الموضوع: DSG vs CVT

السلام عليكم ورحمة الله

لاحظت انه فيه ناس كتير عمالة تسأل عن النوعين دول من الفتيس ومافيش اجابة بتضم الاتنين مع بعض فحبيت الم كل اللي انا اعرفه عنهم هنا واتمنا من اخوتي انها تصححلي اخطائي او تقدملي اقتراحتهم


في الاول احب اقولكم صفات كل من ال CVT وال DSG لاني قعدت فترة ادرسهم واحللهم:

CVT Continuously variable transmission وده معناه ان النسب بين سرعة المتور و السرعة اللي بتوصل للعجل متغيرة مش ثابتة, في المناويل والاوتوماتك العادي كلنا عارفين ان فيه غيارات كل غيار من دول بيأثر علي نسبة نقل السرعة من المتور للعجل زي الجدول ده مثلا:
Gear Ratio
1st gear 2.97:1
2nd gear 2.07:1
3rd gear 1.43:1
4th gear 1.00:1
5th gear 0.84:1
6th gear 0.56:1
reverse 3.38:1

ايه الجديد في ال CVT انه مابقاش فيه حاجة اسمها غيارات لا بقي بيتحكم في النسبة اللي بين المتور والعجل علي طول ويقدر يحصل علي اي قيمة ممكن تتخيلها و علشان كده بيقولوا انك تقدر تحصل علي عدد لانهائي من الغيارات

طيب ده ايه ميزته وايه عيبه:

الميزة: انك بتحصل علي نسب لم تكن تستطيع انك تحصل عليها في اي فتيس اخر وبتلاحظ ان حركة ال RPM مش عنيفة زي المناويل لا بالعكس ديه تقريبا بتبقي ثابته لان التغيير كل في النسبة اللي في الفتيس, وده طبعا بيريح المتور غير انه بيحافظ علي استهلاك الينزين في الحرق اللي مالوش لازمة.

العيب: المشكلة انه زي ما قولت عنده نسب كتير وبيتحرك بينهم بالتدريج ف النقل مش بيتم مرة واحدة نفترض انك عايز
تنقل من الاول للتاني في المنيول بتنقل مرة واحدة لكن في الCVT كمثال هتلاقي بتنقل كده 1 1.1 1.2 1.3 .... 2 طبعا ده بيأثر علي التسارع ويحسسك ان العربية مش بتجري لانه بياخدها بالتدريج

Nissan's Next Generation CVT - YouTube
Suzuki Automotive Explains "CVT" or Continuously Variable Transmission - YouTube


في DSG Direct-Shift Gearbox يعني النقل بيتم علي طول او بمعني اخر النقلة ما بتخدش وقت من سرعتها, فكرته معمولة علي اساس فكرة dual-clutch transmissions ,بيعملك زي مجموعتين تروس "للتبسيط" واحده فيها الغيارات 1 3 5 7 والتاني 2 4 6 R و الفكرة انه اثناء استخدامك لغيار معين فيه دائرة الكترونية بتحسب ايه الغيار اللي متوقع ان العربية تحتاجه فيجهزوا علي المجموعة الاخري من الغيارات طبعا عرفتم ليه الفردي مجموعة والزوجي في المجموعة الاخري لانك بتنقل نقلة واحدة بس ف لو كنت في المجموعة الفردي هتروح للمجموعة الزوجي كده كده مثلا انت علي 3 هتنزل نقلة يبقي 2 هتطلع نقلة يبقي ال 4.
المزايا والعيوب:

المزايا: اختصار الوقت تحضير النقلة لان النقلة اللي جاية جاهزة علي المجموعة الاخري فبتنقل الغيار بسرعة اكبر من اي حل تاني "لاتقولي مانويل ولا اتومتك ولا العفريت الازرق هاها" المهم ان التسارع عالي جدا ولو لاحظت ال RPM هتلاقيه بينط بسرعة ومش بياخد نفس المسافة زي في المانويل.

العيوب: ياريت حضراتكم تروحوا علي جروب الفولكس فاجن وتشوفوا الشكاوي واحد معاه جولف 6 كان بيقول غير الفتيس مرتين خلال 27000كم والمشكلة كانت بتتحل بتغيير الفتيس علي طول , طبعا فيه ناس بتشكر فيه وفيه ناس بتقول ان مشاكله اتحلت, لكن المشاكل كانت معظمها في ان الطرق في مصر والوقوف المتكرر بيتعب الفتيس وساعات بتخليه يهيس "ما يعرفش النقلة اللي جاية ايه"

الخلاصة بين المثالين اللي فاتوا ان:

CVT: افضل من ناحية راحة المتور واستهلاك البنزين لكن ما بيحسسكش بالسرعة او التسارع اللي انت بتشوفه حتي في المنويل, لكنه مناسب اكتر للطرق في مصر "انسب في توفير البنزين واطالة عمر المتور"

DSG: رائع في انه اختصر وقت تحضير النقلة, وافضل حالة ليه انه يكون عندك طريق مفتوح وتجري زي الرهوان, لكن مشاكلة انه لا يتناسب مع الطرق في مصر وكمان شكاويه كتير وعمره الافتراضي يبدوا اقصر بكتير "انسب للتسارع والسباق"

New Volkswagen DSG gearbox - YouTube
وده ال S-Tronic بتاع الاودي انا شايف انه ابسط وافضل من الفولكس فاجن "ومشاكله اقل" لكن معتمد علي نفس الفكرة
Audi S-tronic Transmission - YouTube

ارجو ما كنش طولت عليكم, واحب اكرر ان ده من خلال التحليل ودراسة تصميم الفتيسين ولكن عمر الفتيسين لسه مش كبير وافكارهم جديدة, ولو فيه اي استفسار او نقض ارحب بيه