مشكله في الدبرياج (غالبا)

**egy_3assy** · 21-06-2012 09:52 AM

صباح الخير على الرجاله ..
العربية اكسنت 1300 مو 99 كربراتير
انا كنت حصل معايا حوار كدة اني لما اجي ادوس دبرياج بسمع صوت حد بيغرق تحت العربية .. صةت غريب كدة .. نفضت و عملت عبيط خصوصا ان الصوت دة بيقل كتير لما العربية تمشي شوية.. و امبارح لقيت الموضوع بقي غريب حبتين .. يعني وانا مروح من الشغل باخد الطريق في ساعة و نص كدة و كلو وقفات .. فكنت على اكتوبر و لقيت النقلات بتيجي بصعوبة فظيعة .. و الفتيس مخشب و بدال الدبرياج بقى خفيف اوي .. والسحب بقى زباله .. لما روحت كشفت على زيت الدبرياج لقيتو زي ما هو و قلت خليها تبرد و اجرب الصبح .. ف وانا جي الشغل انهاردة لقيت نفس الموضوع بقى و خشونة و الدبرياج كأني بدوس على الهوا خفيف جدا .. و العربية فيها رجه رخمة جدا و انا في بداية التحرك .. هل دي بلية ولا طقم دبرياج خربان ولا حاجة تانية.. ارجو المساعدة عشان مروحش اغير طقم الدبرياج كلو ب 500 جنية و الاقيها حاجة تانية

**koshary** · 21-06-2012 10:58 AM

كدا الرجة دى الدسك تعبان وان الدبرياج خفيف معاك دى كدا البلية انت هتحتاج تغير الطقم كلو على بعضو انا لسه عامل الحوار ده والعربيه اختلفت تماما انت هتعمل صيانة للفتيس وهتغير اولسيهات ليه وهتغير الزيت بتاع الفتيس وهتجيب طقم دبرياج جديد ( دسك واسطوانة وبلية ) وهاتو من مكان مضمون انا جيبتو من ابراهيم البنا فى التوفيقيه والراجل حاجتو اصلية وممتازة وكان سعر الطقم 320 تقريبا وده الاصلى بتاعها لو احتاجت اى حاجه وانت نازل تشترى الطقم انا ممكن اجى مع حضرتك لو احتاجت اى حاجه وده الموضوع بتاعى شوفو القى نظرة عليه

http://www.nilemotors.net/Nile/289976-a.html

**egy_3assy** · 21-06-2012 11:25 AM

ربنا يخليك يا باشا .. طيب اروح التوفيقية و اتكل على الله .. اصل انا في واحد اعرفو و قريب مني و قالي ب 350 يعني مش فارقة

**mbx4e** · 21-06-2012 11:39 AM

وانت بتغير الطقم اكشف على الفولام ممكن تكون محتاجه صنفرة او تتخرط

**koshary** · 21-06-2012 12:12 PM

المشاركة الأصلية كتبت بواسطة egy_3assy

ربنا يخليك يا باشا .. طيب اروح التوفيقية و اتكل على الله .. اصل انا في واحد اعرفو و قريب مني و قالي ب 350 يعني مش فارقة

لو ضامنو ان الطقم الاصلى هاتو بس انا قولتلك التوفيقيه هتلاقيه الاصلى وارخص 30 جنية انت اولى بيهم تكون معدى على وسط البلد اخطف رجلك وهاتهم وزى ما العضو قالك شوف الفولام لو محتاج خراطه

**aboomar22** · 21-06-2012 12:12 PM

خفة بدال الدبرياج بيكون عيب ديسك الشرائح المعدنية بيسموها سوست بتكون ضعفت وبقت خفيفة قوى وبتصعب النقلات جدا انما حتى لو الاسطوانة تبدو سليمة برضه غيرها وغير البلية

**egy_3assy** · 27-06-2012 03:27 PM

ده انا امبارح اتدلعت ...
السلام عليكم الاول كدة و خلوني احكيلكو اللي حصل معايا بالظبط من الاسبوع اللي فات ومن بعد ما كتبت الموضوع ..
طبعا زي منتو عارفين مشكلة الدبرياج السخيفة انا روحت يوم الجمعه للأسطى على الميكانيكي .. كشف على العربية و قالي دة الماستر عامل ريجا و محتاج يتغير .. لفيت علية و لقيت نوع ب 100 و نوع انضف الاصلي بالكيس بتاع غبور ب 135 .. فاصلت وخدتة ب 125 وزي الفل كدة و جبت علبه زيت باكم ب 10 جنية و ركب الاسطى علي على كدة و العربية بقت زي الفل و النقلات بقت ناعمه جدا بس الصوت فضل موجود لما ادوس دبرياج .. المهم هو قالي فاكس الصوت طلما ماشية دلوقتي هي البلية بايظة بس خليها لما الطقم يجيب اخرو نفك مرة واحدة و نغيروا .. المهم مشيت بيها و امبارح بليل لقيت العربية بتترج جامد لما اجي اطلع على الاول و صوت صفارة جامدة لما ادوس دبرياج و الدواسة بتعلق شوية (مش بترجع بعد ما اسيبها بسهولة) .. وصلت البيت و كلمت الاسطى علي قالي كدة خلاص خلصت لازم نغير الطقم اكيد البلية مش بتأدي و الديسك خلاص هيمون .. قولتلو خلاص هجيبلك العربية يوم الجمعه الصبح بدري و نشتغل و قررت اروح الشغل انهاردة و بكرة مواصلات طبعا بتبهدل و بشوف ايام سودة عشان كنت نسيتها خلاص و ودعت الميكروباصات بس يلا خير كدة كويس و الحمد لله انها معملتهاش معايا على اكتوبر ولا في نفق الازهر .. المهم انا يوم الجمعه هوديها و ادعولي الموضوع يتم على خير.