الموضوع: بعد طول انتظار مقارنة بين الرينو فلوينس و الهيونداي النترا الجديدة

السلام عليكم و رحمة الله

النهارده جايبلكم مقارنة من اشهر المقارنات اللي اتطلبت او اتسال عنها في المنتدي
مقارنة بين رينو فلوينس و هيونداي الانترا الجديده

و المقارنة دي مبنية علي تجربتي الشخصية

اللي متابع اخباري من الاعضاء يعرف اني عملت حادثة بسيطة كده لكن تطلبت اني استغني عن عربيتي كام يوم عشان تتصلح و قد كان و اجرت الانترا 2012 و قعدت معايا يوم كامل و مشيت بيها حوالي 100 كيلو ما بين طرق داخل البلد و خارجها و اعتقد انها فتره كافيه لتكوين انطباع كويس عن العربية

اما الفلوينس فهي عربية اختي (و للعلم لم يكن ليا اي دخل في اختيارها) و طبعا تحت ايدي لكن مش باخدها كتير فانطباعي عنها يوازي الانطباع اللي خدتة من الالنترا

و من هنا اقدر اقول ان المقارنة ده عادلة بما فيه كفاية و نبتديها علي بركة الله

السيارات
الالنترا كانت موديل 2012 بيضاء اللون بفرش بيج لكن للاسف مقدرتش اعرف اي فئة بس عامة هي اوتوماتيك و فيها ايرباج واحد للسائق و جنوط 16 علي ما اعتقد

اما الفلوينس فهي فئة P3 اللون النبتي و فرش اسود

التصميم
طبعا من ناحية التصميم فدي فالاول و الاخر اذواق

لكن كل من رينو و هيونداي مسهلين الامور علينا لان العربيتين متبعين منهج تصميمي مختلف تماما
حيث تتميز الفلوينس بتصميم كلاسيكي معتدل بينما الالنترا بتتميز بتصميم عصري للغاية و نفس الكلام ينطبق علي التصميم الداخلي

شخصيا مقدرش افضل واحده عن التانية لانهم زي ما قلت مختلفين تماما لكن الاتنين مميزين جدا علي الطريق و الانظار بتتوجه اليهم لكن طبعا الالنترا لها النصيب الاكبر في دي بسبب تميز تصميمها عن باقي المنافسين


المقصورة والتجهيزات
كلتى السيارتين بياتوا بمقصورة مميزه و تتبع نفس النهج التصميمي للشكل الخارجي حيث تتميز الفلوينس بطبلون بسيط لكن انيق و بتوزيع مثالي للاماكن الازرار و العتلات و اكتر ما يميزة شاشة المعلومات اللي في المنتصف و اللي بتشكل عامل جاذب للنظر بينما الالنترا تتميز بطابلوها الفضائي و اللي يوازي الشكل الخارجي في الثورية

بالنسبة ليا كل سياره ليها مميزات و عيوب

الفلوينس طبعا اوسع بشكل ملحوظ و المواد المستخدمة اكتر جوده من اللي في الالنترا و التقفيل كذلك احسن لكن يعيبها اللون الاسود الكئيب (حتي مع الجزء المعدني اللي في المنتصف) و ده بيظهر بليل قوي خصوصا و ان مفيش اي مصادر اضائة مخفية زي العربيات الاعلي و الرزايز بتاعت التكيف و الكاسيت صغيره و محتاجة مده عشان تحفظ اماكنها

الالنترا يتتمتع بطابلون مميز و خصوصا من حيث تعدد الالوان (بيج و اسود و حليات سلفر) و طبعا لوحة عدادات مميزة و مساحات التخزين كتيرة لكن يعيبها جودة الخامات (بالمقارنة بالرينو لكن في المجمل الخامات كويسة جدا) و اماكن فتحات المكيف و لاحظت ان زراير الكاسيت بعيدة شوية عن متناول يد السائق

الجلوس في العربيتين مريح و ان كانت كراسي الفلوينس انشف شوية من الالنترا لكن وسع الفولينس و خصوصا في الكراسي الخلفية بيعوض ده

من حيث التجهيزات فالمقارنه هنا محسومة للفولينس بصراحة و خصوصا من ناحية تجهيزات الامان حدث و لا حرج (و ده عيب توكيل مش عربية زي ما احنا عارفين)

التكيف جيد جدا في الاتنين لكن سرعة التبريد اسرع في الالنترا و الاتنين بليل تلاجة و تتميز الفولينس برضه بفتحات التكيف الخلفية و طبعا في الشمس الستاير الخلفية اللي في الفلوينس ليها اهمية برضه

شخصيا المقارنة في النقطة دي محسومة للفلوينس بسبب التجهيزات الاعلي خصوصا من ناحية عوامل الامان

المحرك و الفتيس
طبعا ناس كتير هتقول النقطة دي محسومة للالنترا

لكن علي الرغم من الفرق الكبير في القوه 130 حصان للالنترا مقابل 110 حصان للفلوينس الا اني لم الاحظ دي قوي خلال القيادة العادية لكن عند القيادة الرياضية بيظهر تفوق الالنترا و خصوصا في التسارع من الثبات لكن علي السرعات العالية مفرقتش قوي و لاحظت ان العربيتين فيهم delay من وقت لما تدوس علي الدواسه لغاية لما تحس بالانطلاق و ده بيبان قوي في الفلوينس بالذات

بصراحة بالنسبة ليا الاتنين في الضياع V8 Addict بقي

اما بالنسبة للفتيس فده محسوم للالنترا بصراحة
النقلات فيه انعم و اسلس و للعلم لم الاحظ موضوع النتشة الشهيرة اللي في فتيس الفلوينس دي لكن لاحظت و بوضوح موضوع النقلة التانية اللي بتنقل علي مرتين دي

القيادة
في راي العربيتن قريبين من بعض قوي و استمتعت بسواقتهم بصراحة خصوصا اني بحس اني سايق لعب اكمني متعود علي سواقة الدبابات و احسن حاجة عجبتني و ضايقتني في نفس الوقت هو power steering بتاع العربتين

طبعا الاتنين دريكسونهم ممكن التحكم فيه بصباع واحد و ده طبعا جميييل في وسط البلد و الزحمة
لكن علي السرعات العالية مش حلو ابدا هو المفروض انهم بيتقلوا بس مش بالقدر الكافي بصراحة و الاتنين بيدوك احساس انك ممكن تفقد التحكم فيهم و الشعور ده بيبان قوي في الالتنرا خصوصا في الملفات و لاحظت برضه في الالنترا لما تاخد u turn ان الدريكسون مش بيرد للنص زي اغلب العربيات لكن بحسه بيرد في الاتجاه المعاكس و الموقف ده حصل معايا اكتر من مره و خلاني اقلق من العربية لغاية ما فهمتها

بشكل عام انا مقدرتش اجرب العربيتين في مواقف صعبه عشان اقيم ثباتهم لكن علي الطرق المستقيمة الاتنين ثباتهم كويس و ان كانت الفلوينس بتدي شعور انها اثبت (اعتقد بسبب جودة العزل عن الالنترا)

ملاحظ برضه ان العربيتين صعبين في التعود علي ابعادهم

الفلوينس طويلة و عريضة و الجزء الخلفي منها مرتفع شوية مما بيقلل من الرؤية الخلفية خصوصا الحاجات الواطية و لازم يركبلها parking sensors

الالتنرا تصميمها الخارجي ليه تاثير كبير. الكبوت ملوش اي ملامح من جوة العربية و الزجاج الخلفي صغير شوية و اكتر حاجة ضايقتي السوك اللي في الجنب بتدي احساس ان العربية عريييضة و كمان من الجزء الخلفي )قبل الفوانيس) السوكة بتبقي بارزة بزيادة و محتاجة حرص قوي في الشوارع الضيقة

الحكم النهائي
كلتا السيارتين جيدتين وجديرتين بالاحترام و المنافسه ما بينهم متقاربة جدا بصراحة و الفروق ما بينهم قليلة جدا و الاختيار ما بينهم صعب و بيتوقف علي عوامل بعيدة عن العربيتين نفسهم زي سعر اعادة البيع و اسعار قطع الغيار و سمعة التوكيل

لكن في النهاية صوتي هيكون للفلوينس بصراحة لانها و ببساطة بتديك الاحساس انها اغلي و اقيم من قيمتها علي عكس الالنترا اللي دايما بتحسسك انك دافع فيها زياده خصوصا لو عايز تجيبها بالمواصفات الاعلي او بعوامل الامان لكن ده لا يمنع انها منافس عتيد و لازم اخده بعين الاعتبار عند الشراء

في النهاية اتمني تكون المقارنة عجبتكم و الاهم تكونوا استفدتم منها
و دي شوية صور للسياراتين و هما طبعا معروفين للكل

اللالنترا






الفلوينس