طريقة اضافة خدمة قبول الدفع الالكتروني (فيزا - ماستر) في المواقع

**أبو_يوسف** · 24-06-2012 11:04 AM

السلام عليكم ورحمة الله وبركاته
كنت من فترة عملت الموضوع دا:
http://www.nilemotors.net/Nile/261587-a.html
والموضوع دا انا عامله علشان كان في ناس طلبت مني لما اوصل لحاجة او حل اعرفهم وصلت لايه..
كان في ناس اقترحت علي البنك الافريقي بس طلع موضوع مش سهل بيطلبوا ضمانات كتيرة واوراق كأنك هاتفتح شركة
وفي نفس الوقت لاقيت ان افضل حاجة ان يكون في وسيط ثقة علشان العميل اللي هايتعامل مع موقعك يكون مطمئن وهو بيكتب بيانات الكارت بتاعه انه لن يساء استخدامه او سرقته.. الوسيط دا بيبقى اسمه بنك الكتروني
وطبعا من اشهر البنوك دي باي بال ومش شغال من مصر يليه اليرت باي الذي تحول ل بيزا Payza

والتسجيل فيه بيكون مجاني ولما بتتم عمليه بيتخصم عمولة فقط..
الفكرة ببساطة واختصار:
- انك بتسجل نفسك في البنك
- بتطلب الموافقة على موقعك (بتاخد حوالي 10 أيام)
- بعد كدا من موقع البنك بتجهز ازرار الدفع اللي هاتضيفها في موقعك يعني بتدخل شوية بيانات وبتحدد عنوان الصفحة على موقعك اللي موقع البنك هايكلمها لما يحصل عملية دفع .. وتاخد الكود الناتج تضيفه في موقعك
وكدا يبقى موقعك بيقبل الدفع الالكتروني
هي الفكرة مختصرة ولو حد عايز تفاصيل انا تحت امره
وعلى فكرة البنك الالكتروني فيه نظام ريفيرال ... يعني اشتراك حضرتك عن طريق الرابط التالي هايكسبني (بس معرفش هاكسب ايه:))

**M.Radwan** · 24-06-2012 12:32 PM

طب ايه هي الضمانات والورق بتاع البنك العربي؟

**أبو_يوسف** · 24-06-2012 12:49 PM

بصراحة انا مجربتش اروح البنك
بس من خلال البحث على النت لقيت تجارب لناس بتشتكي من الموضوع دا
اعتقد بيبقى فيه تأمين ومصاريف شهرية غير العمولات..
هو دا رابط الخدمة على البنك الافريقي
Arab African International Bank-Click2Shop

**M.Radwan** · 24-06-2012 01:01 PM

طب دلوقتى الموقع ده اشتغل معاك كويس؟

**أبو_يوسف** · 24-06-2012 01:12 PM

ايوة شغال الحمدلله..

**M.Radwan** · 24-06-2012 07:32 PM

طب انا لسه فاتح موقع جديد..بس مش عارف ابدأ أعلن عنه ازاي وعايز برضه قصة الدفع دي تكون خلصانة
ياترى عندك تجربة في المجال ده أو في انك تخلي الترافيك عالي في الموقع؟

**أبو_يوسف** · 25-06-2012 12:36 AM

بصراحة مليش خبرة اوي في موضوع الاشهار
بس بدأت بكوبونات اعلانات جوجل ادوردز.. في ناس بتبيع الكوبون رصيد 100 دولار ب 20 ج
وعملت حملة اعلانية النهاردة ولسه هاشوف النتيجة
وبشوف اعلانات ناس ممكن تعمل لك الترافيك وترفع الرانك بتاع موقعك وممكن تخليك تظهر في الصفحة الاولى للبحث مع جوجل مقابل مبالغ معينة
اما قصة الدفع لو حاجة وقفت معاك قولي واللي اعرفه هافيدك به ان شاء الله