غيرت طقم الدبرياج كلو العربية بقت حلاوة

**egy_3assy** · 01-07-2012 01:07 PM

صباح الفل على اجدع منتدى عربيات في الشرق الاوسط ..
انهاردة ميعادنا مع تغيير طقم دبرياج الاكسنت بتاعتي بعد ما حالتها كانت وصلت للذروة ..
المشكلة بدأت لما ابتدا الفتيس يبقى تقيل اوي و النقلات تزرجن .. اعلية و يرجع و اعلية و يرجع .. لحد مغيرت ماستر الدبرياج وجبت واحد جديد وبعدها ب اربع ايام لقيت صوت صفارة و هبد في العربية كلها لما ادوس دبرياج قلت خلاص حان وقت تغيير الطقم استنيت طبعا ليوم الجمعه و خدت ميعاد من الميكانيكي بتاعي و اتوكلنا يوم الجمعه الصبح .. رحت لعم على الساعه 10 الصبح ابتدينا شغل الساعه 10:30 و تم فك الفتيس كلو الساعه 12:30 و جه وقت الصلاه سيبنا العربية و صلينا و رحت جيبت الحاجات اللي هنحتاجها في الشغل.. من عند البطل اللي في عين شمس قدام مصنع كوفرتينا
1. طقم الدبرياج ( اسطوانة و ديسك و بلية ) ب 350 جنية
2. علبة زيت باكم ب 12 جنية
3. كيلو زيت فتيس ب 18 جنية
4. قاعدة موتور بدل اللي بايظة عندي و كانت بتعمل رجرجة ب 40 جنية
5. خراطة و تنضيف للفولام ب 25 جنية
6. ماستر دبرياج ب 100 جنية (بس دة الاسبوع اللي قبله)
المهم اتوكلت على الله و بدأنا نشوف اللي حصل لقينا اول حاجة البلية متفرتكة خالص و رولمان البلي اللي فيها مفروط كلو .. و الاسطوانة كانت معقولة بس شايطة اوي .. و الديسك قالي حالتو كويسة يعني ممكن يتغسل و يتنضف و يركب قولتلو لا ياعم انا مش ناوي اعد القعدة دي تاني .. هغير كل حاجة .. و الفولام كان عايز خراطة فراح للخراط و اتظبط . و قفلنا و استلمت العربية الساعه 5:30
طبعا كان يوم مرهق بشكل مش طبيعي بس بعد ما ركبت و نزلت اجرب العربية
اولا السحب بقى فوق الهايل .. والعربية عايزة تسيبني و تجري .. و لما شغلت التكييف مبقتش بتمشي بالصعوبة اللي كانت عليها زمان .. لا متسحب و بتجري عادي .. و النقلات بقت فيها سلاسه رائعه . . غير ان ركبتي الشمال كانت هتتفك من بعضها من تقل الدبرياج زمان .. انما دلوقتي بقى مية ولا كأني دايس على حاجة و دة بصراحة مريحني جدا عشان بقف و امشي كتير و انا رايح و راجع من الشغل على كوبري اكتوبر وصلاح سالم و ما ادراك كوبري اكتوبر وصلاح سالم الساعه 5 العصر
عموما انا مش عارف ارفع الصور ف هتلاقوها على اللينك دة
Facebook

**mado83** · 01-07-2012 01:12 PM

مبروك

**essam_shaaban** · 01-07-2012 01:22 PM

الف الف مبروك و عقبالي يارب عشان الدبرياج بتاعي ابتدا يتقل كاني دايس علي حجر ...... وربنا يكفيك شرها

**S O P H O S** · 01-07-2012 02:33 PM

الف مبروك ..

**egy_3assy** · 02-07-2012 12:25 PM

الله يبارك فيكو يا رجاله ... و عقبالك يا essam_shaaban .. الخطوة دي مهمة قوي و فعلا عملت فرق معايا لدرجة اني كنت مقرر اني اركن العربية كل يوم عند موقف ال CTA و اروح الشغل وارجع كدة كل يوم بدل السواقة و استحمل البطئ بقا وخلاص .. بس بصراحة مش هاين عليا اسيبها كدة لان سواقتها بقت اسهل كتير.. ربنا يحفظها بس ويكرمني بيها

**al_manara** · 03-07-2012 03:20 AM

الف مبروك .

عاوزينك تجرب لنا بقي حاجة بمناسبة ان الطقم لسة جديد .
في ناس بتقول الطقم لما يبوز تعرف بانك والعربية واقفة تنقل علي الرابع وتحاول تطلع لو طلعت يبقي بايز ولو طفت يبقي سليم .
وفي ناس بتقول العكس .
مستنيينك تجرب وتاكد لنا المعلومة ايهما هو الصح .