ووجع القلب ده
فبيقبى الثبات بتاعها لحد سرعة معينة
واحنا مش طماعين بصراحة لان اصل طرقنا على ادها
بس وصل الموضوع دلوقتي لحد اننا بقى ينزل لنا زبالة العربيات
مع انها ماركات محترمة ومعروفة لكن تقفيل معفن من دول لسه جديدة في صناعة العربيات
فموضوع الثبات ده بقى اخر حاجه يبصله واحد بيشتري عربية

**alaamousa** · 21-06-2012 03:37 AM

عندك حق تسلم على المعلومات الجامدة دي

**Hobgoblin** · 21-06-2012 03:41 AM

المشاركة الأصلية كتبت بواسطة semi

مفيش احسن من الالماني في موضوع الثبات
العربيات اللي بتنزلنا بتبقى على ادها عشان الفلوس والجمارك ووجع القلب ده
فبيقبى الثبات بتاعها لحد سرعة معينة
واحنا مش طماعين بصراحة لان اصل طرقنا على ادها
بس وصل الموضوع دلوقتي لحد اننا بقى ينزل لنا زبالة العربيات
مع انها ماركات محترمة ومعروفة لكن تقفيل معفن من دول لسه جديدة في صناعة العربيات
فموضوع الثبات ده بقى اخر حاجه يبصله واحد بيشتري عربية

أنا متفق معاك في موضوع ثبات الأوروبي والامريكي.

بختلف مع حضرتك في موضوع التقفيل دة...دة تصميم عربية هو اللي بيحدد ثباتها على السرعات وفي مختلف الظروف.

ولعلم حضرتك احنا هنا في أمريكا فيه كل الكوري KIA و-HYUNDAI فيه ال-elantra والاوبتيما وال-rio و-forte إلي هي cerato و-accent وحتى ال-chevrolet aveo و-optra بأسامي ثانية.

كل اللي بيفرق هو مواتير أكبر شوية وكماليات. لكن وسائل الأمان والثبات هي هي بصفة عامة...طبعاً فيه إستثناءت.

وزي ما فيه الكوري فيه بردو حاجات عالية...وكل برغوت على قد دمه.

تحياتي يا باشا

**hugan** · 21-06-2012 04:00 AM

الاسبرانزا بجميع فئاتها
عدا 1300
ممتازه جدا في ثباتها

**semi** · 21-06-2012 05:00 AM

المشاركة الأصلية كتبت بواسطة hugan

الاسبرانزا بجميع فئاتها
عدا 1300
ممتازه جدا في ثباتها

اعرف واحد من سبرانزا بيقول ان شركة شيري بتنزل عربيات وهمية
عربيات بتنافس فعلا بيقول حاجات خيالية في بيجي منها بمصر عشان العرض بس مش للبيع
وان العلامة اللي بتنزل باسم سبرانزا في منها عربيات كويسة جدا
وفي عربيات اي كلام عشان التلكفة تقل

المشاركة الأصلية كتبت بواسطة gsoleiman

أنا متفق معاك في موضوع ثبات الأوروبي والامريكي.

بختلف مع حضرتك في موضوع التقفيل دة...دة تصميم عربية هو اللي بيحدد ثباتها على السرعات وفي مختلف الظروف.

ولعلم حضرتك احنا هنا في أمريكا فيه كل الكوري kia و-hyundai فيه ال-elantra والاوبتيما وال-rio و-forte إلي هي cerato و-accent وحتى ال-chevrolet aveo و-optra بأسامي ثانية.

كل اللي بيفرق هو مواتير أكبر شوية وكماليات. لكن وسائل الأمان والثبات هي هي بصفة عامة...طبعاً فيه إستثناءت.

وزي ما فيه الكوري فيه بردو حاجات عالية...وكل برغوت على قد دمه.

تحياتي يا باشا

كلامك جميل جدا اكيد طبعا حتى في امريكا في عربيات ممتازة وعربيات اقل
لكن مينفعش تلاقي مثلا عربية نازلة امريكا بتقفيل اقل جودة من نفس الماركة في المانيا مثلا
قيس بنفس المقياس بقى على الفيرنا مثلا شوف تقفيل الفيرنا الخليجي وتقفيل الفيرنا بتاعة مصر
فرق شااااااااسع ولما تحسبها حتى بعد اضافة الجمارك تلاقي نفس السعر بمصر
ده كل ده ومش اتكلمت على عوامل الامان بس هي لا موجودة في الخليج ولا عندنا
ونفس الكلام ينطبق على الصني مثلا او اللوجان وعربيات كتير كده
حتى ان العدوى انتقلت دلوقت لموديلات محترمة زي بتاعة اللانسر